وبلىس اكىمى سەرىك شاپكەنوۆتىڭ ايتۋىنشا, الداعى ەكى جىلدا اۋىلدىق وكرۋگتەردىڭ ءبارىن سپورتتىق ينفراقۇرىلىممەن قامتاماسىز ەتۋ كوزدەلىپ وتىر. قازىر وڭىردە 800 سپورت نىسانى بار. ونىڭ ىشىندە 8 ستاديون, 53 سپورت كەشەنى, 702 سپورت الاڭى, 50 مەترلىك وليمپيادالىق باسسەين, «اتىراۋ» سپورت سارايى, تەننيس ورتالىعى مەن مۇز سارايى سىندى ءىرى نىساندارعا كەلۋشىلەر قاتارى كوبەيگەن. سونداي-اق 17 جەكە سپورت نىسانى اۋەسقوي سپورتشىلاردىڭ قىزىعۋشىلىعىن تۋدىرىپ وتىر.
«جىل سوڭىنا دەيىن 68 اۋىلدىق وكرۋگتىڭ 70%-ى سپورت نىسانىمەن قامتىلادى. قازىر وبلىس اۋماعىندا 29 سپورت كەشەنىنىڭ قۇرىلىسى جۇرگىزىلىپ جاتىر. ونىڭ جەتەۋى پايدالانۋعا بەرىلدى, تاعى التى نىساننىڭ قۇرىلىسى اياقتالۋعا جاقىن. الداعى جىلى 16 نىساندى ىسكە قوسۋ جوسپارلانىپ وتىر. قازىر اتىراۋ قالاسى مەن اۋدانداردا دەمەۋشىلەردىڭ ەسەبىنەن ءتورت سپورت نىسانى سالىنىپ جاتىر. ونىڭ قاتارىندا مامانداندىرىلعان ۆولەيبول, باسكەتبول ورتالىقتارى, مۇقىر مەن كۋدرياشوۆ اۋىلدارىنداعى سپورت كەشەندەرى بار», دەيدى س.شاپكەنوۆ.
اكىمنىڭ دەرەگىنە قاراعاندا, وسىنداي جوبالاردى ىسكە اسىرۋ ناتيجەسىندە تۇرعىنداردىڭ سپورتتىق ينفراقۇرىلىممەن قامتىلۋ دەڭگەيى 62%-دان 70%-عا جەتەدى. وڭىردە دارىندى بالالارعا قولداۋ كورسەتۋ جان-جاقتى كوزدەلگەن. وسى ماقساتتا اتىراۋ قالاسىندا وليمپيادالىق رەزەرۆ مەكتەپ-ينتەرناتىنىڭ عيماراتىن سالۋ جوسپارلانعان. الايدا اتالعان جوبانى ىسكە اسىرۋعا التى جىل قاجەت. ويتكەنى مەملەكەتتىك-جەكەمەنشىك ارىپتەستىك اياسىندا 12 ايعا سوزىلاتىن بۇل نىساننىڭ قۇرىلىسى 2026 جىلدىڭ ساۋىرىندە باستالادى. ال بەس جىل – تەحنيكالىق پايدالانۋ كەزەڭى. كەشەن قۇرامىندا 13 سپورت زالى, باسسەين, وقۋ كورپۋسى, جاتاقحانا, اسحانا, كىتاپحانا, باسقا دا يگىلىكتەر بولادى. مۇندا 12 وليمپيادالىق سپورت تۇرىنەن 400 سپورتشى ءبىلىم الىپ, شەبەرلىگىن شىڭدايدى.
