اتاپ ايتقاندا, 16–17 جەلتوقسان قارساڭىندا مەملەكەتتىك مەكەمەلەردە, قالا كىتاپحانالارى مەن ءبىلىم مەكەمەلەرىندە تاقىرىپتىق كەزدەسۋلەر, پاتريوتتىق, ادەبي-مۋزىكالىق كەشتەر, دوڭگەلەك ۇستەلدەر, تاريحي-تانىمدىق ساعاتتار, دارىستەر, ادەبي وقۋلار مەن باسقا دا ماڭىزدى وقيعالار لەگى باستالادى.
جىلداعى بۇلجىمايتىن داستۇرمەن رەسپۋبليكا الاڭىنداعى تاۋەلسىزدىك مونۋمەنتى مەن «تاۋەلسىزدىك تاڭى» ەسكەرتكىشىنە ءداستۇرلى گۇل قويۋ ءراسىمى ۇيىمداستىرىلادى. وعان قالا باسشىلىعى, ءماسليحات دەپۋتاتتارى, قوعامدىق كەڭەس مۇشەلەرى, 1986 جىلعى كوتەرىلىسكە قاتىسۋشىلار, ەتنومادەني بىرلەستىكتەر وكىلدەرى جانە جاستار قاتىسادى. ال 17 جەلتوقساندا قالانىڭ بارلىق 8 اۋدانىندا 1986 جىلى جەلتوقسان كوتەرىلىسىندە قازا بولعانداردى ەسكە الۋعا ارنالعان اس بەرىلەدى.
بۇدان بولەك, قالا بيلىگى جاستاردى ەلجاندى بولۋعا جەتەلەيتىن ءتورت مەملەكەتتىك الەۋمەتتىك جوبانى جۇزەگە اسىرىپ, قايىرىمدىلىق اكتسيالارىن, سپورتتىق تۋرنيرلەر, شىعارماشىلىق, پاتريوتتىق ءىس-شارالار مەن تاقىرىپتىق كونفەرەنتسيالار, بايقاۋلار وتكىزۋدى كوزدەپ وتىر. بۇل باستامالاردىڭ بارلىعى دا تاريحي جادتى ساقتاپ, تاۋەلسىزدىك ءۇشىن كۇرەسكەن بۋىننىڭ ەرلىگىنە قۇرمەت كورسەتىپ, وسى قۇندىلىقتاردى جاس ۇرپاققا دارىپتەۋگە باعىتتالعان.
وسى ورايدا الماتى قالاسىنىڭ اكىمى دارحان ساتىبالدى تاۋەلسىزدىك كۇنى جانە جەلتوقسان كوتەرىلىسىنىڭ 39 جىلدىعى قارساڭىندا 1986 جىلعى جەلتوقسانشىلارمەن كەزدەستى. اكىم الماتىنىڭ قوعامدىق ومىرىنە بەلسەنە ۇلەس قوسىپ جۇرگەن جەلتوقسانشىلاردىڭ پاتريوتتىق ۇستانىمىن, ازاماتتىق پوزيتسياسى مەن ۇلتتىق قۇندىلىقتارعا بەرىكتىگىنە قوشەمەت كورسەتتى.
كەزدەسۋ بارىسىندا كوپتى تولعاندىرعان الەۋمەتتىك-تۇرمىستىق ماسەلەلەر كوتەرىلىپ, قوسىمشا الەۋمەتتىك قولداۋ شارالارى تالقىلاندى. سونىمەن قاتار جەلتوقسان كوتەرىلىسىنىڭ 40 جىلدىعىنا وراي قاتىسۋشىلاردىڭ ۇسىنىستارىن ەسكەرە وتىرىپ, كەشەندى ەسكە الۋ ءىس-شارالارىنىڭ جوسپارى ازىرلەنبەك. اسىرەسە ۇلتتىق رۋحتى نىعايتۋعا, جاستاردى تاربيەلەۋگە باعىتتالعان تانىمدىق ءارى پاتريوتتىق باستامالارعا باسىمدىق بەرىلەدى.
كەزدەسۋ سوڭىندا دارحان ساتىبالدى مەملەكەت باسشىسى قاسىم-جومارت توقاەۆتىڭ باستامالارىن قولداپ جۇرگەنى جانە ازاماتتىق قوعامدى دامىتۋعا قوسقان ەلەۋلى ۇلەسى ءۇشىن جەلتوقسانشىلارعا رياسىز العىسىن ءبىلدىردى. اكىم اتاپ وتكەندەي, قالا اكىمدىگى, ءماسليحات دەپۋتاتتارى مەن قوعامدىق ۇيىمدار جۇرگىزىلىپ جاتقان رەفورمالاردى جۇزەگە اسىرۋ جانە قالانى دامىتۋ بويىنشا بىرلەسكەن جۇمىستى جالعاستىرادى.
الماتى
