وسىدان تۋرا 34 جىل بۇرىن جوعارعى كەڭەستىڭ تورالقاسى «قازاق كسر پروكۋراتۋرا ورگاندارىنىڭ بىرىڭعاي جۇيەسىن قۇرۋ, ولاردىڭ دەربەستىگى مەن تاۋەلسىزدىگىن قامتاماسىز ەتۋ تۋرالى» قاۋلى قابىلدادى. سول كەزدەن باستاپ قىزمەتتىك بورىشقا ادالدىق, ءمىنسىز ادامگەرشىلىك قاسيەتتەر پروكۋرورلىق كورپۋسقا جاڭا سىني تەگەۋرىندەر مەن قاۋىپ-قاتەرلەرگە قارسى ءىس-قيمىل جونىندەگى مىندەتتەردى ىسكە اسىرۋدا ەلەۋلى ۇلەس قوسۋىنا مۇمكىندىك بەرىپ كەلەدى.
تاۋەلسىزدىك جىلدارىندا پروكۋراتۋرا ورگاندارى سىندارلى سوپاقتى باسىپ ءوتىپ, قالىپتاسۋدىڭ ۇلكەن داڭعىل جولىنا تۇسە ءبىلدى. ۆەدومستۆونىڭ بەدەلى جانە ونىڭ الەۋمەتتىك ماڭىزدىلىعى بىرنەشە ەسە ارتتى. پرەزيدەنت قويعان جاۋاپتى مىندەتتەردى ورىنداي وتىرىپ, رەسپۋبليكا پروكۋراتۋراسى زاڭدىلىق پەن قۇقىقتىق ءتارتىپتى قامتاماسىز ەتۋدە مەملەكەتتىڭ سەنىمدى تىرەگىنە اينالدى.
ۆەدومستۆو باسشىسى بەرىك اسىلوۆ ازاماتتاردىڭ قۇقىقتارى مەن بوستاندىقتارىن, قوعامنىڭ جانە تۇتاستاي ەل مۇددەلەرىن قورعاۋدىڭ سەنىمدى كەپىلى بولا وتىرىپ, قازاقستان پروكۋراتۋراسى مەملەكەتتىلىكتى نىعايتۋدا شەشۋشى ءرول اتقاراتىنىن بىرنەشە رەت اتاپ ءوتتى.
ەل پروكۋراتۋراسى — بارلىق دەڭگەيدەگى پروكۋرورلار جوعارى تۇرعان پروكۋرورلارعا جانە باس پروكۋرورعا باعىناتىن, ءبىر ورتالىقتان باسقارىلاتىن جۇيە. پروكۋراتۋرا ءوز جۇمىسىن باسقا مەملەكەتتىك ورگانداردان تاۋەلسىز اتقارادى جانە تەك پرەزيدەنتكە عانا ەسەپ بەرەدى.
