القالى جيىنعا مەملەكەت جانە قوعام قايراتكەرلەرى, مادەنيەت جانە اقپارات مينيسترلىگىنىڭ وكىلدەرىمەن قاتار قالامگەرلەر قاتىستى. تۇساۋكەسەر تىزگىنىن فيلولوگيا عىلىمدارىنىڭ دوكتورى, ءماجىلىس دەپۋتاتى امانجول ءالتاي ۇستاپ, قاتىسۋشىلار جاڭا جيناق حاقىندا ويلارىمەن ءبولىستى.
ايتا كەتەيىك, «الىپ اباي» – تۇتاستاي اباي اۋدارماشىلىعىنا ارنالعان تۇڭعىش كىتاپ. وسى ۋاقىتقا دەيىن ابايدىڭ اۋدارماشىلىعىنا قاتىستى 1954 جىلى زاكي احمەتوۆتىڭ «لەرمونتوۆ ي اباي» اتتى زەرتتەۋى شىققان بولاتىن. ول كىتاپتا ابايدىڭ لەرمونتوۆتان جاساعان اۋدارمالارى ايرىقشا تالدانعان ەدى. ال ساۋىتبەك ابدراحمانوۆتىڭ بۇل كىتابىندا اباي اۋدارمالارى تۇگەلدەي دەرلىك قامتىلعان. اتاپ ايتساق, پۋشكين, لەرمونتوۆ, كرىلوۆ, گەتە, بايرون, شيللەر, ميتسكەۆيچ, پولونسكي دەلۆيگ, بۋنيندەردىڭ ولەڭدەرى نازاردان تىس قالماعان.
«ابايدىڭ اۋدارمالارىنا ارنالعان جالعىز كىتاپ وسىدان 71 جىل بۇرىن شىققان ەكەن. ول – 1954 جىلى زاكي احمەتوۆتىڭ «لەرمونتوۆ ي اباي» دەگەن كىتابى. سول ولقىلىقتىڭ ورنىن تولتىرۋعا قىزمەت ەتەتىن كىتاپ مەنىڭ «الىپ ابايىم». اباي شىعارماشىلىعىنىڭ ۇلكەن ءبىر ارناسى اۋدارماشىلارعا تولىق دارەجەدە قامتىلىپ وتىر», دەيدى اۆتور.
كىتاپ قازاق, ورىس, اعىلشىن تىلدەرىندە جارىق كورىپ وتىر. كولەمى – 600 بەت. جاڭا جيناقتىڭ بيىلعى ابايدىڭ 180 جىلدىعىنا وراي جارىققا شىققانىن ەسكە سالايىق. ەرەكشە ەڭبەك – ابايتانۋ عىلىمىندا اقىننىڭ اۋدارماشىلىعىن زەردەلەۋگە قوسىلعان سۇبەلى ۇلەس.
