فوتو: istockphoto.com
«قازىرگى تاڭدا بارلىق بالالاردىڭ جاعدايى تۇراقتاندى. رەانيماتسيادا جاتقان ەكى بالا ءپروفيلدى توكسيكولوگيالىق بولىمگە اۋىستىرىلدى. قازىر ولاردىڭ ومىرىنە قاۋىپ جوق», دەدى الماتى قالاسىنداعى بالالار شۇعىل مەديتسينالىق جاردەم ورتالىعىنىڭ باس دارىگەرىنىڭ ورىنباسارى قۇرمەتبەك توحتار ۇلى.
ەستەرىڭىزگە سالا كەتەيىك, 11 جەلتوقساندا الماتى-2 تەمىرجول بەكەتىندە تابيعي گازدان ۋلانۋ دەرەگى تىركەلىپ, بارلىعى 52 ادامعا مەديتسينالىق كومەك كورسەتىلدى.
كۋاگەرلەردىڭ ايتۋىنشا, وقيعاعا گازبەن جۇمىس ىستەيتىن جىلىتقىشتان تۋىنداعان اقاۋ سەبەپ بولعان. ادامدار سۋىقتان جىلىنۋ ءۇشىن جىلىتقىشتىڭ جانىنا جينالعان, بىراق قىسقا ۋاقىت ىشىندە ولاردىڭ جاعدايى كۇرت ناشارلاعان.
ء«بىر ساتتە ءبىر بالا ەسىنەن تانىپ, ايقايلادى. مەن دە ءوزىمدى جامان سەزىندىم. باسىندا باسىم اينالىپ, ەسىمدى بىردەن جيناي المادىم. ءبىز پويىزدان شىققاننان كەيىن دە السىزدىك سەزىلدى», دەدى رومان مۇراتوۆ.
قازىر بالالار مەن ەرەسەكتەرگە مەديتسينالىق كومەك كورسەتىلىپ, زارداپ شەككەندەردىڭ جاعدايى باقىلاۋعا الىنعان. بارلىق جاعدايدى ءتيىستى ورگاندار جان-جاقتى تەكسەرىپ جاتىر.
