گەري بۇل جەتىستىككە جەتۋ ءۇشىن بىرنەشە اي بويى ەڭبەكتەنگەن. اۋەلدە وعان مۇنداي يدەيا 2023 جىلى كەلىپتى. سول جىلى Punky Loafster دەپ اتاعان العاشقى اسقاباق-قايىعىمەن 73,5 شاقىرىمدى ءجۇزىپ وتكەن ەدى. الايدا ءوزىنىڭ ناتيجەسىنە كوڭىلى تولماعان فەرمەر جاڭا سىناققا دايىندىقتى ەرتە كوكتەمنەن باستاپتى. بۇل جولى ول «كەمەسىن» Marchflower دەپ اتادى. اتاۋىنىڭ استارىندا سيمۆولدىق ءمان بار – ايگىلى «Mayflower» كەمەسىنە قۇرمەت جانە اسقاباقتىڭ ناۋرىز ايىندا توزاڭداندىرىلىپ, مامىردا جينالعانىنا يشارا.
كريستەنسەننىڭ ايتۋىنشا, جاڭا قايىق بۇرىنعىسىنان 136 كەلىگە جەڭىل بولعان. بىراق جەڭىل سالماق وعان ءوز رەكوردىن ايتارلىقتاي جاقسارتۋعا مۇمكىندىك بەردى.
«وتكەن جىلى وزەننىڭ مىنەزىن, اعىسىن, تولقىن باعىتىن باقىلاۋدى, ەسكەكتى دۇرىس پايدالانۋدى ۇيرەندىم. ال بيىل سول تاجىريبەنى تولىق قولدانىپ, جاڭا تاسىلدەردى مەڭگەردىم. ەڭ قيىنى, قىس بويى الىپ اسقاباق ءوسىرۋ بولدى. سەبەبى مۇنداي كولەمگە جەتۋ ءۇشىن ايلاپ كۇتىم قاجەت», دەيدى ول.
فەرمەردىڭ ايتۋىنشا, ول رەكوردتىق ساپارعا تاڭعى ۋاقىتتا شىققان. العاشقى ساعاتتاردا اۋا رايى مەن اعىس قولايلى بولعانىمەن, كەشكە قاراي جەل كۇشەيىپ, قايىقتى باعىتتا ۇستاۋ قيىنداعان. سوعان قاراماستان, گەري 20 ساعاتتان استام ۋاقىت بويى توقتاماي ەسكەك ەسىپ, ماقساتىنا جەتكەن.
الەمدىك رەكورد Guinness World Records ۇيىمى تاراپىنان رەسمي تۇردە تىركەلدى. بۇل – گەري كريستەنسەننىڭ ەكىنشى رەكوردى. بىراق فەرمەر مۇنىمەن شەكتەلمەك ەمەس. «مەن ءوزىمدى توقتاتپايمىن. كەلەسى جىلى جاڭا ماقسات قويدىم, ياعني ءجۇزۋ قاشىقتىعىن 100 شاقىرىمنان اسىرسام دەگەن ويىم بار. اسقاباق مەن ءۇشىن جاي كوكونىس ەمەس, تاباندىلىق پەن ەڭبەكتىڭ سيمۆولى», دەيدى ول.
اسقاباقتان قايىق جاساۋ اقش-تا سيرەك بولسا دا, كەڭ تاراعان ءداستۇردىڭ بىرىنە اينالعان. كەيبىر شتاتتاردا ءتىپتى «اسقاباق فلوتيلياسى» دەپ اتالاتىن جارىستار وتەدى. مۇنداي سايىستاردا قاتىسۋشىلار وزدەرى وسىرگەن الىپ اسقاباقتاردى ويىپ, سۋعا ءتۇسىرىپ, ەسكەكپەن ءجۇزۋ ارقىلى باق سىناسادى.
گەري كريستەنسەننىڭ جەتىستىگى سول ءداستۇردىڭ شەگىنەن شىعىپ, ونى الەمدىك دەڭگەيگە كوتەردى. ونىڭ «Marchflower» اتتى قايىعى بۇگىندە اسقاباقتان جاسالعان ەڭ ۇزاق ءجۇزۋدىڭ سيمۆولىنا اينالىپ وتىر.
