فوتو: اشىق دەرەككوزدەن
كاسىپكەردىڭ ايتۋىنشا, پرەزيدەنت كومپانيا جۇمىسىنا ەرەكشە قىزىعۋشىلىق تانىتىپ, ءوندىرىستىڭ تولىق تسيكلى, ەكسپورتتىق مۇمكىندىكتەرى جانە ءونىم ساپاسى تۋرالى سۇرادى. «بال تەكستيل» – ءجىپ يىرۋدەن باستاپ دايىن كىلەم شىعارۋعا دەيىنگى پروتسەستى تولىق اتقاراتىن, جەرگىلىكتى شيكىزاتتى پايدالاناتىن كاسىپورىن. كومپانيا رەسەي, قىرعىزستان, وزبەكستان, تاجىكستان جانە قىتاي نارىعىنا ءونىم ەكسپورتتاپ وتىر.
بۇگىندە زاۋىتتا 20 زاماناۋي ستانوك جۇمىس ىستەيدى, وندىرىستە 500-دەن استام ادام ەڭبەك ەتەدى. قازاقستاننىڭ بارلىق وڭىرىندە 400-دەن استام ديستريبيۋتور بار, ولاردىڭ ەسەبىنەن جالپى 3 مىڭعا جۋىق ادام وتاندىق ءونىم وندىرىسىمەن اينالىسىپ وتىر.
تالعات ىسقاقوۆ مەملەكەت باسشىسىنا جەرگىلىكتى پوليپروپيلەن ءجىبىن قولدانۋ باسەكەگە قابىلەتتىلىكتى ارتتىرعانىن ايتتى. پرەزيدەنت كومپانيا جۇمىسىنا وڭ باعاسىن بەرىپ, ءونىم باعاسى, ساتىلىم كولەمى جانە شەتەلدىك برەندتەرمەن باسەكە تۋرالى سۇراپ, الداعى ۋاقىتتا فابريكاعا بارىپ, جۇمىسىمەن جەكە تانىساتىنىن جەتكىزدى.
ماراپاتتاۋ راسىمىندە مەملەكەت باسشىسى وتاندىق ءوندىرىستى قولداۋدىڭ ماڭىزىن اتاپ ءوتىپ, ەكسپورتقا باعىتتالعان, جەرگىلىكتى شيكىزاتقا سۇيەنەتىن جانە زاماناۋي تەحنولوگيالاردى قولداناتىن كاسىپورىندارعا باسىمدىق بەرىلۋى ءتيىس ەكەنىن ايتتى.
كاسىپكەردىڭ سوزىنشە, مۇنداي قولداۋ قازاقستاندىق بيزنەستىڭ دامۋىنا سەرپىن بەرىپ, وتاندىق وندىرۋشىلەرگە جاڭا مۇمكىندىكتەر اشادى.
