فوتو: polisia.kz
ۆەدومستۆونىڭ ءباسپاسوز قىزمەتىنىڭ مالىمەتىنشە, اتىراۋ وبلىسى پوليتسيا دەپارتامەنتىندە قىزمەتتىك مىندەتتەرىن اتقارۋ كەزىندە جوعارى كاسىبيلىك پەن جانقيارلىق تانىتقان, سونداي-اق اسا اۋىر قىلمىستى اشۋدا ەرەكشە كوزگە تۇسكەن قىزمەتكەرلەردى ماراپاتتاۋ ءراسىمى ءوتتى.
اسا ماڭىزدى ىستەر جونىندەگى تەرگەۋ باسقارماسىنىڭ اعا تەرگەۋشىسى, پوليتسيا كاپيتانى تەمىرحان حاجمۇراتوۆ تەرگەۋ ارەكەتتەرىن ساپالى جۇرگىزگەنى جانە كاسىبي شەبەرلىگى ءۇشىن باسشى قۇرامنىڭ كەزەكتەن تىس ارنايى شەنى – «پوليتسيا مايورى» اتاعىنا يە بولدى.
بۇدان بولەك, ىشكى ىستەر ءمينيسترى, پوليتسيا گەنەرال-لەيتەنانتى ەرجان سادەنوۆتىڭ بۇيرىعىمەن پوليتسيا پودپولكوۆنيگى اسلان سماعۇل مەن پوليتسيا مايورى ناۋرىزبەك راحمانوۆ «قۇقىقتىق ءتارتىپتى قامتاماسىز ەتۋگە قوسقان ۇلەسى ءۇشىن» مەدالىمەن ناگرادتالدى.
پوليتسيا مايورى سەرىجان ءسابيتوۆ پەن پوليتسيا كاپيتانى گۇلفاريدا تولەگەنوۆا «ىشكى ىستەر ورگاندارىنىڭ ۇزدىگى» توسبەلگىسىمەن ماراپاتتالدى.
«بۇل ماراپات 2024 جىلى ءىز-ءتۇزسىز جوعالىپ كەتكەن يانا لەگكوديموۆاعا قاتىستى اسا اۋىر قىلمىستى اتىراۋلىق پوليتسەيلەر كاسىبي دەڭگەيدە اشقانى ءۇشىن بەرىلدى. قۇقىق قورعاۋشىلار بەينەباقىلاۋ كامەرالارىنداعى جازبالاردى تالداپ, كەڭ كولەمدى جەدەل-ىزدەستىرۋ ءىس-شارالارىن ۇيىمداستىردى, ەكى كۇدىكتىنى انىقتاپ, ءىستى تولىق اشۋعا قول جەتكىزدى. سوت ەكى ايىپتىنى دا ءومىر بويىنا باس بوستاندىعىنان ايىرۋ تۋرالى ۇكىم شىعاردى», دەپ حابارلادى اتىراۋ وبلىستىق پد.
سونىمەن قاتار ماراپاتتالعان قىزمەتكەرلەردىڭ ەڭبەگى مەن كاسىبيلىگى قوعامدىق قاۋىپسىزدىكتى قامتاماسىز ەتۋدەگى قۇقىق قورعاۋ جۇيەسىنىڭ جاۋاپكەرشىلىگى مەن سەنىمدىلىگىنىڭ ايقىن دالەلى ەكەنى ايتىلدى.
ەسكە سالايىق, 17 قاراشادا اتىراۋدا 23 جاستاعى يانا لەگكوديموۆانى ءولتىرۋ ءىسى بويىنشا سوت ۇكىمى جاريالاندى.
يانا لەگكوديموۆا 2024 جىلدىڭ 18 قازان كەشىندە جوعالعان ەدى. ونىڭ دەنەسى تەك وسى جىلدىڭ ماۋسىم ايىندا تابىلدى.
تەرگەۋ مالىمەتىنشە, قىزدى ءولتىرىپ, دەنەسىن جايىق (ۋرال) وزەنىنە تاستاعان. قىلمىسقا ونىڭ سۇيىكتىسى مەن ونىڭ سىبايلاسى كۇدىككە ءىلىندى.
