جاڭا نىساننىڭ اشىلۋ راسىمىنە وبلىس اكىمىنىڭ ورىنباسارى دياس ەسداۋلەتوۆ, ءماجىلىس دەپۋتاتى دانيار قاسقاراۋوۆ, «ZHERSU» يپك باقىلاۋ كەڭەسىنىڭ توراعاسى, كاسىپكەر ءارى مەتسەنات باۋىرجان وسپانوۆ, سونداي-اق وليمپيادا چەمپيوندارى ەرماحان ىبىرايىموۆ, يۋري مەلنيچەنكو, نۇرباقىت تەڭىزباەۆ, نۇربەك ورالباي, دەمەۋ جادىراەۆ, نازىم قىزايباي, نۇرماحان تىناليەۆ جانە اۋىل تۇرعىندارى قاتىستى.
سالتاناتتى جيىندا ءسوز سويلەگەن دياس ەسداۋلەتوۆ ءوڭىر اكىمى اتىنان جۇرتشىلىقتى جاڭا سپورت نىسانىنىڭ اشىلۋىمەن قۇتتىقتاپ, سپورت سالاسىن دامىتۋعا باعىتتالعان جۇمىستارعا توقتالدى.
«مەملەكەت باسشىسىنىڭ بۇقارالىق سپورتتى دامىتۋ جونىندەگى تاپسىرماسىنا سايكەس, وبلىس قۇرىلعاننان بەرى جەتىسۋدا 32 جاڭا سپورت نىسانى سالىندى, ۇشەۋى كۇردەلى جوندەۋدەن ءوتتى. جىل سوڭىنا دەيىن تاعى ءۇش سپورت نىسانىن ىسكە قوسۋ جوسپارلانىپ وتىر. لەپسى اۋىلىندا اشىلعان كەشەن وقۋ-جاتتىعۋ بازاسى مەن جاتاقحاناسى ءبىر اۋماقتا ورنالاسقان تولىققاندى سپورت ورتالىعى. بۇل اۋىل جاستارىنا جاڭا مۇمكىندىك بەرىپ, بولاشاق چەمپيونداردىڭ قالىپتاسۋىنا جول اشادى دەپ سەنەمىز», دەدى ول.
سپورت كەشەنى 160 ادامعا, ال جاتاقحانا 244 ورىنعا شاقتالعان. نىسان بيۋدجەت قاراجاتى ەسەبىنەن سالىنعان. سونىمەن قاتار «ZHERSU» يپك تاراپىنان جوباعا كىرمەگەن قوسىمشا سپورت جابدىقتارىن ساتىپ الۋعا دەمەۋشىلىك كومەك كورسەتىلگەن. قازىرگى تاڭدا مۇندا گرەك-ريم جانە ەركىن كۇرەس, بوكس, دزيۋدو, شاڭعى سپورت تۇرلەرى بويىنشا سەكتسيالار جۇمىس ىستەپ تۇر. بۇل سەكتسيالاردا 250 بالا جاتتىعادى. ازىرگە 10 جاتتىقتىرۋشى ەڭبەك ەتسە, الداعى ۋاقىتتا ماماندار سانى ارتپاق. سونىمەن بىرگە فۋتبول, ۆولەيبول جانە باسكەتبول سەكتسيالارىن اشۋ جوسپارلانعان.
كوپفۋنكتسيونالدى سپورت كەشەنى ءتورت نەگىزگى بلوكتان تۇرادى. وندا ءتاتاميى بار كۇرەس زالى, جەكپە-جەككە ارنالعان ارنايى زال, ۆولەيبول مەن باسكەتبولعا ارنالعان ويىن زالدارى, ترەناجەر زالى, دۋش جانە كيىم اۋىستىراتىن بولمەلەر, دارىگەر, پسيحولوگ, ماسساج كابينەتتەرى, كونفەرەنتس-زال, اسحانا, سونداي-اق اكىمشىلىك جانە قوسالقى بولمەلەر تولىق قاراستىرىلعان.
اۋىل تۇرعىنى اسقار حاۆكەي جاڭا سپورت مەكتەبىنىڭ اشىلۋىنا ريزاشىلىعىن ءبىلدىردى. ونىڭ ايتۋىنشا, كەشەندە بالالاردىڭ سپورتپەن شۇعىلدانۋىنا جانە دەنساۋلىعىن نىعايتۋىنا بارلىق جاعداي جاسالعان.
ال جاس سپورتشى جانات كەنجەباي ۇلى جاڭا جاتتىعۋ زالىنىڭ العاشقى كەلۋشىلەرىنىڭ ءبىرى بولعانىن اتاپ ءوتتى. ول بۇرىن دزيۋدومەن اۋىل مەكتەبىندە اينالىسقانىن, ەندى جاڭا كەشەننىڭ مۇمكىندىگى مول ەكەنىن ايتتى.
وبلىس اكىمدىگىنىڭ مالىمەتىنشە, بۇگىندە جەتىسۋدىڭ قالا جانە اۋدان سپورت مەكتەپتەرىندە 23 مىڭنان استام بالا مەن ءجاسوسپىرىم سپورتتىڭ 61 تۇرىمەن شۇعىلدانادى. ال ءوڭىر حالقىنىڭ 42 پايىزى دەنە شىنىقتىرۋمەن جانە سپورتپەن تۇراقتى اينالىسادى.
