قالانىڭ بۇگىنگى كەلبەتى تۇرعىندارعا قولايلى, قاۋىپسىز, زاماناۋي ورتا قۇرۋ باعىتىندا بىرقاتار جۇمىس اتقارىلعانىن انىق اڭعارتادى. اتاپ ايتساق, قالانىڭ تومەنگى بولىگىندەگى اۋلا اۋماقتارى اباتتاندىرىلدى. 16-شاعىن اۋداننىڭ اۋلا جولدارى مەن كىرەبەرىستەرىنە 14 000 شارشى مەتردەن استام اسفالت توسەلدى. بەس قوقىس الاڭى جاڭارتىلىپ, ەۆروكونتەينەرلەر ورناتىلدى. جاڭادان ءۇش بالالار ويىن الاڭى جاسالدى. 64 جارىق شامى مەن ەكى جارىق باعانى ورناتىلدى. قۋراعان اعاشتار كەسىلدى. جۇمىستاردى مەردىگەر ۇيىم «جاس ۇرپاق» قق ۋاقىتىلى ورىنداپ شىقتى.
قالانىڭ 8, 9-شاعىن اۋداندارىندا مەردىگەر «يلداس» جشس 21 000 شارشى مەتر اسفالت توسەدى. بەس بالالار ويىن الاڭىن سالىپ, 72 جارىق باعانىن, تۇرعىندار دەمالاتىن 74 ورىندىق, قوقىس جاشىكتەرىن ورناتتى. سەگىز كونتەينەر الاڭى اباتتاندىرىلدى.
15ۆ-شاعىن اۋداننىڭ اباتتاندىرۋ جۇمىسىن «اسلان قۇرىلىس KZ» جشس اتقاردى. اۋلا جولدارى مەن كىرەبەرىستەرگە 8 872 شارشى مەتر اسفالت توسەلدى. 30 جارىقتاندىرۋ باعانى ورناتىلدى. 65 – 67 ۇيلەردىڭ اراسىنداعى بالالار ويىن الاڭى جابدىقتالىپ, ءتورت قوقىس كونتەينەرلەرى الاڭى اباتتاندىرىلدى.
قالاداعى «ەرتەگى» بالاباقشاسى مەن جالپى ءبىلىم بەرەتىن №25 مەكتەپتىڭ اۆتوتۇراعى سالىندى. №25 مەكتەپ جانىنداعى جاياۋ جۇرگىنشى جولى جاڭادان جاسالدى. №27, №14 مەكتەپتەردىڭ, «ەرتەگى», «نۇربوبەك» بالاباقشالارى ماڭىنداعى جاياۋ جۇرگىنشىلەر جولدارى مەن اۆتوتۇراقتار اباتتاندىرىلدى. بۇل جۇمىستاردى «اسلان قۇرىلىس KZ» جشس اتقاردى. ەسكى ۇيلەردىڭ اۋلالارىندا بالالاردىڭ ويىن الاڭى قولدانىسقا بەرىلدى. بارلىعى 38 جاڭا ويىن الاڭى سالىندى.
قالا ورتاسىنداعى «وقۋشىلار» اللەياسى ەرەكشە كوز تارتادى. مۇندا «يلداس» جشس اۋقىمدى قۇرىلىس-اباتتاندىرۋ جۇمىسىن جۇرگىزدى. جاياۋ جۇرگىنشىلەر جولىنا توسەمتاس, بالالاردىڭ ويىن الاڭىنا جاراقات الۋ قاۋپىن ازايتاتىن تارتان جابىندىسى توسەلدى. فۋتبول الاڭىنىڭ قورشاۋى اۋىستىرىلدى. سيرەن بۇتالارى مەن ەمەن كوشەتتەرى وتىرعىزىلىپ, سۋارۋ جۇيەسى تارتىلدى. جاڭا جارىق شامدارىنىڭ تىرەكتەرى, ساياباق شامدارى ورناتىلدى. ء«بىلىم باسپالداعى» ينستاللياتسياسى, امفيتەاتر ساحناسى وقۋشىلاردىڭ ءتۇرلى ءىس-شارا وتكىزۋىنە قولايلى. اللەيا بالالار عانا ەمەس, اتا-انالار مەن تۇرعىنداردىڭ دا سەرۋەندەپ, دەمالاتىن ورنىنا اينالعان.
«№25 مەكتەپتىڭ ارتقى اۋماعى كوپ جىلدان بەرى قاراۋسىز قالعان, پايدالانىلماعان بوس الاڭ بولدى. بيىل العاش رەت وسى جەرگە «وقۋشىلار» اللەياسىن اشتىق. ماقساتىمىز – وقۋشىلاردىڭ ۋاقىتتارىن ءتيىمدى ءارى پايدالى وتكىزۋىنە, سپورتپەن, شىعارماشىلىقپەن اينالىسۋىنا مۇمكىندىك جاساۋ. الداعى جىلدان باستاپ بارلىق كەلۋشىلەرگە تەگىن Wi-Fi جەلىسى قولجەتىمدى بولادى», دەيدى قالا اكىمى م.بورىباەۆ.
