كارديولوگيا جانە ىشكى اۋرۋلار عىلىمي-زەرتتەۋ ينستيتۋتى CRT-P Amvia Sky قۇرىلعىسىن ورناتۋ ارقىلى جۇرەكتى فيزيولوگيالىق ستيمۋلياتسيالاۋ جونىندەگى شەبەرلىك ساباعىن وتكىزدى. قۇرىلعى كادىمگى ستاندارتتى كارديوستيمۋلياتورلاردان ەڭ الدىمەن جۇرەك ىرعاعى وزگەرگىشتىگى تابيعي ىرعاققا بارىنشا ۇقساستىعىمەن ەرەكشەلەنەدى. ستيمۋلياتسيا الگوريتمى فيزيكالىق ءارى پسيحوەموتسيونالدىق جۇكتەمەگە جاۋاپ بەرىپ, دەنساۋلىقتى جاقسارتىپ, قولايسىزدىقتىڭ بولماۋىنا ىقپال ەتەدى.
وپەراتسيانى اريتمولوگيا قىزمەتىنىڭ اعا ورديناتورى اسىلحان پاريمبەكوۆ پولشانىڭ كراكوۆ قالاسىنان كەلگەن پروفەسسور كشيشتوف بوچاردىڭ قاتىسۋىمەن جاسادى. جۇرەكشەلەر ابلياتسياسى مەن كارديوحيرۋرگيالىق ارالاسۋلاردى وتكەرگەن, جۇرەك قارىنشالارىنىڭ جيىرىلۋ بىركەلكىلىگى بۇزىلىپ, جۇرەك قىزمەتى جەتكىلىكسىزدىگى, سول جاق قارىنشانىڭ جيىرىلۋ فراكتسياسى تومەندەگەن جاعدايدا پاتسيەنتتەرگە ارنايى ءۇش كامەرالى كارديوستيمۋلياتورلار (CRT-P) قاجەت. شەبەرلىك ساباعىنا قاتىسقان حيرۋرۋگتەر كارديورەسينحرونداۋ تەراپياسى قاعيداتتارىمەن تانىستى. تەراپيانىڭ كلينيكالىق تاجىريبەدە قولدانىلۋى, جۇرەكتىڭ وتكىزگىشتىك جۇيەسى ايماعىنا يمپلانتاتسيا جاساۋ كورسەتىلدى.
– شەبەرلىك ساباقتارى ماماندارىمىزدىڭ مەديتسينانىڭ سوڭعى جەتىستىكتەرىنەن حاباردار بولۋىنا, جاڭا ەمدەۋ ادىستەرى مەن تەحنولوگيالاردى مەڭگەرىپ, كورسەتىلەتىن مەديتسينالىق كومەكتىڭ ساپاسىن ارتتىرىپ, كاسىبي وسۋىنە مۇمكىندىك بەرەدى. تاجىريبە الماسۋ دارىگەرلەردىڭ كاسىبي قىزمەتكە قاجەتتى بىلىمدەرىن, بىلىكتىلىك پەن داعدىلارىن جەتىلدىرۋگە ىقپال ەتەدى, – دەدى ينستيتۋتتىڭ باسقارما توراعاسى رۇستەم تولەۋتاەۆ.
ا.پاريمبەكوۆتىڭ ايتۋىنشا, ءۇش كامەرالى CRT-P كارديوستيمۋلياتورلارى قارىنشالاردىڭ سينحروندى جۇمىسىن قامتاماسىز ەتىپ, جۇرەكتىڭ قان ايداۋ قىزمەتى مەن ۇزدىكسىز جۇمىسىن جاقسارتادى. كارديورەسينحرونداۋ تەراپياسى جۇرەك قىزمەتىنىڭ جەتكىلىكسىزدىگىن ەمدەۋدىڭ ماڭىزدى كومپونەنتى بولىپ قالا بەرەدى, ال ءۇش كامەرالى قۇرىلعىلاردى قولدانۋ ۇزاقمەرزىمدى كلينيكالىق ناتيجەلەردى جاقسارتادى.
– جۇرەكتىڭ وتكىزگىشتىك جۇيەسىنە باعىتتالعان CRT-P يمپلانتاتسياسى جۇرەك قىزمەتى جەتكىلىكسىزدىگى بار ناۋقاستاردا ۇزاقمەرزىمدى ناتيجەلەردى جاقسارتۋعا جاڭا مۇمكىندىك اشادى, – دەيدى جۇرەك ىرعاعى مەن وتكىزگىشتىگى بۇزىلىستارى بولىمشەسىنىڭ مەڭگەرۋشىسى باعدات احىت.
ەكى وپەراتسيا دا ءساتتى ءوتتى. ەندى وزىق كارديوستيمۋلياتور ورناتىلعان ناۋقاستار ەل قاتارلى ءومىر ءسۇرىپ, قالاعان ىسىمەن, ءتىپتى سپورتپەن اينالىسىپ, ساياحاتتاي الادى.
الماتى
