ونىڭ ايتۋىنشا, الاياقتار ءتۇرلى بەينەروليكتەر ارقىلى «ويىن بۇزۋدىڭ قۇپياسى», «تەگىن بونۋس الۋ جولى», «جابىق فۋنكتسيالارعا قول جەتكىزۋ» سەكىلدى جالعان ۋادەلەردى تاراتادى.
مۇنداي ۆيدەولاردا ادەتتە Telegram ارنالارىنا باعىتتايتىن سىلتەمەلەر ورنالاستىرىلادى. اتالعان رەسۋرستاردا كامەلەتكە تولماعانداردان «ۆەريفيكاتسيادان ءوتۋ», «ID ارقىلى كىرۋ» نەمەسە باسقا دا تۇسىنىكسىز ارەكەتتەردى ورىنداۋ تالاپ ەتىلەدى.
«وسىدان كەيىن قاسكويلەر پسيحولوگيالىق قىسىم كورسەتىپ, بالاعا «قۇرىلعىڭىز بۇزىلدى», «جەكە دەرەكتەرىڭىز بەن حاتتارىڭىز ءبىزدىڭ قولىمىزدا» دەگەن مازمۇندا حابارلامالار جىبەرەدى. وسى ارەكەتتەر ارقىلى ادەيى ۇرەي تۋدىرىلادى. قورقىنىش پەن سەنىمسىزدىككە تاپ بولعان جاعدايدا بالا اقشا اۋدارۋعا ءماجبۇر بولۋى مۇمكىن. انىقتالعان قاۋىپ-قاتەرلەرگە بايلانىستى بالالاردىڭ قۇقىقتارىن قورعاۋ كوميتەتى ىشكى ىستەر مينيسترلىگىنىڭ كيبەرقىلمىسپەن كۇرەس دەپارتامەنتىنە جەدەل تۇردە جۇگىندى. اتالعان فاكتى بويىنشا اقپارات قارالىپ, باقىلاۋعا الىنادى. وسىعان ۇقساس جاعدايلار انىقتالعان جاعدايدا «E-ءوتىنىش» پورتالى ارقىلى ءوتىنىش جولداۋلارىڭىزدى سۇرايمىز», دەپ جازدى ناسىمجان وسپانوۆا.
كوميتەت باسشىسىنىڭ ايتۋىنشا, بالامەن تالقىلاۋعا ءتيىستى نەگىزگى ماسەلەلەر مىنالار:
• بەينەماتەريالداردا, پىكىرلەردە نەمەسە جەكە حابارلامالاردا ورنالاستىرىلعان, ويىنداردى بۇزۋ, بونۋستار الۋ نەمەسە جابىق فۋنكتسيالارعا قول جەتكىزۋگە ۋادە بەرەتىن سىلتەمەلەرگە وتپەۋ قاجەت;
• بەيتانىس ادامداردىڭ نە Telegram ارنالارىن جۇرگىزۋشىلەر تالابىمەن ەشقانداي جاعدايدا «ۆەريفيكاتسيادان», «ID-دوستۋپ» سياقتى تەكسەرۋلەردەن وتپەۋى ءتيىس;
• جەكە مالىمەتتەردى, SMS ارقىلى كەلەتىن كودتاردى, اككاۋنت دەرەكتەرى مەن قۇپياسوزدەردى ءۇشىنشى تۇلعالارعا بەرۋگە بولمايدى, ءتىپتى ولار قۇرىلعى نەمەسە اككاۋنت بۇزىلدى دەپ سەندىرسە دە;
• قورقىنىش تۋدىراتىن مازمۇنداعى حابارلامالار الىنعان جاعدايدا, دەرەۋ سويلەسۋدى توقتاتىپ, اتا-اناسىنا نەمەسە زاڭدى وكىلىنە حابارلاۋ قاجەت.
اتا-انالار قابىلداۋى ءتيىس الدىن الۋ شارالارى:
• بالاعا ينتەرنەت-الاياقتىقتىڭ كەڭ تارالعان ادىستەرىن جانە الاياقتار قولداناتىن پسيحولوگيالىق ىقپال ەتۋ تاسىلدەرىن ءتۇسىندىرۋ;
• قۇرىلعىلاردا اتا-انا باقىلاۋىن ورناتۋ ارقىلى بوگدە سىلتەمەلەرگە وتۋگە شەكتەۋ قويۋ;
• ينتەرنەت كەڭىستىگىندە تۋىندايتىن كۇماندى جاعدايلار تۋرالى بالا دەر كەزىندە حابارلاي الاتىنداي سەنىمدى قارىم-قاتىناس ورناتۋ.
• كۇدىكتى ارەكەتتەر انىقتالعان جاعدايدا قۇقىق قورعاۋ ورگاندارىنا جۇگىنۋگە نەمەسە 111 بايلانىس ورتالىعىنا حابار بەرۋگە بولادى.
ايتا كەتەيىك, قازاقستان رەسپۋبليكاسىنىڭ ونلاين-پلاتفورمالار مەن بۇقارالىق اقپارات قۇرالدارىنا قاتىستى زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ جونىندەگى زاڭ جوباسى اياسىندا بالالاردى دەنساۋلىعىنا جانە دامۋىنا زيان كەلتىرەتىن اقپاراتتان قورعاۋعا باعىتتالعان بىرقاتار نورمالار قاراستىرىلىپ جاتىر.
ماسەلەن, جەدەل حابار الماسۋ سەرۆيستەرىن قوسپاعاندا, 16 جاسقا تولماعان تۇلعالاردىڭ ونلاين-پلاتفورمالاردا تىركەلۋىنە تىيىم سالۋ ۇسىنىلعان.
«بالالاردىڭ قۇقىقتارىن قورعاۋ كوميتەتى بۇل باستامانى قولدايدى ءارى ونى كامەلەتكە تولماعانداردى ونلاين كەڭىستىكتە تارالاتىن الاياقتىق جانە قاۋىپتى سحەمالاردان قورعاۋعا باعىتتالعان الدىن الۋ شارالارىنىڭ ءبىرى رەتىندە قاراستىرادى», دەدى ن.وسپانوۆا.