«مەملەكەت باسشىسىنىڭ ۇلتتىق قۇرىلتايدا بەرگەن تاپسىرمالارىنا سايكەس, اتىراۋ وبلىسىندا حالىقارالىق دەڭگەيدەگى جارىستار وتكىزۋگە مۇمكىندىك بەرەتىن ءىرى سپورتتىق جوبالار ىسكە اسىرىلادى. سونداي جوبالاردىڭ قاتارىندا ۇلتتىق ات سپورتى كەشەنى (يپپودروم), 12 مىڭ ورىندىق Euro-IV ساناتىنداعى فۋتبول ستاديونى مەن كوپبەيىندى «Atyrau Arena» سپورت كەشەنى بار. قازىر بۇل نىساندار جونىندەگى جوبالاۋ جۇمىستارى اياقتالدى. ەندى مەملەكەتتىك ساراپتامادان ءوتۋ كەزەڭى ءجۇرىپ جاتىر. قۇرىلىستى كەلەسى جىلى باستاۋ جوسپارلانىپ وتىر», دەدى وبلىس اكىمى.
رەسمي مالىمەتتەرگە سۇيەنسەك, وبلىس تۇرعىندارىنىڭ دەنە شىنىقتىرۋمەن جۇيەلى شۇعىلدانۋ كورسەتكىشى 45,1%-دى قۇرايدى. بۇل از با, كوپ پە؟ قانشا دەگەنمەن مۇنايلى وڭىردە وليمپيا ويىندارى سەكىلدى ءدۇبىرلى دودالاردا ەل نامىسىن قورعايتىن سپورتشىلار ازىرگە كورىنەر ەمەس.
جاقىندا كۇرەستەن الەم, ازيا چەمپيونى ريزابەك ايتمۇقاننىڭ ەسىمى بەرىلگەن سپورت كەشەنى پايدالانۋعا بەرىلدى. جاڭا نىساننىڭ اشىلۋىنا قاتىسقان قازاقستاننىڭ ەڭبەك سىڭىرگەن قايراتكەرى, داڭقتى بالۋان, ءماجىلىس دەپۋتاتى داۋلەت تۇرلىحانوۆتىڭ ايتۋىنشا, مۇنايلى وڭىردە ەركىن كۇرەسكە دەن قويعان جاسوسپىرىمدەرگە ۇلكەن مۇمكىندىك تۋىپ وتىر. ويتكەنى زاماناۋي كەشەن – بۇقارالىق سپورتتى دامىتۋعا, جاتتىعۋ الاڭدارىن كەڭەيتۋگە باعىتتالعان ماڭىزدى قادام.
«اتىراۋ – «قارا التىنىمەن» عانا ەمەس, بەلگىلى سپورتشىلارىمەن دە تانىمال ءوڭىر. وسىنداي سپورت اكادەميالارى كوبەيسە, ەلىمىزدىڭ اتىن الەمگە شىعاراتىن سپورتشىلار قاتارى ارتاتىنى داۋسىز. تالانتتى سپورتشىلاردى قولداۋ قاجەت. بۇل تۇرعىدا وسى زامان تالابىنا ساي سپورت كەشەندەرىن كوبىرەك اشۋ قاجەت», دەيدى د.تۇرلىحانوۆ.
وبلىستىق دەنە شىنىقتىرۋ, سپورت جانە تۋريزم باسقارماسىنىڭ مالىمەتىنە قاراعاندا, مۇنايلى اتىراۋدا كۇرەس تۇرلەرى كەڭ قانات جايىپ كەلەدى. قازىر ەركىن كۇرەسكە باۋليتىن 197, گرەك-ريم كۇرەسىنەن 96 سەكتسيا جۇمىس ىستەيدى. سەكتسيالاردا ءتورت مىڭنان استام بالا اتالعان سپورت تۇرلەرىمەن تۇراقتى شۇعىلدانادى. الايدا كەيىنگى جىلدارى گرەك-ريم كۇرەسىنىڭ بالۋاندارى ءىرى جارىستاردا جاقسى ناتيجە كورسەتە الماي ءجۇر. ال ەركىن كۇرەس شەبەرلەرى ازيا, الەم چەمپيوناتىنان تەك ەكى مەدالعا يە بولدى.
