ەڭ كوپ كۋرورتتار شىعىس قازاقستان, اقمولا جانە الماتى وڭىرلەرىندە شوعىرلانعان. اسىرەسە «شىمبۇلاق» پەن «وي-قاراعاي» سياقتى كۋرورتتار تۋريستەر اراسىندا ۇلكەن سۇرانىسقا يە.
مەملەكەت باسشىسىنىڭ 2024 جىلعى تاپسىرماسىنا سايكەس, 2025–2029 جىلدارعا ارنالعان الماتى تاۋ كلاستەرىن دامىتۋدىڭ كەشەندى جوسپارى ازىرلەنۋدە. جوبا 7 نەگىزگى باعىتتى قامتيتىن 69 ءىس-شارادان تۇرادى. ونى ىسكە اسىرۋ ناتيجەسىندە شەتەلدىك تۋريستەر سانى 1,7 ملن ادامعا دەيىن ءوسىپ, تۋريزم سالاسىندا جۇمىسپەن قامتىلعاندار سانى 100 مىڭنان اسادى دەپ كۇتىلۋدە.
نەگىزگى باستامالاردىڭ ءبىرى – «شىمبۇلاق» پەن «وي-قاراعاي» كۋرورتتارىن بىرىكتىرەتىن بىرىڭعاي تاۋ-شاڭعى جۇيەسىن قۇرۋ. بۇل تۋريستىك جۇكتەمەنى تەڭ ءبولىپ, ينفراقۇرىلىمعا تۇسەتىن قىسىمدى ازايتۋعا مۇمكىندىك بەرەدى.
سونىمەن قاتار الماتى ماڭىندا الەمدىك دەڭگەيدەگى «Almaty Superski» جوباسى جۇزەگە اسىرىلۋدا. جوبا اياسىندا ۇزىندىعى 65 شاقىرىمنان اساتىن تاۋ-شاڭعى تراسسالارى سالىنىپ, كوك-جايلاۋ, كۋمبەل شىڭى جانە بىرقاتار شاتقالداردا زاماناۋي تۋريستىك ينفراقۇرىلىم قالىپتاستىرىلادى.
مامانداردىڭ ايتۋىنشا, بۇل باستامالار قازاقستاننىڭ قىسقى تۋريزمدەگى الەۋەتىن ارتتىرىپ, ەلدى ورتالىق ازياداعى جەتەكشى تۋريستىك باعىتتاردىڭ بىرىنە اينالدىرۋعا جول اشادى.
