تۋريزم سالاسىنداعى ىنتىماقتاستىققا ارنالدى

جاقىندا ارمەنيانىڭ تۋريستىك ورتالىقتارىنىڭ ءبىرى – تساحكادزور قالاسىندا قازاقستاننىڭ ارمەنياداعى ەلشىلىگىنىڭ باستاماسىمەن جانە «ەۋروپالىق ينتەگراتسيا» ۇكىمەتتىك ەمەس ۇيىمىنىڭ (ۇەۇ) قولداۋىمەن «قازاقستان مەن ارمەنيانىڭ تۋريستىك الەۋەتى: تاجىريبە, كەلەشەك, ىنتىماقتاستىق» تاقىرىبىندا كونفەرەنتسيا ءوتتى. ءىس-شاراعا جەرگىلىكتى ساراپشىلىق توپتاردىڭ, قازاقستاندىق جانە ارمياندىق تۋريستىك ۇيىمداردىڭ جانە بۇقارالىق اقپارات قۇرالدارىنىڭ وكىلدەرى قاتىستى, دەپ حابارلادى ءسىم-ءنىڭ ءباسپاسوز قىزمەتى. قازاقستان رەسپۋبليكاسىنىڭ ۋاقىتشا سەنىمدى وكىلى قانات حاسەنوۆ كونفەرەنتسيانى اشا وتىرىپ, قازاقستانداعى ءتۋريزمدى دامىتۋدىڭ نەگىزگى باعىتتارىنا توقتالىپ, قازاقستانداعى قىس­قى ۋنيۆەرسيادا – 2017 جانە ەكسپو-2017 حالىقارالىق ما­مان­داندىرىلعان كورمەسى سياقتى ەلدە وتەتىن حالىقارالىق ءىس-شارالاردى اتاپ ءوتتى. قازاق­ستاندىق ديپلومات, سونداي-اق, كونفەرەنتسياعا قاتىسۋشىلاردى مەملەكەتتىڭ, ەكونوميكانىڭ جانە قوعامنىڭ ساتىلى جاڭعىرۋ باعىتىنىڭ نەگىزىن قالايتىن پرەزيدەنت نۇرسۇلتان نازارباەۆ جاريالاعان «100 ناقتى قادام» ۇلت جوسپارىنىڭ ماقساتتارىمەن جانە مىندەتتەرىمەن تانىستىردى. كونفەرەنتسيادا ارمەنيا ەكونوميكا مينيسترلىگىنىڭ وكىلى مەحاك اپرەسيان ءسوز الىپ, قازاقستان تاراپى ۇسىنعان تاقىرىپتىڭ ماڭىزدىلىعى مەن وزەكتىلىگىن اتاپ, ارمەنيانىڭ ءتۋريزمدى تامىتۋ سالاسىنداعى تاجىريبەسى تۋرالى باياندادى جانە ەكى ەل اراسىندا وسى باعىتتا ىنتىماقتاستىقتى نىعايتۋدى ۇسىندى. قازاقستان ەكوتۋريزم بويىنشا اقپاراتتىق رەسۋرستىق ورتالىعىنىڭ ۇيلەستىرۋشىسى ايگۇل يساعۇلوۆا جيىنعا قاتىسۋشىلاردى قازاقستاننىڭ زور تۋريستىك مۇمكىندىكتەرىمەن, سون­داي-اق, ەلىمىزدەگى ءتۋريزمدى 2020 جىلعا دەيىن دامىتۋ باعدار­لا­ماسىمەن جان-جاقتى تانىستىردى. قازاقستاندىق تۋريستىك اسسوتسياتسياسى ىشكى جانە كەلۋشىلەر ءتۋريزمىنىڭ باسشىسى راۋشان سارتاەۆا ارمياندىق اۋديتوريا­نى ەلىمىزدىڭ تۋريزم يندۋستريا­سى­نىڭ قازىرگى احۋالى, شەتەلدە تۋريستىك ءونىمدى ىلگەرىلەتۋ ءجو­­نىن­دەگى ءبىر­لەسكەن جوبالاردى قۇرۋ مۇمكىندىكتەرىن ايتىپ بەردى. ال ءوز كەزەگىندە ارمەنيانىڭ ەكونوميكالىق ينتەگراتسيا بويىنشا ساراپشىسى لۋسينە تۋميان ارمەنيانىڭ ەكسپو-2017 ما­­مان­داندىرىلعان كورمەسىنە قاتىسۋ ماسەلەسىنە بايلانىس­تى ەكى ەل اراسىندا اتقارىلىپ جاتقان ءىس-شارالارعا توقتالىپ, قازاق­ستان تا­راپىنىڭ ۇيىم­داس­تىرۋ جۇ­مىستارىن جوعارى باعالادى. جيىن سوڭىندا ەلباسى نۇر­سۇلتان نازارباەۆتىڭ ارميان تىلىندە باسىپ شىعارىلعان «نۇر­لى جول – بولاشاققا باس­تار جول» جولداۋى جانە قازاق­ستاننىڭ الەۋمەتتىك-ەكونو­مي­كالىق جانە قوعامدىق-ساياسي دامۋى تۋرالى ماتەريالدار تاراتىلدى. «ەگەمەن-اقپارات».