فوتو: istockphoto.com
«بۇۇ جۇيەسىندە تەك سۋ ماسەلەسىمەن اينالىساتىن ارناۋلى قۇرىلىم جوق. بۇل تۇيتكىلدى تەز ارادا شەشكەن ءجون. قازاقستان حالىقارالىق سۋ ۇيىمىن قۇرۋدى ۇسىنادى. سول ارقىلى بۇۇ اياسىنداعى ءتۇرلى ۇيىمداردىڭ بارلىق مانداتىن ءبىر ماقساتقا جۇمىلدىرۋعا بولادى. UN-Water ۆەدومستۆوارالىق تەتىگىن بۇۇ-نىڭ تولىققاندى ارناۋلى اگەنتتىگىنە نەمەسە ۇيىمىنا اينالدىرۋ وڭتايلى شەشىم بولار ەدى. مۇنداي باستامانى ىسكە اسىرۋ بۇۇ-نىڭ ورنىقتى دامۋ ماقساتتارى مەن بارشا حالىقارالىق قوعامداستىقتىڭ مۇددەسىنە ساي كەلەدى. كەلەسى جىلى ءساۋىر ايىندا استانادا ايماقتىق ەكولوگيالىق سامميت وتەدى. اتالعان جيىندا قازاقستان جاھاندىق سۋ ۇيىمىن قۇرۋ تۋرالى حالىقارالىق كونسۋلتاتسيا پروتسەسىن باستاۋعا نيەتتى. ورتاق ساياسي ەرىك-جىگەردىڭ ارقاسىندا كۇن تارتىبىندەگى سۋدىڭ وزەكتى ماسەلەلەرى جۇيەلى تۇردە شەشىلە باستايتىنىنا سەنىمىم كامىل», دەدى مەملەكەت باسشىسى.
قازاقستان پرەزيدەنتى ءسوزىن قورىتىندىلاي كەلە, اشحاباد فورۋمى مۇددەلى مەملەكەتتەردىڭ جاسامپاز سەرىكتەستىگىن نىعايتۋعا جانە الەمدە ادىلەتتى ءتارتىپ قالىپتاستىرۋدى كوزدەيتىن حالىقارالىق كۇش-جىگەرگە تىڭ سەرپىن بەرەتىنىنە سەنىم ءبىلدىردى.
جيىندا تۇرىكمەنستان پرەزيدەنتى سەردار بەردىمۇحامەدوۆ, رەسەي پرەزيدەنتى ۆلاديمير پۋتين, تۇركيا پرەزيدەنتى رەجەپ تايپ ەردوعان, يران پرەزيدەنتى ماسۋد پەزەشكيان, ارمەنيا پرەزيدەنتى ۆااگن حاچاتۋريان, يراك پرەزيدەنتى ابدۋل لاتيف راشيد, قىرعىزستان پرەزيدەنتى سادىر جاپاروۆ, سان-تومە جانە پرينسيپي پرەزيدەنتى كارلۋش مانۋەل ۆيلا-نوۆا, تاجىكستان پرەزيدەنتى ەمومالي راحمون, وزبەكستان پرەزيدەنتى شاۆكات ميرزيوەۆ, ازەربايجان پرەمەر-ءمينيسترى الي اسادوۆ, گرۋزيا پرەمەر-ءمينيسترى يراكلي كوباحيدزە, پاكىستان پرەمەر-ءمينيسترى شاحباز شاريف, ميانما پرەمەر-ءمينيسترى نو سو, ەسۆاتيني پرەمەر-ءمينيسترى راسسەل دلاميني ءسوز سويلەدى.
ەسكە سالايىق, قاسىم-جومارت توقاەۆ اشحاباد قالاسىنداعى كونگرەسس ورتالىققا باردى. مەملەكەت باسشىسى حالىقارالىق بەيبىتشىلىك جانە سەنىم جىلىنا, حالىقارالىق بەيتاراپتىق كۇنى مەن تۇرىكمەنستاننىڭ تۇراقتى بەيتاراپتىعىنىڭ 30 جىلدىعىنا ارنالعان فورۋمعا قاتىستى. پرەزيدەنت فورۋمدا سويلەگەن سوزىندە بۇۇ باس اسسامبلەياسى قولداعان اشحابادتىڭ حالىقارالىق بەيبىتشىلىك جانە سەنىم جىلىن جاريالاۋ تۋرالى باستاماسى ەرەكشە مانگە يە بولعانىن جەتكىزدى.
