فوتولار: قالا اكىمدىگى
قالانىڭ ەكولوگيا جانە قورشاعان ورتا باسقارماسىنىڭ وكىلدەرىنىڭ ايتۋىنشا, قالالىق شىعارىندىلاردىڭ شامامەن 60%-ى اۆتوكولىكتەردەن شىعادى. 2025 جىلى Eco Almaty جانە «رەنەسسانس پليۋس» كومپانياسى قىزمەتكەرلەرى 186 000-نان استام ولشەم جۇرگىزىپ, 20 000-عا جۋىق حاتتاما جاساپتى. ال سالىنعان ايىپپۇلداردىڭ جالپى سوماسى 653 ملن تەڭگەدەن استى.
ەسكە سالايىك, «الماتى قالاسىنىڭ اۋماعىندا اتموسفەرالىق اۋانى قورعاۋ سالاسىنداعى ارنايى ەكولوگيالىق تالاپتاردى ەنگىزۋ تۋرالى» جاڭا ەرەجەلەر جوباسى ازىرلەنگەن. قۇجات قازىر كەلىسۋ راسىمىنەن ءوتىپ جاتىر. ەرەجە حالىق پەن بيزنەسكە قولداۋ شارالارىن ەنگىزۋگە, ەكولوگيالىق تەحنولوگياعا كوشۋگە جانە اۆتوپاركتى جاڭارتۋعا قۇقىقتىق نەگىز قالىپتاستىرادى.
قالا اكىمدىگىنىڭ مالىمەتىنشە, ەرەجەلەر قابىلدانعاننان كەيىنگى ناتيجە جان-جاقتى بولماق. نەگىزگى لاستاۋشى رەتىندە اۆتوپارك باستى ەكولوگيالىق باقىلاۋعا الىنادى. بۇرىن رەتتەۋگە شامالى تارتىلعان III ساناتتاعى كاسىپورىندار دا جاڭا تالاپتارعا باعىنادى: ولار ەكولوگيالىق نورمالاردى ساقتاۋعا جانە تەكسەرۋدەن وتۋگە مىندەتتى. سونىمەن قاتار اۋا ساپاسىن جەدەل باقىلاۋعا مۇمكىندىك بەرەتىن بىرىڭعاي مونيتورينگ جۇيەسى قۇرىلىپ, تۇرعىندارعا اشىق دەرەكتەر ۇسىنىلادى. قالادا LEZ ايماقتار پايدا بولادى. بۇل كولىك قوزعالىسىنا ەكولوگيالىق تالاپتار ەنگىزىلەتىن اۋماقتار, ولاردىڭ ماقساتى – اۋا لاستانۋىن ازايتۋ جانە قالالىق ورتانى جاقسارتۋ.
