بەكارىس شويبەكوۆ, جانسايا مۋسينا, مۇحتار نيازوۆ سىندى ايتۋلى اقىندار قاتىسقان ايتىستىڭ تارتىستى وتكەنىنە كورەرمەن دە كۋا. جوبانى قوعام قايراتكەرى امانجول ءالتاي جۇرگىزىپ, ايتىس بارىسىنا سالماق پەن ادىلدىك دارىتتى.
فينالعا «ايتىستىڭ اقتاڭگەرى», قوستانايلىق ايبەك قاليەۆ پەن استانالىق ەركەبۇلان قاينازار جولداما الىپ, «قازاق ءۇشىن وتان جالعىز, تۋ جالعىز» تاقىرىبىندا تارتىستى ايتىس وتكىزدى. بۇل كەزدەسۋ اعا مەن ءىنى اراسىنداعى سىيلاستىقتى, ەل الدىنداعى جاۋاپكەرشىلىكتى, ايتىسقا ءتان مادەنيەتتى ايقىن كورسەتتى. تورەلىك تىزگىنىن ايتىستىڭ ابىزى ءجۇرسىن ەرمان ۇستادى.
فينالدىڭ باس جۇلدەسى – «Q4 Tulpar» ۇسىنعان اۆتوكولىك. تارتىستى جەكپە-جەك پەن قايىم ايتىستىڭ قورىتىندىسىن سارالاعان قازىلار القاسى ايبەك قاليەۆتى جەڭىمپاز دەپ تانىپ, باس جۇلدە – اۆتوكولىك پەن «التىن قامشى» جۇلدەسىن تابىستادى. ايتىسكەر اقىن ەركەبۇلان قاينازار ءبىرىنشى ورىن الىپ, 5 ميلليون تەڭگە جۇلدەنى قانجىعاسىنا بايلادى. ەكىنشى ورىن ديدار قاميەۆكە (3 ملن تەڭگە), ءۇشىنشى ورىن جانسايا مۋسيناعا (2 ملن تەڭگە) بەرىلدى. كورەرمەن كوزايىمى اتانعان - ايىم اسىلبەكقىزى (500 000 تەڭگە). ال تاعى ءبىر اۆتوكولىكتىڭ يەسى كاسىپكەر تالعات ساقانوۆقا ەرەكشە ۇناعان ايتىسكەر نۇربول جاۋىنباەۆ بولدى.
«بۇل جىل مەن ءۇشىن وتە ءساتتى بولدى. ايتىس ونەرىندەگى شىعارماشىلىعىمداعى سوڭعى جىلىم. ابىرويدىڭ بيىگىمەن ايتىسپەن قوشتاسىپ جاتىرمىن. وسى جەكپە-جەك ايتىستا ءتول ونەرىمىزدى ناسيحاتتاپ ۇيىمداستىرىپ جاتقان ايتىس اقىندارى مەن جىرشى-تەرمەشىلەر وداعى, ءجۇرسىن اعامىز باستاعان, امانجول اعامىز قوستاعان وداققا جانە جەكپە-جەك ايتىسقا الاڭ بەرىپ وتىرعان «حابار» ارناسىنا, قازاق حالقىنا كوپ-كوپ راقمەت ايتقىم كەلەدى», دەدى ايبەك قاليەۆ.
جوبانىڭ جوعارى دەڭگەيدە وتۋىنە Magnum كومپانياسىنىڭ دا قولداۋى زور بولدى. «حابار» اگەنتتىگىنىڭ توراعاسى كەمەلبەك ويشىباەۆ ارنا ەفيرىندە الاشتىڭ بەكزات ونەرى, ۇلتىمىزدىڭ رۋحاني قازىناسى ايتىستى ناسيحاتتاۋ جالعاسا بەرەتىنىن اتاپ ءوتتى.
