جەكە جەتىستىكتەر مەن تۇراقتىلىق جىلى
«2025 جىل ءسىز ءۇشىن قانداي جىل بولدى؟» دەگەن العاشقى سۇراققا رەسپوندەنتتەردىڭ ءبىرازى ويلانىپ جاۋاپ بەرگەن. بۇل كۇندەلىكتى ءومىردىڭ قارقىنى اياسىندا جىلدىڭ تەك سىن-قاتەرلەرمەن عانا ەمەس, سونىمەن قاتار جەتىستىكتەرمەن دە سيپاتتالاتىنىن ءاردايىم بىردەن اڭعارۋ مۇمكىن ەمەستىگىن ايعاقتايدى. سونىمەن قاتار, ساۋالناما قورىتىندىلارى وڭ باعالاردىڭ تەرىس پىكىرلەردەن 3,5 ەسە باسىم ەكەنىن كورسەتتى. اتاپ ايتقاندا, رەسپوندەنتتەردىڭ تەك 11%-ى 2025 جىلدى ءساتسىز دەپ باعالاسا, 37%-ى ونى تابىستى جىل رەتىندە اتاعان. رەسپوندەنتتەردىڭ باسىم بولىگى (52%) جىلدى ايقىن وڭ نەمەسە تەرىس ۇردىستەردىڭ باسىمدىعى بايقالماعان, جالپى تۇراقتى كەزەڭ رەتىندە سيپاتتاعان.
2025 جىلعى جەتىستىكتەر تۋرالى ءسوز قوزعاعاندا, قازاقستاندىقتار ەڭ الدىمەن سپورت, تەحنولوگيالار مەن تسيفرلاندىرۋ, كينويندۋستريانى دامىتۋ, ونەركاسىپ, سونداي-اق مەكتەپتەر, اۋرۋحانالار جانە وزگە دە الەۋمەتتىك نىسانداردىڭ سالىنۋى سياقتى سالالاردى اتاپ وتكەن.
ال رەسپوندەنتتەرگە 2025 جىلدىڭ ەڭ جارقىن ءارى جاعىمدى وقيعالارىن اتاۋ ۇسىنىلعاندا, ەڭ كوپ اتالعاندارى مىنالار بولدى:
- «قايرات» – «رەال مادريد» اراسىنداعى تاريحي ماتچ جانە سپورتشىلارىمىزدىڭ وزگە دە جەتىستىكتەرى,
- الەمدىك جۇلدىزداردىڭ كونتسەرتتەرى (J Lo, Backstreet Boys) جانە ءتۇرلى مەرەيتويلىق شارالاردى اتاپ ءوتۋ (ابايدىڭ 180 جىلدىعى, جەڭىستىڭ 80 جىلدىعى, كونستيتۋتسيانىڭ 30 جىلدىعى جانە باسقالارى),
- جاڭا مەكتەپتەر مەن اۋرۋحانالاردىڭ اشىلۋى, ينفراقۇرىلىمدى جاقسارتۋ (جولدار, قالالىق اباتتاندىرۋ جانە ت.ب.),
- جاساندى ينتەللەكت سالاسىنداعى ءىرى جەتىستىكتەر (Alem.ai, سۋپەركومپيۋتەر, Higgsfield AI),
- پرەزيدەنتتىڭ حالىقارالىق دەڭگەيدەگى كەزدەسۋلەرى (دونالد ترامپ, سي تسزينپين جانە ت.ب.).
ساۋالناما قورىتىندىسى وڭ وقيعالار ەلدىڭ ءبىلىم بەرۋ, دەنساۋلىق ساقتاۋ, ەكولوگيا جانە تەحنولوگيالار سياقتى نەگىزگى سالالارىندا دا بار ەكەنىن كورسەتەدى.
وسى تۇرعىدا ەلدىڭ دامۋ باعىتىن قولداۋ زەرتتەۋ ناتيجەلەرىندەگى ناقتى دەرەكتەرمەن دە راستالادى:
ەل ازاماتتارىنىڭ 71%-ى ەلدىڭ دۇرىس باعىتتا دامىپ كەلە جاتقانىن اتاپ ءوتتى. بۇل دەرەك جىلداعى وقيعالاردى كوپشىلىكتىڭ ەلدىڭ تۇراقتى دامۋى مەن مەملەكەتتىك ساياساتتىڭ تۇراقتىلىعىمەن بايلانىستىراتىنىن بايقاتتى.
قازاقستان حالقىنىڭ 77%-ى پرەزيدەنتتىڭ قىزمەتىن قولدايتىنىن ءبىلدىردى. قولداۋدىڭ وسىنداي جوعارى دەڭگەيى پرەزيدەنتتى ەلدىڭ دامۋىنىڭ دۇرىس باعىتىن ايقىندايتىن كوشباسشى رەتىندە قابىلدايتىنىن كورسەتەدى.
ەلدىڭ دامۋ باعىتىنا دەگەن سەنىمدىلىك پەن پرەزيدەنتكە بەرىلگەن جوعارى قولداۋ قوعامدا قازاقستاننىڭ الداعى دامۋ باعىتى جونىندە ءبىرتۇتاس كوزقاراستىڭ قالىپتاسقانىن ايقىندايدى.
