ماماننىڭ مالىمدەۋىنشە, بىرىڭعاي ديستريبيۋتور ارقىلى 92 ەمدەۋ مەكەمەسى دارىلىك پرەپاراتپەن قامتىلدى. بيىلعا 1018 اتاۋمەن دارىلەر مەن مەديتسينالىق قۇرال-جابدىقتارعا تاپسىرىس بەرىلگەن. 79 ستاتسيونارلىق ەمدەۋ ۇيىمىنا 18 ملرد تەڭگەگە 1005 اتاۋلى ءدارى مەن مەديتسينالىق بۇيىمدار ساتىپ الىندى. امبۋلاتوريالىق ەمدەۋ مەكەمەلەرىندە 15 ملرد تەڭگەگە ءدارى-دارمەك قورى جاساقتالدى. بارلىق مەديتسينالىق پرەپاراتتار جەلتوقسان ايىندا قويمالارعا جەتكىزىپ, كەلەر جىلدىڭ باسىنان ەمحانا, اۋرۋحانالارعا تاراتىلادى. 2027 جىلعا مەملەكەتتىك ساتىپ الۋ كەلەر جىلدىڭ مامىرىنان باستاپ جۇرگىزىلەدى.
ۇ.نۇعمانوۆا ءوز سوزىندە ىركىلىپ قالعان تەگىن دارىلەر قاتاڭ باقىلاۋدا بولاتىنىن, ءدارى-دارمەككە سۇرانىس تۋىنداسا ءبىر ۇيىمنان ەكىنشى ۇيىمعا, ءتىپتى وڭىرلەردەن تاسىمالداناتىنىن اتاپ ءوتتى. بۇل شارا ايماقتا دارىلىك زاتقا تاپشىلىق بولدىرماس ءۇشىن قاجەت. دەنساۋلىق ساقتاۋ ءمينيسترىنىڭ 2022 جىلعى №75 بۇيرىعىنا سايكەس قان قىسىمى, قانت ديابەتى, تالما اۋرۋى, برونحيالدى استما سەكىلدى دەرتپەن ەسەپتە تۇرعاندارعا, بۇيرەك, باۋىر الماستىرعاندارعا دارىلەر تەگىن بەرىلەدى. الايدا مينيستر بۇيرىعىنا وزگەرىس ەنگىزىلىپ, كەلەر جىلدان باستاپ قانت ديابەتىمەن اۋىراتىندار ءدارى-دارمەكتى مىندەتتى الەۋمەتتىك مەديتسينالىق ساقتاندىرۋ جۇيەسى ارقىلى الاتىن بولدى. تەك بالالار مەن جۇكتى ايەلدەر سەكىلدى الەۋمەتتىك قورعالماعان توپتاعى ازاماتتار عانا سۋسامىر دەرتىنىڭ دارىلەرىن تەگىن الىپ وتىرادى.
سونداي-اق مامان مەديتسينالىق پرەپاراتتاردى مىندەتتى تاڭبالاۋ ءىس-شاراسى دارىلىك زاتتاردىڭ قارا نارىققا ءوتىپ كەتۋىنىڭ جولىن ءبىرجولاتا قيعانىن مالىمدەدى. وتكەن جىلدىڭ شىلدەسىنەن باستاپ ەنگىزىلگەن بۇل تالاپ دارىلىك پرەپاراتتاردىڭ نارىقتاعى قوزعالىسىنا باقىلاۋدى كۇشەيتە ءتۇستى. «سق-فارماتسيا» وكىلىنىڭ ايتۋىنشا, مەملەكەتتىك ساتىپ الۋ تەك ەلىمىزدە رەسمي تىركەلگەن دارىلەرگە عانا جۇرگىزىلەدى. سوندىقتان ونىڭ قاۋىپسىزدىگى مەن ساپاسىنا ەشقانداي كۇدىك بولماۋ كەرەك. مەملەكەتتىك ساتىپ الۋدا جەرگىلىكتى دارىلىك پرەپارات وندىرەتىن كومپانيالار مۇددەسى كوبىرەك ەسكەرىلەدى. بۇگىندە تەگىن دارىلىك زاتتار ىشىندەگى وتاندىق ءونىمنىڭ ۇلەسى – 50%. ۇ.نۇعمانوۆا پرەزيدەنت تاپسىرماسىنا سايكەس ونىڭ ۇلەسىن كەلەشەكتە 80 پايىزعا جەتكىزۋ جوسپاردا بار ەكەنىن ايتتى.
