سۋرەت: ernur.kz
ءبىز سولاردىڭ ىشىنەن ءپان وليمپيادالارى مەن كەيبىر ماڭىزدى ءبىلىم سايىستارىن عانا قالدىرىپ, باسقاسىن توقتاتۋ كەرەك دەپ ەسەپتەيمىز.
بۇگىندە ءداستۇرلى تۇردە وتەتىن اباي وقۋى, قادىر وقۋى, مۇقاعالي وقۋى, ماحامبەت وقۋى سياقتىلار از بولعانداي, جىل سايىن ءبىر وقۋ قوسىلاتىن بولدى. وقۋ-اعارتۋ مينيسترلىگى سونىڭ بارلىعىن ەنگىزە بەرەدى.
جاتتاۋ ارقىلى بالانىڭ جادىسى جەتىلىپ, ەسكە ساقتاۋ قابىلەتى كۇشەيەتىنى راس. ءبىزدىڭ وقۋشى كەزىمىزدە جاتتاۋ كوپ بولدى. سول كەزدە جاتتاعان ولەڭدەردىڭ جارتىسى ءالى ەسىمدە. بىراق بۇرىن ءبارى جۇيەلى, رەتىمەن بولدى. قازىرگىدەي اينالدىرعان 1-2 اپتادا 100-150 ولەڭ جاتتاتۋ بولعان ەمەس.
ءتۇرلى ادەبي وقۋلار بالانىڭ جۇيكەسىنە زور سالماق ەكەنىن دە ەسەپتەپ جاتقان ەشكىم جوق. ءبىرىنشى ورىن ەڭ كوپ جاتتاعانعا بەرىلەتىن بولعاسىن, كەيبىر وقۋشى 100-150 ولەڭ جاتتاپ جاتادى. ال سونىڭ ىشىندە بالانىڭ ۇعىمىنا اۋىر تۇستارى دا بولادى.
ادەبي وقۋدى وتكىزۋدىڭ مازمۇنى مەن فورماسىنا دا وزگەرىس كەرەك. ويتكەنى ءجۇز ولەڭ جاتتاعانىمەن, سونىڭ ءبىرىنىڭ يدەيالىق مازمۇنىن تولىق ءتۇسىنىپ, تالداي المايتىنى جاسىرىن ەمەس. سوندىقتان قۇر جاتتاۋعا ەمەس, ءتۇسىنۋ مەن تالداۋعا ءمان بەرىلگەنى دۇرىس.
ال قازىر بۇعان جەتە كوڭىل ءبولىنىپ جاتقان جوق. مۇعالىم جاتتاعىش بالا بولسا, ءتۇرلى ادەبي وقۋلارعا قاتىستىرا بەرەدى. كەيىن سول وقۋشى ءتىل-ادەبيەت مامانى بولسا جاقسى عوي. كوبىنەسە قىرۋار ۋاقىتىن شىعىنداپ جاتتاعان ولەڭىنىڭ پايداسىن كورمەي, باسقا سالانى تاڭدايدى. سوندىقتان وقۋشىنى ءوزىنىڭ بولاشاق ماماندىعىمەن بايلانىستى وليمپيادالار مەن ءبىلىم سايىستارىنا قاتىستىرعان ءجون. ماسەلەن, ءوزىم كەلەشەكتە تاريحشى بولعىسى كەلمەيتىن وقۋشىنى وليمپياداعا بەيىمدەگەن ەمەسپىن.
ءبىز سونىمەن ادەبي وقۋدى كوبەيتە بەرمەي, ءبىر بويىنان بارلىعى تابىلاتىن اباي وقۋىن عانا قالدىرسا دا جەتكىلىكتى دەپ ەسەپتەيمىز. سەبەبى وقۋشىلار سان ءتۇرلى ادەبي وقۋعا قاتىسىپ ءجۇرىپ, كوپ ساباق جىبەرەدى دە, وقۋ ۇلگەرىمى تومەندەيدى.
بۇل تەك مەنىڭ جەكە تۇجىرىمىم ەمەس. «TIMSS-2023» حالىقارالىق زەرتتەۋى دە ساباقتى ءجيى جىبەرەتىن وقۋشىلاردىڭ ساباقتان قالمايتىن وقۋشىعا قاراعاندا وقۋ ۇلگەرىمى تومەندەيتىنىن كورسەتىپ وتىر. بۇعان قوسا, ءبىر جىلدا بىرنەشە ادەبي وقۋعا قاتىساتىن وقۋشىنىڭ جولداعى ءومىر قاۋىپسىزدىگى دە وزەكتى.
سەرىك زياتوۆ,
تاريح ءپانىنىڭ مۇعالىمى
باتىس قازاقستان وبلىسى
