مەرەكەلىك جيىندى مادەنيەت جانە اقپارات مينيسترلىگى اقپارات كوميتەتىنىڭ توراعاسى الىشەر مۇقاجان قۇتتىقتاۋ سوزىمەن اشتى. ول ۇجىمنىڭ اقپارات ايدىنىنداعى ەڭبەگىن جوعارى باعالايتىنىن جەتكىزدى. سونىمەن قاتار «Qazcontent» اق باسقارما توراعاسىنىڭ ورىنباسارى سەرعالي بالاجان ءسوز سويلەپ, اتاۋلى كۇننىڭ ماڭىزىنا ايىرىقشا توقتالدى.
مەرەيتويعا پورتال اشىلعان كۇننەن باستاپ ەڭبەك ەتىپ, ونىڭ نەگىزىن قالاعان قىزمەتكەرلەر ارنايى شاقىرىلدى. ولار 15 جىلدىق تاريحتىڭ ەڭ قىزىق ءارى كۇردەلى ساتتەرىن ەسكە الىپ, ىزگى تىلەكتەرىن جەتكىزدى. BAQ.kz پورتالىنىڭ العاشقى باس رەداكتورى قامبار احمەتوۆ اقپاراتتىق سايتتىڭ دامۋىنا ۇلەس قوسقان ارىپتەستەرىنە العىس بىلدىرە وتىرىپ, ۇجىمدى قۇتتىقتادى.
– العاش قۇرىلعان كەزەڭدەر ەسىمىزدە. ءبىز مۇندا قىزمەت ەتە باستاعان كەزدە, 2000 جىلداردىڭ باسىنداعى مالىمەتتەردى ءجيى قاراپ وتىراتىنبىز. كەشە عانا سول دەرەكتەرگە قايتا كوز جۇگىرتسەك, ول ۋاقىتتا ەلىمىزدە شامامەن 2 700-گە جۋىق بۇقارالىق اقپارات قۇرالى بولعان ەكەن. سونىڭ بار بولعانى 19 پايىزى قازاق تىلىندە جۇمىس ىستەپتى. ال 2011 جىلى ەلىمىزدە 6 800-گە جۋىق سايت تىركەلگەن بولسا, ونىڭ ىشىندە 617-ءسى عانا قازاق تىلىندەگى رەسۋرس بولعان. بۇل – قازاق ينتەرنەتىنىڭ ەڭ كۇردەلى كەزەڭدەرىنىڭ ءبىرى ەدى. وسىنداي جاعدايدا مەملەكەتتىڭ ماڭىزدى قادامىنىڭ ءبىرى – BAQ.KZ اقپاراتتىق پورتالىن اشۋ بولدى.
العاشقى جىلدارى وبلىستىق جانە اۋداندىق گازەت-جۋرنالدارعا ارناپ ينتەرنەت پاراقشالارىن قۇرۋ ءىسىن قولعا الدى. 2015 جىلعا دەيىن ايماقتىق باسىلىمداردىڭ 270-تەن استام ونلاين نۇسقاسى وسى باستاما اياسىندا ىسكە قوسىلدى. پورتالدىڭ يدەياسى مەن تۇجىرىمداماسىن دايىنداۋعا سول كەزدەگى ارىپتەستەرىمىز ۇلكەن ەڭبەك ءسىڭىردى. مەن رەداكتور بولىپ كەلگەن كەزدە بولمەدە ءبىر قىزمەتكەر مەن ءبىر كومپيۋتەر عانا بولاتىن. كەيىن بىرتىندەپ كوماندا قالىپتاسىپ, تەحنيكا دا تۇگەلدەندى, – دەدى ول.
سونداي-اق قامبار احمەتوۆ ۇجىمعا «قازاق گازەتتەرى» جشس توراعاسى ديحان قامزابەك ۇلىنىڭ ارنايى قۇتتىقتاۋىن جەتكىزدى. ءتۇرلى مينيسترلىكتەردىڭ وكىلدەرى دە BAQ.KZ ۇجىمىنا ەلەۋلى ەڭبەگى ءۇشىن مينيسترلەرىنىڭ ارنايى قۇتتىقتاۋىن جەتكىزدى. ولار پورتالدىڭ قازاق تىلىندەگى اقپاراتتىق كەڭىستىكتى دامىتۋداعى ءرولىن اتاپ ءوتىپ, ۇجىمعا الداعى جۇمىستا دا تابىس تىلەدى.
پورتالدىڭ العاشقى ۇيلەستىرۋشى مامانى – جازيرا ماراتقىزى. ول سايتتىڭ ەڭ العاشقى قۇرىلىمىن رەتتەپ, ايماقتارمەن بايلانىس ورناتقان نەگىزگى مامان بولعان. جازيرا ماراتقىزى سول كەزەڭدە قازاق تىلىندەگى كونتەنتتى جۇيەلەۋ, رەداكتسيا جۇمىسىن جولعا قويۋ جانە پورتالدىڭ كۇندەلىكتى جۇمىسىن باقىلاۋ سىندى جاۋاپتى مىندەتتەردىڭ باسى-قاسىندا جۇرگەن. شاعىن كوماندامەن باستالعان جۇمىسقا جانىن سالىپ, اگەنتتىكتىڭ قالىپتاسۋىنا ۇلكەن ۇلەس قوسقان.
