الماتى قالالىق سپورت باسقارماسى جىل ۇزدىكتەرىن انىقتاۋ ماقساتىندا Beles Almaty – 2025 سپورتتىق جۇلدەسىن وتكىزدى. سالتاناتتى شاراعا الماتى قالاسىنىڭ اكىمى دارحان ساتىبالدى قاتىستى.
جىل ۇزدىكتەرىن انىقتاۋ بارىسىندا گرەك-ريم, ەركىن جانە ايەلدەر كۇرەسىنەن الماتى قالالىق فەدەراتسياسى "جىلدىڭ ۇزدىك سپورتتىق فەدەراتسياسى" اتاندى. الماتىلىق كۇرەس فەدەراتسياسى 110 سپورتتىق ۇجىمنىڭ قاتارىنان ۇزدىك شىققان.
بيىل الماتىلىق بالۋاندار رەسپۋبليكالىق تۋرنيرلەردەن 141, حالىقارالىق جارىستاردان 34 مەدال جەڭىپ الدى. ونىڭ ىشىندە ەركىن كۇرەس شەبەرلەرىنىڭ ەنشىسىندە 83 حالىقارالىق, 362 رەسپۋبليكالىق دودانىڭ جۇلدەسى بار.
اتاپ ايتار بولساق, U17 الەم چەمپيوناتىندا نۇرالي اسقار كۇمىس جۇلدەگەر اتانسا, ەرەسەكتەر اراسىنداعى ازيا بىرىنشىلىگىندە شاميل وجاەۆ قولا مەدال جەڭىپ العان. سونداي-اق, ءتۇرلى جاس دەڭگەيىندەگى قازاقستان بىرىنشىلىكتەرى, قازاقستان كۋبوگى جانە ەرەسەكتەر اراسىنداعى ەل چەمپيوناتىندا الماتىلىق بالۋاندار تۇراقتى تۇردە جۇلدەگە ىلىككەن.
الماتى قالالىق كۇرەس فەدەراتسياسى رەسپۋبليكالىق جانە حالىقارالىق تۋرنيرلەردى جوعارى دەڭگەيدە وتكىزۋىمەن دە ەرەكشەلەنەدى. بيىلعى سپورتتىق ماۋسىمدا ومار اليەۆ باستاعان فەدەراتسيا كۇرەس تۇرلەرىنەن U17, U20 ەل بىرىنشىلىگىن, ەرەسەكتەر اراسىنداعى قازاقستان چەمپيوناتى مەن PWL ءتۋرنيرىن ابىرويمەن وتكىزدى.
سپورتشىلاردىڭ ەكولوگيالىق تازا اۋداندا تۇرىپ, دۇرىس تاماقتانۋىن, رەجيمدى دۇرىس ۇستانۋىن قامتاماسىز ەتۋ ماقساتىندا بالۋاندارعا ارنايى جاتاقحانا بەرىلدى. ايتا كەتەيىك, كۇرەس تۇرلەرىنەن الماتى قالالىق فەدەراتسياسىن 2024 جىلدان بەرى بەلگىلى سپورت مەنەدجەرى ومار اليەۆ باسقارادى.
