قىزىلوردادا مۇگەدەكتىگى بار جانداردىڭ جايىن ەسكەرگەن قانشا نىسان بار؟

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, ەلىمىزدە 2025-2030 جىلدارعا ارنالعان ينكليۋزيۆتى ساياسات تۇجىرىمداماسى, «امانات» پارتياسىنىڭ 2023-2027 جىلدارعا ارنالعان جول كارتاسى جانە پرەزيدەنت تاپسىرماسىمەن ازىرلەنگەن «حالىقپەن بىرگە» جوباسى اياسىندا مۇگەدەكتىگى بار ادامداردىڭ قۇقىقتارىن قورعاۋ جانە ولاردىڭ تۇرمىس ساپاسىن ارتتىرۋعا باعىتتالعان اۋقىمدى جۇمىستار جالعاسىپ جاتىر.

پارتيانىڭ جول كارتاسىندا ينتەراكتيۆتى قولجەتىمدىلىك كارتاسىنا ەنگىزىلگەن 43 مىڭنان استام نىساندى كەزەڭ-كەزەڭمەن بەيىمدەۋ مىندەتى قويىلعان.

«جىل سايىن وسىنداي وبەكتىلەردىڭ 20%-ى بەيىمدەلۋى ءتيىس. وسىلايشا, 2023 جىلى – كارتاداعى وبەكتىلەردىڭ 20%-ى, 2024 جىلى – 40%-ى, 2025 جىلى – 60%-ى, 2026 جىلى – 80%-ى, 2027 جىلى – 100%-ى بەيىمدەلەدى. قازىرگى ۋاقىتتا ەل بويىنشا 24 216 نىسان تولىقتاي بەيىمدەلگەن», دەلىنگەن حابارلامادا.

ايتا كەتەيىك, بۇگىندە قىزىلوردا وبلىسىندا بيىلعا دەيىن 1578 نىسان بەيىمدەلگەن. 

ايماقتا بەيىمدەلگەن نىسانداردىڭ ىشىندە:

• دەنساۋلىق ساقتاۋ ۇيىمدارى – 198;
• ءبىلىم بەرۋ مەكەمەلەرى – 339;
• مادەنيەت وبەكتىلەرى – 129;
• مەملەكەتتىك جانە كۆازيمەملەكەتتىك ۇيىمدار – 201;
• سپورت نىساندارى – 24,
• الەۋمەتتىك قورعاۋ ۇيىمدارى – 23,
• كولىك ينفراقۇرىلىمى وبەكتىلەرى – 14;
• باسقا دا ءتۇرلى نىساندار – 650.

بيىل قىزىلوردا وبلىسىنىڭ الەۋمەتتىك قورعاۋ دەپارتامەنتى الەۋمەتتىك كودەكس تالاپتارىنىڭ ورىندالۋىن تەكسەرۋ ماقساتىندا 129 تەكسەرىس جۇرگىزگەن. ونىڭ ىشىندە پروفيلاكتيكالىق باقىلاۋ – 31, جوسپاردان تىس تەكسەرۋ – 19, ال پروكۋراتۋرا باستاماسىمەن 79 تەكسەرۋ ۇيىمداستىرىلعان.

«تەكسەرۋ ناتيجەسىندە مۇگەدەكتىگى بار ادامداردى الەۋمەتتىك قورعاۋ جانە ارنايى الەۋمەتتىك قىزمەتتەر كورسەتۋ سالاسىندا انىقتالعان زاڭبۇزۋشىلىقتاردى جويۋ جونىندە 37 نۇسقاما بەرىلدى. سونداي-اق جالپى سوماسى 4 ملن 699,3 مىڭ تەڭگە بولاتىن 37 اكىمشىلىك ايىپپۇل سالىندى. بىرلەسكەن تەكسەرۋلەردىڭ قورىتىندىسى بويىنشا پروكۋراتۋراعا 79 قورىتىندى ۇسىنىلدى», دەلىنگەن حابارلامادا.

ۆەدومستۆو وكىلدەرى العاش رەت انىقتالعان بۇزۋشىلىقتار بويىنشا ايىپپۇل سالىنبايتىنىن, تەك نۇسقاما بەرىلەتىنىن اتاپ ءوتتى. الايدا نۇسقاما مەرزىمىندە ورىندالماسا, اكىمشىلىك جاۋاپكەرشىلىك قاراستىرىلادى.