– العاشقى جىلدارى ءبىز اگرەگاتور ءرولىن اتقاردىق: قازاق تىلىندە شىققان بارلىق جاڭالىقتى, ماقالانى, اقپاراتتى ءبىر جەرگە جيناپ, وقىرمانعا ۇسىنۋعا تىرىستىق. ول ءۇشىن ايماقتىق گازەت-جۋرنالدارعا كومەك كورسەتىپ, ولاردى ينتەرنەتكە شىعارۋ ءىسىن قولعا الدىق. ەڭ باسىندا سايتقا كۇن سايىن شامامەن مىڭ ادام كىرەتىن. بۇل ءبىز ءۇشىن ۇلكەن كورسەتكىش ەدى. تاڭەرتەڭ جۇمىسقا كەلگەندە ەڭ ءبىرىنشى رەيتينگتى قاراپ, قانشا ادام سايتقا كىرگەنىن تەكسەرەتىنبىز. جارتى جىل وتپەي, بۇل كورسەتكىش 10 مىڭعا جۋىق بولدى. قازاقشا كونتەنتكە دەگەن سۇرانىستىڭ بار ەكەنىن سول كەزدە انىق سەزىندىك, – دەدى ول.
BAQ.KZ پورتالىن قالىپتاستىرۋدىڭ العاشقى تەحنيكالىق كەزەڭى دە وڭاي بولماعان. قازاق ينتەرنەتى ەندى عانا اياقتانىپ كەلە جاتقان ۋاقىتتا, پورتالدىڭ جۇمىسىن جولعا قويۋ ءۇشىن كاسىبي IT مامانداردىڭ تاباندى ەڭبەگى قاجەت بولدى. سول جاۋاپكەرشىلىكتى موينىنا العان مامان – ارشات وراز. ول BAQ.KZ-ءدىڭ تەحنيكالىق قۇرىلىمىن جاساپ, پورتالدىڭ تۇراقتى ءارى قاۋىپسىز جۇمىس ىستەۋىنە نەگىز قالاعان.
– سول كەزدەگى بايلانىس جانە اقپارات ءمينيسترى اسقار جۇماعاليەۆ بولاتىن. ول ماعان ارنايى حابارلاسىپ, قازاقشا اقپاراتتىق پلاتفورما جاساۋ كەرەكتىگىن ايتتى. پورتال 2010 جىلى قۇرىلعان كەزدە قازاق تىلىندە اقپارات تاراتاتىن سايتتار وتە از بولدى. BAQ.KZ سول ۋاقىتتان باستاپ ينتەرنەت جۋرناليستيكاسىنىڭ جەتەكشى كۇشىنە اينالدى دەۋگە بولادى. قازاقشا جاڭالىق جازاتىن باسقا سايتتار بولعانىمەن, كوپشىلىگى ۇلگى رەتىندە BAQ.KZ-دى قاراپ, تاقىرىپ قويۋ ءستيلىن, سۋرەت ورنالاستىرۋ ءتاسىلىن, كونتەنتتى بەرۋ فورماتىن ۇيرەنەتىن ەدى, – دەدى ول.
«Baq.kz» اقپارات اگەنتتىگىنىڭ باس رەداكتورى ءمولدىر باقبەرگەنوۆا قازىر جاڭا فورماتتارعا بەيىمدەلىپ, كوپتىلدى كونتەنتتى دامىتۋ, جاساندى ينتەللەكت تەحنولوگيالارىن ەنگىزۋ, جەدەلدىك پەن ساپانى قاتار ۇستاۋ باعىتىندا اۋقىمدى جۇمىس جۇرگىزىپ جاتقاندىعىن اتاپ ءوتتى.
– 15 جىلدىققا جاڭا جوبالارمەن قادام باستىق. ەڭ ۇلكەن جاڭالىقتىڭ ءبىرى – 2025 جىلدىڭ مامىرىندا ورىس ءتىلدى جاڭالىقتار لەنتاسىنىڭ قوسىلۋى. بۇعان دەيىن اگەنتتىك تەك قازاق تىلىندە اقپارات تاراتىپ كەلگەن بولاتىن. قازىرگى تەحنولوگيالىق كەزەڭدە BAQ.KZ جاساندى ينتەللەكتىنى العاش يگەرگەن مەديا رەسۋرستاردىڭ قاتارىندا. قازاق جانە ورىس رەداكتسيالارىنىڭ تىلشىلەرى ارىپتەستەرىنە مەديا-ترەنينگتەر وتكىزىپ, تاجىريبەسىن ءبولىسىپ ءجۇر,– دەدى اگەنتتىك باسشىسى.
سونىمەن قاتار «Qazcontent» اق باسقارما توراعاسىنىڭ ورىنباسارى سەرعالي اباي ۇلى اقپارات اگەنتتىگىنىڭ الداعى ۋاقىتتا اعىلشىن تىلىندە دە اقپارات تاراتۋ جوسپارى بار ەكەنىن اتاپ ءوتتى.
ءىس-شارا سوڭىندا BAQ.KZ اقپارات اگەنتتىگى قالىپتاسۋ كەزەڭدەرى تۋرالى ارنايى دەرەكتى فيلم كورسەتىلدى. وندا العاشقى جىلدارى اتقارىلعان جۇمىس, تەحنيكالىق جانە شىعارماشىلىق قيىندىقتار, پورتالدىڭ بۇگىنگى دەڭگەيگە دەيىنگى ءوسۋ جولى, قازىرگى جۇمىسى كورىنىس تاپتى. سونداي-اق اگەنتتىكتىڭ دامۋىنا ۇلەس قوسقان ماماندارعا ارنايى ماراپات تابىستالدى.