شىمكەنتتە بۇل جوسپاردى ىسكە اسىرۋعا مۇمكىندىك جەتەدى. ويتكەنى قالادا ەكى بىردەي ءىرى كاسىپورىن, «حيمفارم», «ەكوفارم ينتەرنەيشنل» كومپانيالارى ورنالاسقان. «حيمفارم» بيىلعى 9 ايدىڭ ىشىندە 54 ملرد تەڭگەنىڭ ءدارى-دارمەگىن وندىرگەن. «ەكوفارم ينتەرنەيشنل» 30 ملن دوللارعا 15 بيزنەس-جوبانى جۇزەگە اسىردى. بەس وندىرىستىك نىساندى ىسكە قوستى. سونىڭ ناتيجەسىندە قازىردە كاسىپورىن بەس جۇزدەن استام ادامدى جۇمىسپەن قامتىپ, بەس مىڭ اتاۋمەن مەديتسينالىق بۇيىمدار شىعارىپ وتىر. ودان بولەك, شاھاردا قۇرعاق قان مەن بيولوگيالىق قوسپالار, ينسۋلين ينەسى مەن ۆيرۋستى انىقتايتىن تەست تالدامالارى, ساپالى مەديتسينالىق تاڭعىشتار, ءتۇرلى يمپلانتتار مەن باسقا دا ونىمدەر وندىرىلەدى. ءدارى-دارمەك ءوندىرىسىن ىلگەرىلەتۋ مەملەكەت باسشىسىنىڭ وتاندىق فارماتسەۆتيكانى دامىتۋ تۋرالى بەرىلگەن تاپسىرماسىن ورىنداۋ اياسىندا ىسكە اسىپ وتىر.
جوعارىدا اتالعان ءىس-شارانىڭ №6 ەمحانادا ءوتۋى تەگىن ەمەس. سەبەبى ول قالاداعى ەڭ ۇلگىلى ەمدەۋ مەكەمەسى سانالادى. وسى ەمحانادا 20 جىل ەسەپتە تۇرعان ءزىليحا وماروۆا بارلىق قاجەتتى ءدارى-دارمەكتى تەگىن الاتىنىن جەتكىزدى. ونىڭ ايتۋىنشا, ەمحانادا دارىگەرلەردىڭ ءبارى دە بىلىكتى ماماندار. سوندىقتان وسى كۇنگە دەيىن جەكە كلينيكالارعا بارىپ قارالىپ كورمەپتى.
دەنساۋلىق ساقتاۋ مينيسترلىگى وكىلدەرىنىڭ قاتىسۋىمەن №6 ەمحانادا دامۋ جانە ەرتە ارالاسۋ ورتالىعى اشىلعان. وندا 3 ايلىق پەن 6 جاسقا دەيىن بالالارعا سكرينينگتىك تەكسەرۋلەر جۇرگىزىلەدى. ورتالىق مەڭگەرۋشىسى قارلىعاش ماماداليەۆانىڭ ايتۋىنشا, بۇگىندە بالالار اراسىندا ءتىلدىڭ كەش شىعۋى ءجيى كەزدەسەتىن جاعداي ەكەن. وعان ەڭ بىرىنشىدەن تەلەفون كىنالى بولسا, ەكىنشىدەن اتا-انالار بالالارىمەن وتىرىپ اڭگىمەلەسپەيدى, جاقىن قارىم-قاتىناستا بولمايدى دەيدى مامان.
شىمكەنت
