ديماش قۇدايبەرگەن العاش رەت مىسىر پيراميدالارى ماڭىندا ونەر كورسەتتى

ءانشى كورەرمەندەرگە جىلى لەبىزىن ءبىلدىردى.

«قوش كەلدىڭىزدەر, ءبىزدىڭ شوۋىمىزعا كەلگەندەرىڭىز ءۇشىن كوپ راقمەت, باعالى ۋاقىتتارىڭىزدى بولگەندەرىڭىزگە العىس ايتامىن», دەدى ول.

Dimashnews سايتىنىڭ جازۋىنشا ەجەلگى ميفتەر مەن تىلسىم تاريحقا تولى پيراميدالار كەشكى سيقىرلى جارىقتا ەرەكشە اتموسفەرا جاساپ, ءار انگە بولەك ءبىر وقيعا سىيلادى. ءار تۋىندىدا ديماش شاعىن سپەكتاكلدەگى باستى كەيىپكەرگە اينالدى: Fire جانە Smoke كومپوزيتسيالارىندا حاريزماتيكالىق جىگىت, «ليۋبوۆ ۋستاۆشيح لەبەدەي» انىندە – شىنايى سەزىمنىڭ نە ەكەنىن بىلەتىن ەر ادام, ال When I`ve Got You جانە SOS d’un terrien en détresse شىعارمالارىندا – ومىردەگى ەڭ قىمباتتى باعالاي بىلەتىن تۇلعا رەتىندە كورىندى.

سولتۇستىك, وڭتۇستىك, شىعىس جانە باتىسقا ءدال باعىتتالعان پيراميدالار قىرلارى سياقتى, ول دا تالانتىنىڭ بارلىق قىرىن اشتى. ساحنادا كلاسسيكالىق Olympico مەن Ave Maria-دان باستاپ, ەنەرگيالىق Be with me جانە Give me your love كومپوزيتسيالارىن دا ورىندادى. ال اراب تۇنىندە قازاقتىڭ ۇلتتىق اسپاپتارى – دومبىرا, قوبىز جانە سىبىزعىنىڭ ءۇنى Stranger, «اداي» كۇيى جانە «تاۋ ىشىندە», ء«دۇرداراز», Let it be اندەرىندەگى ۇلتتىق سازبەن ەرەكشە ۇيلەسىپ, كورەرمەنگە سيقىرلى اسەر سىيلادى.

كورەرمەندەر دە ءارتىستى شىن جۇرەكتەن قولدادى – بىرگە ءان ايتىپ, بيلەپ, قازاقستاننان كەلگەن جىلى سالەمدەردى قۋانا قابىلداپ, ءوز تاراپىنان دا ەموتسيامەن ءبولىستى. اسىرەسە «ۇمىتىلماس كۇن» جانە «ماحاببات بەر ماعان» اندەرى كەزىندە تەلەفون جارىقتارى جانىپ, پيراميدالار پانوراماسىنا سانسىز جۇلدىزداي اسەم كورىنىس بەردى.

ديماش تا كورەرمەندى كونتسەرتتىڭ باسىنان سوڭىنا دەيىن ءبىر ساتكە دە بوساتپادى. فينالدا زالعا ءۇشىنشى رەت ءتۇسىپ, Weekend ءانىن بيسكە ورىنداپ, شوۋعا نۇكتە ەمەس, الدا ءالى تالاي كەزدەسۋ مەن كونتسەرت بولاتىنىن مەڭزەيتىن جارقىن كوپنۇكتە قويدى.