ونىڭ ايتۋىنشا, بىرقاتار ناقتى شارا وڭ ناتيجەگە قول جەتكىزۋگە ىقپال ەتكەن. اتاپ ايتقاندا, ۆەتەرينارلىق ينفراقۇرىلىمدى جاڭعىرتۋ, ەسەپ جۇرگىزۋ ۇدەرىستەرىن تسيفرلاندىرۋ, وتاندىق ۆاكتسينالار ءوندىرىسىن كەڭەيتۋ جانە ماتەريالدىق-تەحنيكالىق بازانى نىعايتۋ. بۇل باعىتتاردىڭ بارلىعى اوك دامۋىنىڭ 2030 جىلعا دەيىنگى تۇجىرىمداماسىنا ەنگىزىلگەن.
ناقتى مالىمەت بويىنشا, ەلدە 9,1 ملن باس ءىرى قارا, 23,7 ملن باس ۇساق مال, 4,7 ملن جىلقى, 302 مىڭ تۇيە وسىرىلەدى. سونىمەن قاتار 569 مىڭ شوشقا بار. باقىلاۋ جانە الدىن الۋ شارالارىنىڭ كۇشەيۋى ەت ءوندىرىسىن 914 مىڭ تونناعا دەيىن ارتتىرۋعا, ال سيىر جانە قوي ەتى ەكسپورتىن 60,8 مىڭ تونناعا جەتكىزۋگە مۇمكىندىك بەردى.
قازاقستاندا دۇنيەجۇزىلىك جانۋارلار دەنساۋلىعى ۇيىمى (OIE) انىقتاعان 90-نان استام قاۋىپتى اۋرۋدىڭ 23-ىنە قارسى ۆاكتسيناتسيا جۇرگىزىلىپ جاتىر. جۇمىس ادىستەرىن جەتىلدىرۋ ماقساتىندا ددسۇ, فاو جانە OIE ساراپشىلارىنىڭ قاتىسۋىمەن جۇمىس توبى قۇرىلدى.
2024 جىلدان باستاپ سالادا يمپورتتى الماستىرۋ ساياساتى بەلسەندى جۇزەگە اسىرىلىپ جاتىر. وتاندىق ۆاكتسينالاردىڭ ۇلەسى 34%-دان 78%-عا ءوستى. قازىر ساتىپ الىناتىن 22 ۆاكتسينانىڭ 18-ءى قازاقستاندا وندىرىلەدى.
ماتەريالدىق-تەحنيكالىق بازانى نىعايتۋ اياسىندا ەكى جىلدا 401 ۆەتەرينارلىق مەكەمە سالىندى, 892 ارنايى كولىك ساتىپ الىندى. سونىمەن قاتار 2026 - 2027 جىلدارى ۆەتستانتسيالار, ۆەتپۋنكتتەر جانە مال ولەكسەلەرىن كومۋ ورىندارىن سالۋعا 66,2 ملرد تەڭگە قاراستىرىلعان.
لابوراتوريالىق بازانى كۇشەيتۋ ماقساتىندا 9 سۇيىقتىق حروماتوگرافى ساتىپ الىندى. الداعى ۋاقىتتا تاعى 54 قوندىرعىمەن قامتاماسىز ەتۋ جوسپارلانعان. بۇل ەاەو-نىڭ ازىق-ت ۇلىك قاۋىپسىزدىگى جونىندەگى تالاپتارىنىڭ 94%-ىن ورىنداۋعا مۇمكىندىك بەرەدى.
شىعىس قازاقستان وبلىسىندا قىتاي ستاندارتتارى بويىنشا 38 زاماناۋي قۇرال-جابدىقپەن جابدىقتالعان لابوراتوريا اشىلدى. يسج (مالداردى ەسەپكە الۋ) جۇيەسى جاڭعىرتىلدى. ول جانۋارلاردى جانە ءونىمدى تولىق قاداعالاۋ مۇمكىندىگىن قامتاماسىز ەتەدى. جالعان تىركەۋدى بولدىرماۋ, ۆاكتسيناتسيالانعان جانۋارلاردى ءدارى مەرزىمى بىتكەنشە سويماۋ, مال بازارى ءمودۋلى, ەكسپورت كەزىندە كارانتيندى تسيفرلىق باقىلاۋ سياقتى فۋنكتسيالار ەنگىزىلدى.
ISZH-Mobile جانە TortTulik ءموبيلدى قوسىمشالارى ازىرلەندى. جۇيە قارجى مينيسترلىگىنىڭ قكد, حالىق بانكى, ەاەو سەرۆيستەرى جانە باسقا دا پلاتفورمالارمەن بىرىكتىرىلگەن.
قازاقستان ترانسشەكارالىق بىرنەشە اۋرۋ بويىنشا قاۋىپسىز ەل مارتەبەسىن ساقتاپ وتىر. ولاردىڭ قاتارىندا اۋسىلدىڭ كەي وڭىرلەرى (وڭتۇستىك-شىعىس), جىلقىنىڭ افريكالىق وباسى, سونداي-اق شوشقانىڭ كلاسسيكالىق جانە افريكالىق وباسى, قۇس تۇماۋى بار. سولتۇستىك-باتىس وڭىردە اۋسىلعا قارسى قاۋىپسىز ەل مارتەبەسىن الۋ ءۇشىن قۇجاتتار توپتاماسى ۇسىنىلدى.
2025 جىلعا قاراي 16 ۆەتەرينارلىق سەرتيفيكات كەلىسىلدى. بۇل ءونىمدى 42 ەلگە ەكسپورتتاۋعا جول اشادى. ولاردىڭ ىشىندە ەو, ۇلىبريتانيا, قىتاي, يران, يراك, اقش جانە كانادا بار.
3 728 قازاقستاندىق كاسىپورىن باسقا ەلدەردىڭ تىزىلىمىنە ەنگىزىلدى.
– بارلىق شارا ەپيزووتيالىق قاۋىپسىزدىكتى قامتاماسىز ەتۋگە, ءونىم ساپاسىن ارتتىرۋعا جانە قازاقستاننىڭ حالىقارالىق نارىقتاعى ۇستانىمىن نىعايتۋعا باعىتتالعان, دەدى امانعالي بەردالين.
