ەلشىنىڭ ايتۋىنشا, پاندەميادان كەيىن 2021 جىلى قازاقستاننان يندونەزياعا تۋريستەر اعىنى 700 ادامدى عانا قۇراعان ەدى. 2023 جىلى بۇل كورسەتكىش 7 مىڭعا جەتسە, بيىل 2025 جىلى 25 مىڭ قازاقستاندىق يندونەزيا ارالدارىنا بارعان.
– سوندىقتان بىزگە قازاقستاننان كەلەتىن تۋريستەر سانىن ودان ءارى ارتتىرۋ قاجەت. الايدا نەگىزگى قيىندىق تىكەلەي اۋە رەيستەرىنىڭ بولماۋىنا جانە ۆيزا رەجيمىنە كەلىپ تىرەلەدى. قازىرگى ۋاقىتتا ءبىز قازاقستان ازاماتتارى ءۇشىن يندونەزياعا ۆيزاسىز كىرۋ ماسەلەسىن رەتتەپ جاتىرمىز. ويتكەنى قازاقستان يندونەزيا ازاماتتارىنا ۆيزاسىز كىرۋگە رۇقسات بەرىپ وتىر. ال يندونەزيا ازىرگە تەك كەلۋ بارىسىندا بەرىلەتىن اقىلى ۆيزانى عانا ۇسىنىپ وتىر. سوندىقتان قازىر وسى ۆيزاسىز رەجيمدى تولىق ىسكە اسىرۋ باعىتىندا جۇمىستار ءجۇرىپ جاتىر, – دەدى ەلشى موحاماد فادجرۋل راحمان استانادا «عاجايىپ يندونەزيا» مادەني-ديپلوماتيالىق كەشىندە.
تىكەلەي اۋە رەيستەرى بويىنشا ەلشى Air Asia جانە Air Astana كومپانيالارىمەن كەلىسسوزدەر ءجۇرىپ جاتقانىن جەتكىزدى.
– قازىرگى تاڭدا قازاقستاننان باليعا ۇشۋ ۋاقىتى شامامەن 10 ساعاتقا جۋىقتايدى. قازىر تۋريستەردىڭ كوپشىلىگى الماتىدان كۋالا-لۋمپۋرعا تىكەلەي رەيسپەن 7,5 ساعات ۇشادى, كۋالا-لۋمپۋردان باليعا تاعى 2 ساعات ۇشادى. سوندىقتان تىكەلەي رەيستەردىڭ اشىلۋى باليعا بارۋدى ەداۋىر جەڭىلدەتەر ەدى. وسى مۇمكىندىك جاقىن ارادا جۇزەگە اسادى دەپ ۇمىتتەنەمىز, – دەدى يندونەزيا ەلشىسى.
ءوز كەزەگىندە يندونەزيالىق تۋريستەر قازاقستانداعى قىسقى تۋريزمگە, اسىرەسە الماتىداعى شىمبۇلاققا, تاۋ-شاڭعى كۋرورتىنا ەرەكشە قىزىعۋشىلىق تانىتىپ وتىر. وتكەن جىلى يندونەزيادان قازاقستانعا 5 مىڭنان استام تۋريست كەلگەن.
