مەملەكەتتىك «قازاەروناۆيگاتسيا» كاسىپورنى ۇلتتىق اۋە قوزعالىسىن باسقارۋ جۇيەسىن اۋقىمدى جاڭعىرتۋعا كىرىسىپ, امەريكالىق Leidos كومپانياسىمەن جاسالعان 19 جىلدىق كەلىسىم اياسىندا SkyLine-X پلاتفورماسىنا كوشۋدى باستادى.
اتالعان جوبا قازاقستان مەن اقش اراسىنداعى جوعارى تەحنولوگيالى ىنتىماقتاستىقتىڭ نەگىزگى ۇلگىلەرىنىڭ ءبىرى سانالادى جانە ۆاشينگتوندا وتكەن قازاقستان پرەزيدەنتى قاسىم-جومارت توقاەۆ پەن اقش پرەزيدەنتى دونالد ترامپتىڭ كەزدەسۋى بارىسىندا رەسمي تۇردە اتاپ ءوتىلدى.
كەلىسىمدى دايىنداۋ سوڭعى جىلدارداعى سالا ءۇشىن ەڭ كۇردەلى پروتسەستەردىڭ ءبىرى بولدى جانە ديپلوماتيالىق جۇمىستى, ساراپتامالىق باعالاۋدى ءارى ينستيتۋتسيونالدىق كەمەلدىلىكتى تالاپ ەتتى.
«قازاقستان وڭىردەگى ەڭ اۋقىمدى اۋە كەڭىستىكتەرىنىڭ ءبىرىن باسقارادى, ال جۇيەنىڭ سەنىمدىلىگى – قاۋىپسىزدىكتىڭ باستى فاكتورى. جاڭعىرتۋ بىزگە سەنىمدى تۇردە العا جىلجۋعا جانە قىزمەت كورسەتۋ ساپاسىن الەمدەگى جەتەكشى ورتالىقتار دەڭگەيىندە قامتاماسىز ەتۋگە مۇمكىندىك بەرەدى», – دەدى «قازاەروناۆيگاتسيا» باس ديرەكتورى فاات فاريتوۆيچ.
اقش تاراپى دا مەملەكەتتىك دەپارتامەنتتىڭ رەسمي ماتەريالدارىندا بۇل جوبانىڭ ماڭىزىن اتاپ ءوتىپ, ونى اۆياتسيا, تسيفرلىق تەحنولوگيالار جانە كولىك ينفراقۇرىلىمىنا سالىنعان ينۆەستيتسيالارمەن قاتار ستراتەگيالىق سەرىكتەستىكتى تەرەڭدەتۋدىڭ ماڭىزدى ەلەمەنتى رەتىندە اتادى. SkyLine-X پلاتفورماسىنا كوشۋ اەروناۆيگاتسيالىق ينفراقۇرىلىمدى كەشەندى جاڭارتۋدى كوزدەيدى. بۇل جابدىقتاردى جاڭعىرتۋدى, اۋە كەڭىستىگىن اۆتوماتتاندىرىلعان مونيتورينگتەۋدى, مارشرۋتتاردى دالىرەك بولجاۋدى جانە ديسپەتچەرلىك ورتالىقتار اراسىنداعى ۇيلەستىرۋ ساپاسىن ارتتىرۋدى قامتيدى.
«قازاەروناۆيگاتسيا» رمك – قازاقستان رەسپۋبليكاسىنىڭ ازاماتتىق اۆياتسياسىنا اەروناۆيگاتسيالىق قىزمەت كورسەتەتىن مەملەكەتتىك كاسىپورىن. كاسىپورىن ەلدىڭ اۆياتسيا سالاسىنداعى جۇيە قۇراۋشى ۇيىم جانە اۋە قوزعالىسىن باسقارۋعا, ۇشۋ قاۋىپسىزدىگىن قامتاماسىز ەتۋگە, حالىقارالىق ستاندارتتاردىڭ ساقتالۋىنا جانە قازاقستاننىڭ اۋە كەڭىستىگىنىڭ تۇراقتى جۇمىسىنا جاۋاپ بەرەدى.