«تاعزىم» الاڭى – ۇرپاققا حالقىمىزدىڭ تالايلى تاريحىنان سىر شەرتەتىن ورىن. وكىنىشكە قاراي, بۇل نىساندى قالىپقا كەلتىرۋ جۇمىسى بىرنەشە جىلعا سوزىلعان. سوڭعى ءۇش جىل ىشىندە مەردىگەر ۇيىمدار وزدەرىنە جۇكتەلگەن مىندەتتەمەلەردى ورىنداماي, جۇمىستى تولىق اياقتاماعان. سول سەبەپتى زاڭ اياسىندا جۇمىس جۇرگىزىلگەن. بيىل بۇل ماڭىزدى ءىستى باسقا مەردىگەر ۇيىم قولعا الىپ, جۇمىستى ساپالى ءارى ۋاقىتىلى اياقتاۋعا بار كۇشىن جۇمىلدىردى. الاڭنىڭ كەلبەتى جاڭارىپ, كەلۋشىلەرگە قولايلى جاعداي جاسالدى. مەموريالدىق كەشەن قورشالىپ, الاڭ ىشىنە توسەمتاس توسەلدى. جارىق شامدارى ورناتىلىپ, جاسىل جەلەك وتىرعىزىلدى. ەسكى سۋارۋ قۇبىرى تەكسەرىلىپ, جاڭا جاڭبىرلاتىپ سۋارۋ جۇيەسى ورناتىلدى. ءسويتىپ, جاڭارعان الاڭ ەلىمىزدىڭ تاريحىنا تاعزىم ەتۋگە ارنالعان رۋحاني ورىنعا اينالدى.
ەردەن كوشەسىندەگى اللەيانىڭ ۇزىندىعى 250 مەتر, قالماعامبە-توۆ كوشەسىنەن «جانۇيا» دۇكەنىنە دەيىنگى ارالىقتى الىپ جاتىر. اباتتاندىرۋ بارىسىندا 120 تال ەگىلگەن. ۇستەل تەننيسى, بالالار ويىن كەشەندەرى, اتكەنشەكتەر, سپورتتىق ترەناجەرلەر, زاماناۋي ورىندىقتار قويىلعان. جۇمىستاردى «Kozmodrom» جشس اتقارىپ شىققان.
قالانىڭ ورتالىق الاڭى دا اباتتاندىرىلعان. الاڭداعى ساعات ستەللاسىنىڭ جاياۋ جۇرگىنشىلەر جۇرەتىن ەكى قاپتالىنا ەكى سۋبۇرقاق ورناتىلىپ, جۇمىس ىستەمەيتىن ەسكى سۋبۇرقاق الىنىپ تاستالدى. «ۋنيۆەرسام» دۇكەنى الدىنداعى اللەيا, «جاستار» ساياباعى كوگالداندىرىلدى, جاياۋ جۇرگىنشىلەر جولىنا توسەمتاس توسەلدى. ماڭايى ساندىك ەلەمەنتتەرمەن بەزەندىرىلىپ, ورىندىقتار مەن قوقىس جاشىكتەرى قويىلدى. جاياۋ ادام جۇرەتىن جول بويىنا جارىق جۇيەسى ورناتىلدى. تالداردى كۇتۋگە تامشىلاتىپ سۋارۋ جۇيەسى تارتىلدى. الداعى ۋاقىتتا ساياباقتىڭ ورتاسىنا قويىلعان جاشىكتەرگە گۇل ەگىلەدى.
وكىنىشكە قاراي, قالادا جاڭادان سالىنعان اۋلاداعى بالالار ويىن الاڭىنىڭ جابدىعىن سىندىرۋ, ساياباقتاعى شامداردى ۇرلاۋ, قوقىستى كەز كەلگەن جەرگە تاستاپ كەتۋ وقيعالارى ازايماي تۇر. وسىعان وراي اۋلالاردىڭ تازالىعىن, تىنىشتىعىن ساقتاۋ ماقساتىندا 50-گە جۋىق جاڭا بەينەكامەرالار ورناتىلدى. ەندى ءاربىر اۋلا – زاماناۋي تەحنولوگيانىڭ قىراعى نازارىندا. بۇل باقىلاۋ قاتتى تۇرمىستىق قالدىقتاردى لاقتىرىپ كەتكەن تۇرعىنداردى اشكەرەلەۋگە, تازالىقتى ساقتاۋعا, قاۋىپسىزدىكتى ارتتىرۋعا ىقپال ەتەدى. كۇماندى ارەكەتتەردى انىقتاپ, دەر كەزىندە ەسكەرتۋ جاساۋعا مۇمكىندىك بەرەدى.
ۇلىتاۋ وبلىسى,
ساتباەۆ قالاسى
