ماڭعىستاۋ وبلىستىق كوپبەيىندى اۋرۋحاناسىنىڭ ءباسپاسوز قىزمەتىنىڭ حابارلاۋىنشا, وبلىستىق كوپبەيىندى اۋرۋحاناسىندا 45 جاستاعى ەر ادامنىڭ مي ءولىمى انىقتالعان سوڭ, مارقۇمنىڭ تۋىستارىمەن وبلىس بويىنشا ترانسپلانتاتسيا جونىندەگى وڭىرلىك ۇيلەستىرۋشى ينديرا امانقوسقىزى مەن ستاتسيونارلىق كوورديناتور ءىلياس يۋسۋپ ۇلى قاجەتتى ءتۇسىندىرۋ جۇمىستارىن جۇرگىزگەن.
«جاقىندارى باتىلدىق تانىتىپ, دونورلىققا كەلىسىم بەرگەن سوڭ اۋرۋحانا بازاسىندا دەنساۋلىق ساقتاۋ مينيسترلىگىنىڭ ترانسپلانتاتتاۋدى جانە جوعارى تەحنولوگيالىق مەديتسينالىق قىزمەتتەردى ۇيلەستىرۋ جونىندەگى رەسپۋبليكالىق ورتالىعى ماماندارىمەن بىرلەسىپ جۇرەك الۋ وپەراتسياسى جاسالدى», دەپ حابارلايدى وبلىستىق كوپبەيىندى اۋرۋحاناسىنىڭ ءباسپاسوز قىزمەتى.
وپەراتسيانى دەنساۋلىق ساقتاۋ مينيسترلىگىنىڭ ترانسپلانتاتسيا ورتالىعىنىڭ ماماندارى ءساتتى جۇزەگە اسىرۋى ناتيجەسىندە دونوردىڭ جۇرەگى ۇزاق ۋاقىت كۇتۋ پاراعىندا تۇرعان ناۋقاسقا ءساتتى ترانسپلانتاتسيالانعان.
– بۇل – وڭىرىمىزدەگى ەرەكشە ماڭىزدى وقيعا. دونورلىق مي ءولىمىنىڭ رەسمي راستالۋىنان كەيىن بارلىق مەديتسينالىق راسىمدەر زاڭدى تۇردە ورىندالدى. ءبىز دونورلىققا شەشىم قابىلداعان وتباسىنا شىنايى قۇرمەت كورسەتەمىز, ادام ءومىرىن قۇتقارۋعا باعىتتالعان ىزگى قادامدارى ءۇشىن العىس ايتامىز, – دەدى وبلىستىق كوپبەيىندى اۋرۋحانا ديرەكتورىنىڭ مىندەتىن اتقارۋشى بەرىك كاۋنوۆ.
وبلىس بويىنشا ترانسپلانتاتسيا جونىندەگى وڭىرلىك ۇيلەستىرۋشى ينديرا امانقوسقىزىنىڭ ايتۋىنشا, قازىر جالپى كۇتۋ پاراعىندا 175 ماڭعىستاۋلىق بار. ونىڭ ىشىندە 165 ەرەسەك, 3 بالا – بۇيرەك, 4 ەرەسەك, 1 بالا – باۋىر, 2 ەرەسەك جۇرەك ترانسپلانتاتسياسىنا كەزەكتە تۇر.
ماڭعىستاۋ وبلىسى
