قۇرىلىس الاڭىندا العاشقى كەزەكتەگى جۇمىستار ورىندالدى: گەودەزيالىق زەرتتەۋلەر جۇرگىزىلىپ, ۋاقىتشا جول ينفراقۇرىلىمى دايىندالدى, نەگىزگى جەر قازۋ جۇمىستارى اياقتالدى, عيماراتتار مەن ينجەنەرلىك جۇيەلەردىڭ مونتاجى باستالدى, الاڭ ەلەكترمەن جابدىقتالىپ, قۋات ترانسفورماتورلارى ورناتىلدى.
جوبانىڭ جۇزەگە اسىرىلۋى قالاعا سەنىمدى جىلۋ بەرۋدى قامتاماسىز ەتەدى, ەلەكتر قۋاتى تاپشىلىعىن ازايتادى جانە ەنەرگەتيكالىق قاۋىپسىزدىكتى ارتتىرادى.
كوكشەتاۋداعى جاڭا جەو «تازا كومىر» تەحنولوگيالارىن قولدانا وتىرىپ سالىنۋدا. بۇل تەحنولوگيالار زاماناۋي سۇزگىلەۋ جانە كومىرقىشقىل گازىن ۇستاۋ جۇيەلەرىن قاراستىرادى, سول ارقىلى قورشاعان ورتاعا اسەردى ەداۋىر تومەندەتەدى. وسىنداي ستانتسيالار وسكەمەن جانە سەمەي قالالارىندا دا سالىناتىن بولادى. سونىمەن قاتار, ەكىباستۇز گرەس-3 جانە كۋرچاتوۆ قالاسىندا جىلۋ ەلەكتر ستانتسياسىن سالۋ جوسپارلانعان.
كومىر جوبالارىمەن قاتار, گاز گەنەراتسياسى دا بەلسەندى دامىپ كەلەدى: قىزىلوردادا جاڭا بۋ-گاز قوندىرعىسىنىڭ قۇرىلىسى اياقتالۋعا جاقىن, وسىنداي جوبا تۇركىستان وبلىسىندا دا ىسكە اسۋدا. الداعى ۋاقىتتا شىمكەنت جانە استانا قالالارىندا جاڭا بۋ-گاز قوندىرعىلارى سالىنباق. بۇل ەلدىڭ ەنەرگەتيكالىق جۇيەسىنىڭ سەنىمدىلىگىن ارتتىرۋعا مۇمكىندىك بەرەدى.
