سۋرەتتەردى تۇسىرگەن – جەڭىس ىسقاباي
شىعارماشىلىققا ادالدىقتىڭ, رۋحانياتقا قىزمەت ەتۋدىڭ, جارتى عاسىرلىق ەڭبەكتىڭ لايىقتى باعالانۋى رەتىندە قابىلدانعان بۇل جاڭالىق تەاتر ۇجىمىن عانا ەمەس, تۇتاس جەتىسۋ جۇرتشىلىعىن ەرەكشە قۋانىشقا بولەدى. تالدىقورعان تەاترىنىڭ تاريحى 1975 جىلدان باستاۋ الادى. تەاتر شىمىلدىعىن العاش بولىپ عابيت مۇسىرەپوۆتىڭ «قوزى كورپەش – بايان سۇلۋ» پەساسى اشقان ساتتەن باستاپ, بۇل ۇجىم ونەر الەمىندە وزىندىك قولتاڭباسىن قالىپتاستىرىپ, قازاق تەاتر مادەنيەتىنىڭ دامۋىنا زور ۇلەس قوسىپ كەلەدى.
بيىل 50 جىلدىعىن اتاپ وتكەن ونەر ورداسى وسى ۋاقىت ارالىعىندا جۇزدەگەن قويىلىم قويىپ, تالاي تالانتتى تۇلەتىپ شىعاردى. الماحان كەنجەبەكوۆا, ءاليحان ىدىرىشەۆا, ليديا كادەنوۆا, دۋلىعا اقمولدا سەكىلدى حالىق ارتىستەرى ەڭبەك ەتەتىن تەاتر بۇگىندە شىعارماشىلىقتىڭ شىنايى مەكتەبىنە اينالعان. 145 ادامنان تۇراتىن ۇجىمنىڭ 61-ءىن جاستار قۇرايدى. بۇل – تەاترداعى ءداستۇر ساباقتاستىعىنىڭ, جاڭا بۋىننىڭ قالىپتاسۋىنىڭ ايقىن كورسەتكىشى. تەاتر ديرەكتورى ەرلىك تىلەۋقۇل ۇلى كوركەمدىك بۇل جاڭالىقتى تەاتر تاريحىنداعى ەڭ جارقىن بەلەستەردىڭ ءبىرى دەپ باعالادى:
«جارتى عاسىرلىق جولىمىزدا كورەرمەننىڭ سەنىمىن اقتاۋعا, ساحنا مادەنيەتىن بيىكتەتۋگە تىرىستىق. ءار پرەمەرا, ءار قۇرمەت, ءار قوشەمەت – ورتاق تاريحىمىزدىڭ التىن پاراعى. اكادەميالىق مارتەبە – تەك اتاق ەمەس, ءبىزدىڭ ونەرگە دەگەن ادالدىعىمىزدىڭ, ۇلت رۋحانياتىن دامىتۋعا قوسقان ۇلەسىمىزدىڭ جوعارى باعالانۋى. بۇل مارتەبە – ءارى قۋانىش, ءارى ۇلكەن جاۋاپكەرشىلىك», دەيدى ول.
جەتىسۋ وڭىرىندە تەاتر مادەنيەتىنىڭ دامۋىنا ىقپال ەتىپ كەلە جاتقان تاعى ءبىر ماڭىزدى جوبا – «Biken Fest» حالىقارالىق فەستيۆالى. وبلىس قۇرىلعاننان بەرى ۇزدىكسىز ۇيىمداستىرىلىپ كەلە جاتقان بۇل ونەر مەرەكەسى بيىل وزبەكستان, ازەربايجان, گرۋزيا, قىرعىزستان باسقا دا ەلدەردەن كەلگەن 9 تەاتردى بىرىكتىرىپ, شىعارماشىلىق تاجىريبە الماسۋدىڭ بىرەگەي الاڭىنا اينالدى. فەستيۆالدىڭ تۇراقتى ءوتۋى تالدىقورعان تەاترىنىڭ حالىقارالىق بەدەلىن ارتتىرىپ, كاسىبي بايلانىستارىن كەڭەيتە ءتۇستى.
حالىق ءارتىسى الماحان كەنجەبەكوۆا بۇل مارتەبەنى ۇلكەن سەرپىلىس رەتىندە قابىلداپ, الداعى جوسپارلارىمەن ءبولىستى.
«اكادەميالىق اتاق – بۇكىل ۇجىمنىڭ تاباندى ەڭبەگىنىڭ ناتيجەسى. بۇل ءبىزدىڭ حالىقارالىق دەڭگەيدەگى جوبالارعا كەڭىنەن قاتىسۋىمىزعا, جاس ارتىستەردىڭ كاسىبي دامۋىنا, جاڭا شىعارماشىلىق زەرتحانالار اشۋعا جول اشادى. تەاتر – قوعامنىڭ ايناسى. ءبىز سول ايناعا زاماناۋي وي, ۇلتتىق رۋح, تەرەڭ مادەنيەت بەينەسىن ءتۇسىرۋدى جالعاستىرا بەرەمىز», دەيدى ول.
ال اكادەميالىق مارتەبە – تەاتردىڭ جاڭا بەلەسى. بۇل اتاق ۇجىمعا جاڭا مۇمكىندىك, جاڭا مىندەت جۇكتەيدى. جارتى عاسىرلىق تاريحى بار ونەر ورداسى ەندى اكادەميالىق دەڭگەيدە جاڭاشا ورلەۋ كەزەڭىنە قادام باسادى.
جەتىسۋ وبلىسى
