كورەر جارىعى بار پاتسيەنت ستاتسيونارعا اسا اۋىر حالدە, ەس-ءتۇسسىز جاعدايدا جەتكىزىلگەن. كومادا جاتقان ايەلدىڭ دەنەسىنىڭ سول جاق بولىگى جانسىزدانىپ, قيمىلسىزدىعى, ايقىن افازيا مەن مي قۇرىلىمدارىنىڭ زاقىمدانۋ بەلگىلەرى بايقالعان. ينسۋلت ورتالىعىنىڭ ساراپتامالارىنىڭ ناتيجەسىندن سۋباراحنويدالدىق-پارەنحيماتوزدىق قان قۇيىلۋى انىقتالادى, بۇل – ءينسۋلتتىڭ ەڭ قاۋىپتى ءتۇرىنىڭ ءبىرى. مۇنداي جاعدايدا جۇرەك قارىنشالارىنا قان كەتىپ, مي ىسىگى كۇرت ۇلعايادى.
مۇنداي وقيعالاردىڭ باسىم بولىگى ناۋقاس ءتىپتى اۋرۋحاناعا جەتپەي جاتىپ, قايعىلى اياقتالادى. الايدا بۇل جولى ءار مينۋت شەشۋشى ءرول اتقارعان. پاتسيەنتتى مۋلتيديستسيپلينارلىق توپ-نەۆرولوگ, رەانيماتولوگ, نەيروحيرۋرگتەر مەن انەستەزيولوگ ماماندار بىرلەسىپ قابىلدادى. كت-دان باستاپ انگيوگرافياعا دەيىنگى ءاربىر تەكسەرۋ كەزەڭى ءبولىم مەڭگەرۋشىلەرى مەن №4 قكا ينسۋلت ورتالىعى باسشىلىعىنىڭ قاتىسۋىمەن وتكەن كونسيليۋمدا تالقىلانىپ وتىردى.
كۇردەلى وپەراتسيا جاساۋ تۋرالى شەشىم شۇعىل قابىلدانىپ, ەمدەۋ ءادىسى كىدىرىسسىز قۇرىلىپ, تار بەيىندى ماماندار تولىق جۇمىلدىرىلدى. دارىگەرلەر پاتسيەنتتىڭ ءومىرى ءۇشىن كۇرەستە بىرىنەن سوڭ ءبىرى ءۇش وتا جاسادى.
«مي قۇرىلىمدارىنىڭ قىسىلۋ قاۋپى اسا جوعارى بولعانىن ەسكەرە وتىرىپ, پاتسيەنتكە ءۇش وتانى قاتارىنان جاساۋ قاجەت بولدى. ءبىرىنشىسى – جارىلعان انەۆريزمانى ەندوۆاسكۋليارلىق ەمبوليزاتسيالاۋ. بۇل – قاندى توقتاتىپ, قايتا جارىلۋدىڭ الدىن الۋعا مۇمكىندىك بەرەتىن زاقىمى از نەيروحيرۋرگيالىق ءادىس. ەكىنشىسى – سىرتقى قارىنشالىق درەناج ورناتۋ. ونىڭ ماقساتى – باسىشىلىك قىسىمدى تومەندەتىپ, مي ج ۇلىنى سۇيىقتىعىنىڭ اينالىمىن تۇراقتاندىرۋ. ءۇشىنشىسى – مي ىشىندەگى گەماتومانى الىپ تاستايتىن دەكومپرەسسيالىق وتا. بۇل اسا ءدال ميكروسكوپيالىق تەحنيكانى قاجەت ەتەتىن كولەمدى نەيروحيرۋرگيالىق ارالاسۋ», دەيدى الماتى №4 قالالىق كلينيكالىق اۋرۋحانا نەيروحيرۋرگى الدونگار ايساۋتوۆ.
