عالىمداردىڭ ايتۋىنشا, اپەلسين شىرىنىن تۇراقتى تۇردە ءىشۋ يممۋندىق جاسۋشالارداعى مىڭداعان گەننىڭ بەلسەندىلىگىن وزگەرتە الادى. ول گەندەر قان قىسىمىن رەتتەۋگە, قابىنۋدى ازايتۋعا جانە قانت الماسۋىن باقىلاۋعا قاتىسادى. مۇنىڭ بارلىعى جۇرەك دەنساۋلىعىنا تىكەلەي بايلانىستى.
زەرتتەۋ بارىسىندا ەرەسەكتەر ەكى اي بويى كۇنىنە 500 مل تازا پاستەرلەنگەن اپەلسين شىرىنىن تۇتىنعان. 60 كۇننەن كەيىن قابىنۋ مەن جوعارى قان قىسىمىنا جاۋاپ بەرەتىن NAMPT, IL6, IL1B, NLRP3 سياقتى گەندەردىڭ بەلسەندىلىگى تومەندەگەن. سونداي-اق بۇيرەكتە ءناتريدى ۇستاپ تۇرۋعا اسەر ەتەتىن SGK1 گەنى دە باسەڭدەگەن.
بۇل ناتيجەلەر اپەلسين شىرىنى جاسوسپىرىمدەر مەن ەرەسەكتەردەگى قان قىسىمىن تومەندەتۋگە كومەكتەسەدى دەگەن الدىڭعى زەرتتەۋلەردى قۋاتتايدى. عالىمدار مۇنى تسيترۋستاردا كوپ كەزدەسەتىن گەسپەريدين اتتى تابيعي فلاۆونويدتىڭ اسەرىمەن بايلانىستىرادى. ول قابىنۋدى ازايتىپ, قان تامىرلارىن كەڭەيتۋگە ىقپال ەتەدى.
سونىمەن قاتار ارتىق سالماعى بار ادامداردا ماي الماسۋىنا جاۋاپتى گەندەر كوبىرەك وزگەرسە, ارىق ادامداردا قابىنۋعا قاتىستى گەندەر ايقىنىراق اسەرگە ۇشىراعان.
15 كلينيكالىق زەرتتەۋدى قامتىعان كەڭ كولەمدى تالداۋ دا كۇندەلىكتى اپەلسين شىرىنى قانت ديابەتى كەزىندە ينسۋلينگە توزىمدىلىكتى جانە جۇرەك-قان تامىرلارى اۋرۋلارىنىڭ نەگىزگى قاۋىپ فاكتورتورى سانالاتىن قانداعى حولەستەرين دەڭگەيىن تومەندەتەتىنىن كورسەتتى.
اپەلسين شىرىنى ىشەك ميكروبيومىنا دا جاعىمدى اسەر ەتەدى. مىسالى, ءبىر زەرتتەۋدە ءبىر اي بويى قىزىل اپەلسين شىرىنىن ىشكەن ادامداردا قىسقا تىزبەكتى ماي قىشقىلدارىن وندىرەتىن پايدالى باكتەريالار كوبەيگەن. بۇل زاتتار قان قىسىمىن قالىپقا كەلتىرەدى جانە قابىنۋدى ازايتادى.
مەتابوليكالىق سيندرومى بار ادامدارعا اسەرى ءتىپتى ايقىنىراق. ارتىق سالماعى بار 68 ادام قاتىسقان زەرتتەۋدە اپەلسين شىرىنى قان تامىرلارىنىڭ ەندوتەلي فۋنكتسياسىن جاقسارتقان. بۇل – ينفاركت قاۋپىن تومەندەتەتىن ماڭىزدى كورسەتكىش.
بارلىق زەرتتەۋ بىردەي ناتيجەلەردى كورسەتە بەرمەگەنىمەن, جالپى دەرەكتەر اپەلسين شىرىنى تەك «قانت قوسىلعان سۋسىن» دەگەن تۇسىنىكتى تەرىسكە شىعارادى. تالشىققا باي تۇتاس جەمىس ءبارىبىر پايدالىراق, الايدا كۇندەلىكتى از عانا مولشەردە تابيعي اپەلسين شىرىنىن ءىشۋ دە ۇزاق مەرزىمدە وڭ اسەر بەرەدى.
عالىمداردىڭ پىكىرىنشە, اپەلسين شىرىنى قابىنۋدى ازايتىپ, قان اينالىمىن جاقسارتىپ, جۇرەككە پايدالى بيوماركەرلەردىڭ كورسەتكىشىن بىرتىندەپ جاقسارتا الادى.
