«ارسەنال» قاتارىنان التى رەت جەڭىسكە جەتتى

استانا. 22 ناۋرىز. كەشە فۋتبولدان اعىلشىن پرەمەر-ليگاسىنىڭ 30-تۋرى اياسىندا 7 ويىن ءوتتى. نيۋكاسلداعى جەرگىلىكتى «نيۋكاسل يۋنايتەد» پەن لوندوننىڭ «ارسەنالى» اراسىنداعى ماتچ جانكۇيەرلەردىڭ ەرەكشە قىزىعۋشىلىعىن تۋدىردى. بۇل تۋرالى egemen.kz حابارلادى. ويىن تەڭ دارەجەدە ءوربىدى. دەسە دە, ۇزىلىسكە دەيىن ارسەن ۆەنگەردىڭ شاكىرتتەرى ەكى گول سوعىپ ۇلگەردى. كەزدەسۋدىڭ 24 جانە 28-مينۋتتارىندا وليۆە جيرۋ مەرگەندىگىمەن كوزگە ءتۇسىپ, ءدۋبلدىڭ اۆتورى اتاندى. الاڭ يەلەرى ەكىنشى كەزەڭنىڭ باسىندا ەسەپ ايىرماسىن قىسقارتقانىمەن (مۋسسا سيسسوكو 48), ودان ارىگە شامالارى جەتپەدى. ناتيجەسىندە, قوناقتار 2:1 ەسەبىمەن جەڭىسكە جەتتى. بۇل «ارسەنالدىڭ» بيىلعى چەمپيوناتتاعى 18-جەڭىسى. سونداي-اق, قاتارىنان التى رەت قارسىلاستارىنان باسىم ءتۇسىپ وتىر. بۇگىندە لوندوننىڭ كومانداسى تۋرنير كەستەسىندە 60 ۇپايمەن 3-ورىندا كەلەدى. ال «نيۋكاسل يۋنايتەد» 12-ساتىدا تۇر. 30 تۋردان كەيىن ولاردىڭ ەنشىلەرىندە 35 ۇپاي بار. اعىلشىن پرەمەر-ليگاسىندا ازىرگە 64 ۇپايمەن «چەلسي» كوش باستاپ كەلەدى. جوزە موۋرينو جاتتىقتىراتىن كوماندانىڭ بۇگىنگى ويىنىن ەسەپتەمەگەندە تاعى ءبىر كەزدەسۋى كەم ەكەنىن ايتا كەتەيىك. كەشە وتكەن قالعان ويىنداردىڭ ناتيجەلەرى: «مانچەستەر سيتي» – «ۆەست برومۆيچ» 3:0; «توتتەنحەم» – «لەستەر» 4:3; «ستوك سيتي» «كريستال پەلاس» 1:2; «ساۋتگەمپتون» – «بەرنلي» 2:0; «استون ۆيللا» – «سۋونسي» 0:1; «ۆەست حەم» – «ساندەرلەند» 1:0. بۇگىن مىنا كوماندالار جاسىل الاڭعا شىعادى: «ليۆەرپۋل» – «مانچەستەر يۋنايتەد»; كپر – «ەۆەرتون»; «حالل سيتي» – «چەلسي». ەلامان قوڭىر. دەرەك: egemen.kz. سۋرەت: footboom.com.