فوتو: istockphoto.com
قارجى مونيتورينگى اگەنتىگىنىڭ مالىمەتىنشە, كومپانيالار ەكى جىل بويى تۇرعىن ءۇي كەشەندەرىن قاجەتتى رۇقسات قۇجاتتارىنسىز, جوبالىق-سمەتالىق قۇجاتتاماسىز, مەملەكەتتىك ساراپتاما مەن اۆتورلىق قاداعالاۋسىز سالعان. سوعان قاراماستان, ينتەرنەت رەسۋرستارىندا پاتەرلەردى تومەن باعامەن جانە پايىزسىز ءبولىپ تولەۋ مۇمكىندىگىمەن جارنامالاپ وتىرعان.
ۋادە ەتىلگەن التى كوپقاباتتى ءۇيدىڭ ورنىنا «Irtysh Riverside» كەشەنىنەن تەك ءبىر عيماراتتىڭ قاڭقاسى عانا كوتەرىلگەن. بۇعان دەيىن كومپانيا زاڭسىز قۇرىلىس, رۇقساتسىز كاسىپكەرلىكپەن اينالىسۋ جانە نىسان سالۋ فاكتىلەرى بويىنشا ءۇش بىردەي اكىمشىلىك باپپەن جاۋاپقا تارتىلىپ, قۇرىلىستى توقتاتۋ تۋرالى شەشىم شىعارىلعان.
الايدا سوعان قاراماستان, كومپانيا باسشىلىعى ارەكەتىن جالعاستىرىپ, جاڭا ساتىپ الۋشىلاردى تارتقان.
«ناتيجەسىندە 64 ازاماتپەن جالعان برونداۋ شارتتارى جاسالعان. زاڭسىز تارتىلعان قاراجاتتىڭ جالپى سوماسى 1 ملرد تەڭگەدەن استى. تۇسكەن قاراجات وسكەمەن قالاسىنداعى باسقا دا بايلانىسى بار كومپانيالاردىڭ شوتتارىنا اۋدارىلىپ, وندا دا زاڭسىز قۇرىلىس جۇمىستارى جۇرگىزىلگەن», دەلىنگەن حابارلامادا.
كەلتىرىلگەن شىعىندى وتەۋ ماقساتىندا كۇدىكتىلەردىڭ مۇلكىنە شەكتەۋ قويىلدى – 2 پاتەر, 10 جەر تەلىمى, 6 اۆتوكولىك. ءىس ۇيىمداستىرۋشىسىنىڭ ءوزى قاماۋعا الىنعان.