كەيىن پاتسيەنتكە ۇزاق ۋاقىت جاساندى تىنىس الدىرۋ قاجەت بولعاندىقتان, تراحەوستوميا جاسالىپ, بۇل تىنىس الۋدى قاۋىپسىز جۇرگىزۋگە جانە اسقىنۋدىڭ الدىن الۋعا مۇمكىندىك بەرگەن. پاتسيەنت جانساقتاۋ بولىمىندە بىرنەشە كۇن جاتتى. وسى ۋاقىتتا ماماندار توبى مونيتورينگ جۇرگىزىپ, قارقىندى ەم-دوم قولدانىپ, باسىشىلىك قىسىمدى باقىلاۋ, نەيروپروتەكتيۆتىك شارالار, تىنىس الۋ, گەموديناميكانى تۇراقتاندىرۋ, سۋ-ەلەكتروليت تەپە-تەڭدىگىن تۇزەتۋ جۇمىستارىن جۇرگىزىپ وتىرعان. وسىجان كەيىن بىرتىندەپ ناۋقاستىڭ جاعدايى دۇرىستالا باستاعانى, كورسەتكىشتەرى جاقسارىپ, ءىسىنۋ ازايعانى بايقالادى. كوپ ۇزاماي ناۋقاس تىلگە كەلىپ, اياق-قولىنا جان بىتە باستايدى.
ومىرىنە تونگەن قاۋىپ سەيىلگەننەن كەيىن ناۋقاس بەيىندى نەيروحيرۋرگيا بولىمىنە اۋىستىرىلادى. ءۇي جاعدايىنداعى وڭالتۋ دا جاقسى ناتيجە بەردى. بۇل كينەزيوتەراپيا, لوگوپەديالىق جۇمىس, نەيروندىق بايلانىستاردى قالپىنا كەلتىرۋدەن تۇراتىن ۇزاق ءارى جۇيەلى ەڭبەك بولاتىن.
ءتورت اي وتكەن سوڭ دارىگەرلەردىڭ ءوزى بۇنى «دۇرىس تاڭدالعان تاكتيكانىڭ سيرەك كەزدەسەتىن, شابىت سىيلايتىن دالەلى» دەپ اتادى.
وسىلايشا ءبىر كۇنى №4 قكا نەيروحيرۋرگيا ءبولىمىنىڭ ورديناتورلار بولمەسىنە ءسوزى, ءجۇرىس-تۇرىسى تولىق قالپىنا كەلگەن – ۆالەنتينا دوروفەەۆا كىرىپ كەلەدى.
«مەن وسى اۋرۋحاناعا, ءوزىمدى ەمدەگەن دارىگەرلەرىمە, بارشا مەديتسينا قىزمەتكەرىنە شىن جۇرەكتەن ريزامىن. مۇندا تەك حيرۋرگتەر عانا ەمەس, ادامنىڭ ءومىرى سىنعا تۇسكەن ساتتە ارقايسى ءوز ءرولىن بىلەتىن تۇتاس كوماندا جۇمىس ىستەيدى», دەيدى ۆالەنتينا ميحايلوۆنا.
بۇل وقيعا – ميعا قاتىستى اۋىر زاقىمدانۋلار كەزىندە ۋاقتىلى ءارى ءتيىمدى كورسەتىلگەن مامانداندىرىلعان مەديتسينالىق كومەكتىڭ ايقىن ۇلگىسى. پاتسيەنتتى جۇرگىزۋ ۇدەرىسى №4 قكا مۋلتيديستسيپلينارلىق توبى تاراپىنان قر دسم قولدانىستاعى كلينيكالىق حاتتامالارىنا سايكەس جۇزەگە اسىرىلدى.
بيىل سوڭعى 10 ايدا نەيروحيرۋرگ ماماندار №4 قالالىق كلينيكالىق اۋرۋحانانىڭ ستاتسيونارىنا ينسۋلتپەن تۇسكەن 794 پاتسيەنت مەن جەدەل مي قان اينالىمىنىڭ بۇزىلۋى دياگنوزى قويىلعان پاتسيەنتتەرگە شامامەن 300 وتا جاساعان.
الماتى
