6 تامىز كۇنى رۋسلان بەردەنوۆكە وق اتقان ەرنار جيەمبايعا قاتىستى باستى سوت وتىرىس ءوتتى. تەرگەۋ بارىسىندا كۇدىكتى تىڭ دەرەكتەردى جاريا ەتتى. ونىڭ ايتۋىنشا, رۋسلان بەردەنوۆ ەرناردان ءوزىن ولتىرۋگە عابيت سىزدىقبەكوۆ تاپسىرىس بەردى دەپ ايتۋدى سۇراعان.
بۇل وقيعاعا قاتىستى شىمكەنت اكىمى «سىزدىقبەكوۆ بەردەنوۆكە قاستاندىق جاساۋعا تاپسىرىس بەردى» دەگەن سوزىنە قاتىستى بىلاي دەدى:
ء«ار ادام ءوز پىكىرىن ايتۋعا قۇقىلى. مەنىڭ بۇل ىسكە قاتىسىم بار دەگەن اڭگىمە – بوس قاۋەسەت, وزدەرىنىڭ ماسەلەسى. مەنىڭ وعان قانداي قاتىسىم بولۋى مۇمكىن؟ ارينە, ادام ءوزىن قورعاۋ ءۇشىن ءبارىن جاسايدى. ءىس اياقتالدى, سوت شەشىم شىعاردى, بۇل تاقىرىپتى قايتا-قايتا كوتەرۋدىڭ قاجەتى جوق دەپ ويلايمىن», دەدى سىزدىقبەكوۆ.
ول سونداي-اق جەلىدە تاراعان ءتۇرلى بولجامدار مەن اڭگىمەلەردەن حاباردار ەكەنىن ايتتى.
«كەيبىر تۇرعىندار «وسى ادام كەلگەندە (بەردەنوۆ تۋرالى – رەد.) قالا جارقىراپ شىعا كەلدى» دەپ جازعان. بىراق بۇل شىندىققا جاناسپايدى. ول كەزدە ول قىزمەتىنە كىرىسكەنىنە ءبىر اي دا تولماعان, جۇمىستىڭ جايىنا ەندى عانا قانىعىپ جاتقان. ودان كەيىن نە بولعانىن وزدەرىڭىز بىلەسىزدەر», دەدى اكىم.
سىزدىقبەكوۆتىڭ ايتۋىنشا, بەردەنوۆ قىزمەتىنەن ءوز ەركىمەن كەتكەن.
ەسكە سالا كەتەيىك, 2025 جىلدىڭ 21 ساۋىرىندە شىمكەنت قالاسى اكىمدىگى جانىندا بەلگىسىز ەر ادام اكىمنىڭ ورىنباسارى رۋسلان بەردەنوۆكە وق اتتى. شەنەۋنىك جارالانىپ, اۋرۋحاناعا جەتكىزىلگەن ەدى.
كەيىنىرەك وق اتقان ادامنىڭ 31 جاستاعى ەرنار جيەمباي ەكەنى انىقتالدى. ول قىلمىستىق كودەكستىڭ 24-بابى 3-بولىگى جانە 99-بابى 1-بولىگى «كىسى ولتىرۋگە وقتالۋ» ايىبىمەن جاۋاپقا تارتىلدى.
18 تامىزدا وتكەن سوت وتىرىسىندا ايىپتالۋشى ەرنار جيەمباي جابىرلەنۋشى شەنەۋنىكتەن كەشىرىم سۇراعان ەدى.
20 تامىزدا ەرنار جيەنباي كىنالى دەپ تانىلىپ, ورتا قاۋىپسىزدىك مەكەمەسىندە 9 جىلعا باس بوستاندىعىنان ايىرىلدى. سونداي-اق, جابىرلەنۋشىگە 30 اەك (2025 جىلى – 117 960 تەڭگە) وتەماقى تولەۋگە مىندەتتەلدى.
