استانا قالاسىنداعى ۇلتتىق اكادەميالىق كىتاپحانادا حالىقارالىق «16 كۇن زورلىق-زومبىلىقسىز» اكتسياسىنا ارنالعان دوڭگەلەك ۇستەل ۇيىمداستىرىلدى. دوڭگەلەك ۇستەل پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ۇيىمداستىرۋىمەن, بۇۇ-ايەلدەر قۇرىلىمىنىڭ تەحنيكالىق قولداۋىمەن وتكىزىلدى.
ءىس-شارا مەملەكەتتىك ورگاندار, حالىقارالىق ۇيىمدار, ساراپشىلار قاۋىمداستىعى جانە ازاماتتىق قوعام ينستيتۋتتارىنىڭ وكىلدەرىن بىرىكتىردى. قاتىسۋشىلار ايەلدەر مەن بالالاردىڭ قاۋىپسىزدىگىن نىعايتۋ بويىنشا جۇيەلى شارالاردى, سونداي-اق وسى سالاداعى مەملەكەتتىك ساياساتتى ودان ءارى جەتىلدىرۋ جولدارىن تالقىلادى.
«16 كۇن زورلىق-زومبىلىقسىز» اكتسياسى جىل سايىن 25 قاراشادان 10 جەلتوقسانعا دەيىن الەمنىڭ 90-نان استام ەلىندە وتكىزىلەدى جانە قوعامنىڭ زورلىق-زومبىلىق ماسەلەسىنە حاباردارلىعىن ارتتىرۋعا, زورلىققا نولدىك توزىمدىلىك مادەنيەتىن قالىپتاستىرۋعا باعىتتالعان. قازاقستان ءداستۇرلى تۇردە بۇل باستامانى قولدايدى, ال ۇلتتىق كوميسسيا ەلىمىز بويىنشا ءىس-شارالاردى ۇيلەستىرىپ, مەملەكەتتىك ورگاندار, ۇكىمەتتىك ەمەس ۇيىمدار جانە ازاماتتىق قوعام ينستيتۋتتارىنىڭ كۇش-جىگەرىن بىرىكتىرەدى.
دوڭگەلەك ۇستەلدىڭ مودەراتورى — ۇلتتىق كوميسسيا توراعاسىنىڭ ورىنباسارى, ۇلتتىق كەڭەس مۇشەسى, ادۆوكات جانە قۇقىق قورعاۋشى ايمان ۋماروۆا. ءىس-شارادا ءسوز سويلەۋشىلەر قاتارىندا كونستيتۋتسيالىق كەڭەستىڭ ءتورايىمى ەلۆيرا ازيموۆا, قازاقستانداعى بۇۇ-ايەلدەر قۇرىلىمىنىڭ وكىلى دجەرەن گيۋۆەن گيۋرەس جانە قر ادام قۇقىقتارى جونىندەگى ۋاكىلى ارتۋر لاستاەۆ بار.
دوڭگەلەك ۇستەلدە جەتەكشى ساراپشىلار مەن مەملەكەتتىك ورگانداردىڭ وكىلدەرى ءوز باياندامالارىن ۇسىندى. قر باس پروكۋرورىنىڭ ورىنباسارى كيبەرزورلىقتىڭ قازىرگى قاتەرلەرى جانە پروكۋراتۋرا تاراپىنان قابىلدانىپ جاتقان جاۋاپ شارالارى تۋرالى بايانداما جاسادى. «One-Stop-Service» جوباسىنىڭ ۇيلەستىرۋشىسى لياززات راكيشەۆا ۇلتتىق كوميسسيا باستاماسىن ىسكە اسىرۋ تاجىريبەسىمەن ءبولىستى. ادىلەت ۆيتسە-ءمينيسترى ايەلدەر مەن بالالاردى قورعاۋعا قاتىستى جاڭا زاڭنامالىق شارالاردى تالقىلادى, ال زۋلفيا بايساكوۆا داعدارىس ورتالىقتارىنىڭ ءبىرىنشى قورعاۋ جەلىسى رەتىندەگى ءرولىن جانە ەرتە ارالاسۋدىڭ ماڭىزدىلىعىن اتاپ كورسەتتى. ۇلتتىق كوميسسيانىڭ توراعا ورىنباسارى ەلەنا تاراسەنكو مەملەكەت, ۇكىمەتتىك ەمەس ۇيىمدار جانە حالىقارالىق ۇيىمداردىڭ 1325 رەزوليۋتسياسى اياسىنداعى سەرىكتەستىگى تۋرالى ايتىپ بەردى, ال زاڭ عىلىمدارىنىڭ دوكتورى مارات قوعاموۆ قىلمىستىق پروتسەستە ايەلدەردىڭ قاتىسۋ ەرەكشەلىكتەرىن ءتۇسىندىرىپ ءوتتى. بايان جاندوسوۆا زورلىق قۇرباندارىن قالپىنا كەلتىرۋ تاجىريبەسىمەن ءبولىستى.
ارنايى نازار رەپرودۋكتيۆتى دەنساۋلىقتى قورعاۋعا, ايەلدەردىڭ ەكونوميكالىق دەربەستىگىن ارتتىرۋعا, اكەلەردى پروفيلاكتيكالىق جۇمىسقا بەلسەندى تارتۋعا, سونداي-اق قاۋىپسىز قوعام قالىپتاستىرۋعا ارنالعان تسيفرلىق پلاتفورمالاردى دامىتۋعا باعىتتالماق. ءبىر مەزەتتە ۆەدومستۆولار اراسىنداعى ءوزارا ءىس-قيمىلدى كۇشەيتۋ جانە ازاماتتىق قوعام ينستيتۋتتارىمەن ءتيىمدى ارىپتەستىك ورناتۋ ماسەلەلەرى دە باستى نازاردا.
ۇلتتىق كوميسسيانىڭ مالىمدەۋىنشە, زورلىق-زومبىلىققا نولدىك توزىمدىلىكتى قالىپتاستىرۋ — ۇزاقمەرزىمدى ءارى جۇيەلى ءتاسىلدى تالاپ ەتەتىن پروتسەسس. بۇل باعىتتا قۇقىقتىق مادەنيەتتى دامىتۋ, مەملەكەتتىك ورگاندار, ساراپشىلار قاۋىمداستىعى جانە ۇكىمەتتىك ەمەس ۇيىمداردىڭ كۇش-جىگەرىن بىرىكتىرۋ شەشۋشى ءرول اتقارادى.
دوڭگەلەك ۇستەل سوڭىندا ايەلدەر مەن بالالاردى قورعاۋ باستامالارىن ىلگەرىلەتۋدەگى ۇلەسى ءۇشىن بەلسەندى قاتىسۋشىلار مەن ساراپشىلارعا العىس حاتتار تابىس ەتىلدى.