«كەيىنگى جىلدارى جەرگىلىكتى بالۋانداردىڭ حالىقارالىق, رەسپۋبليكالىق سايىستاردا كورسەتىپ جۇرگەن ناتيجەسى كوڭىل كونشىتپەيدى. ەلىمىز چەمپيوناتىندا ەركىن كۇرەس شەبەرلەرى 2023 جىلى 11 مەدال جەڭىپ الدى. بىلتىر مەدال سانى بەسەۋگە كەمىدى. گرەك-ريم كۇرەسىنىڭ شەبەرلەرى ءۇش مەدالدى ەنشىلەۋمەن شەكتەلدى. ۇلتتىق قۇراما ساپىنداعى اتىراۋلىق سپورتشىلار سانى ەركىن كۇرەستەن 19-دان 14-كە كەمىدى. گرەك-ريم كۇرەسىنەن 11-دەن 6-عا دەيىن ازايدى», دەيدى باسقارما باسشىسى نۇربول سىدىقوۆ.
وڭىردە دزيۋدودان ەكى وليمپياداعا قاتىسقان ءبىر بالۋان بار. ول – رينات يبراگيموۆ. الدىمەن 2008 جىلى بەيجىڭدە, كەيىن 2012 جىلى لوندوندا وتكەن وليمپيادادا باق سىنادى. قازىردە 105 جاتتىقتىرۋشى جاسوسپىرىمدەردى دزيۋدو سپورتىنا باۋلىپ ءجۇر. ونىڭ ىشىندە 52 جاتتىقتىرۋشى اۋىلداردا تۇرادى. شتاتتىق رەجىمدە 85 جاتتىقتىرۋشى جۇمىس ىستەيدى. بۇگىندە 4401 اتىراۋلىق جاس ورەن دزيۋدو سپورتىن تاڭداپتى. بالالار مەن جاسوسپىرىمدەر سپورت مەكتەپتەرىندە 3033, وليمپيادالىق رەزەرۆ دايارلاۋ ورتالىعىندا 52 بالا جاتتىعادى. جوعارى سپورت شەبەرلىگى مەكتەبىندە 37, سپورت ينتەرناتىندا 79 سپورتشى, «دامۋبالا» باعدارلاماسى ارقىلى 1200 بالا تەگىن سپورتتىق سەكتسيالارعا تارتىلعان.
جەرگىلىكتى سپورتشىلاردان قايران بولمادى ما, كەيىنگى جىلدارى جەرگىلىكتى باپكەرلەر ءابيبا ابۋجاقىنوۆا مەن ەسميگۇل كۋيۋلوۆاعا ءۇمىت ارتىپ, پاريج وليمپياداسىنا قوستى. بىلتىر ۇلتتىق قۇراما ساپىنا 22, بيىل 23 اتىراۋلىق دزيۋدوشى تىركەلىپتى. الايدا ەكى وليمپياداعا قاتىسقان رينات يبراگيموۆ پەن پاريجدە تاتامي تورىنە شىققان قوس ارۋدىڭ ءىزىن جالعار بىلەكتى بالۋان ءالى تابىلماي تۇر.
باسقارما باسشىسىنىڭ پىكىرىنشە, كۇرەس تۇرلەرىنە بىلىكتى مامانداردى تارتۋ قاجەت. جەرگىلىكتى بالۋانداردىڭ شەبەرلىگىن شىڭداۋعا ءمان بەرىلگەنى ءجون. سپورتتىڭ وزگە تۇرلەرىندە دە وسىنداي قادامدار جاسالۋى قاجەت. ويتكەنى اتىراۋلىقتار ءوڭىر سپورتىن العا باستىرار تىڭ تالپىنىستاردى, وليمپيادا شىڭىن باعىندىرار ساڭلاقتاردى كۇتكەلى ءبىراز جىل بولدى.
اتىراۋ وبلىسى
