پاتسيەنتتەر تالداۋ تاپسىرۋ, كت مەن مرت سەكىلدى زەرتتەۋلەردەن ءوتۋ ءۇشىن اپتالاپ, كەيدە ايلاپ كەزەك كۇتۋگە ءماجبۇر.
ءماجىلىس دەپۋتاتتارى دەنساۋلىق ساقتاۋ ءمينيسترى اقمارال ءالنازاروۆانىڭ اتىنا جولداعان ساۋالىندا سوڭعى جىلدارى مەديتسينالىق قىزمەتتەر باعاسىنىڭ وسكەنىن, ال قولجەتىمدىلىكتىڭ ەكى ەسەگە تومەندەگەنىن اتاپ ءوتتى. ولاردىڭ ايتۋىنشا, مەملەكەتتىك كلينيكالاردا قىزمەت كورسەتۋ مەرزىمدەرى سوزىلىپ كەتكەندىكتەن, ازاماتتار جەكە ورتالىقتارعا جۇگىنىپ, اقىلى زەرتتەۋلەرگە اقشا جۇمساۋعا ءماجبۇر.
دەپۋتاتتار ەگەر قاجەتتى قىزمەتتى مەملەكەتتىك ۇيىم كورسەتە الماسا, پاتسيەنتتەردى جەكە كلينيكالارعا جولداپ, شىعىندى مىندەتتى مەديتسينالىق ساقتاندىرۋ قورى ەسەبىنەن وتەۋدى ۇسىندى.
دەپۋتاتتىق ساۋالعا جاۋاپ بەرگەن دەنساۋلىق ساقتاۋ مينيسترلىگى كلينيكا 10 كۇن ىشىندە قاجەتتى قىزمەتتى ۇسىنا الماسا, پاتسيەنت باسقا مەديتسينالىق ۇيىمعا كەدەرگىسىز وتە الاتىنىن مالىمدەدى.
«ەگەر پاتسيەنت قوردىڭ رەەسترىندەگى جەتكىزۋشىلەر قاتارىندا بولسا, ول قاجەتتى قىزمەتتى الۋ ءۇشىن باسقا كلينيكانى تاڭداۋعا قۇقىلى. جولداما راسىمدەلگەن كەزدە تاڭدالعان كلينيكامەن كەلىسىمشارت اقپاراتتىق جۇيەدە اۆتوماتتى تۇردە جاسالادى», – دەلىنگەن مينيسترلىك حابارلاماسىندا.
مينيسترلىك مەملەكەتتىك ۇيىم قاجەتتى قىزمەتتى كورسەتە الماعان جاعدايدا پاتسيەنتتى جەكە كلينيكاعا جىبەرىپ, شىعىندى مىندەتتى مەديتسينالىق ساقتاندىرۋ قورى ارقىلى وتەۋ مۇمكىندىگى قاراستىرىلىپ جاتقانىن دا اتاپ ءوتتى.
ۇزاق كۇتۋ, جولداما بەرىلمەۋى نەمەسە زەرتتەۋ قولجەتىمسىزدىگىنە بايلانىستى قيىندىقتار تۋىنداعان جاعدايدا, ازاماتتارعا قوردىڭ بايلانىس ورتالىعىنا نەمەسە Qoldau 24/7 ءموبيلدى قوسىمشاسى ارقىلى شاعىمدانۋ ۇسىنىلادى.
