فوتو: اقوردا
«بۇل وسىعان دەيىنگى ساياسي وزگەرىستەردىڭ زاڭدى جالعاسى دەۋگە بولادى. ءبىز «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتىن ورنىقتىرا تۇسەمىز, ياعني ەلىمىز پرەزيدەنتتىك رەسپۋبليكا بولىپ قالا بەرەدى», دەدى قاسىم-جومارت توقاەۆ.
جاڭا باستاما قوعامدا قىزۋ تالقىلانىپ جاتىر. پرەزيدەنتتىڭ ايتۋىنشا, پارلامەنتتىڭ قۇرىلىمىنا قاتىستى كوپتەگەن ۇسىنىس كەلىپ ءتۇسىپ جاتىر.
«مىسالى, دەپۋتاتتاردىڭ سانى حالىق سانىنا سايكەس, ياعني پروپورتسيونالدى بولۋعا ءتيىس دەگەن ويلار ايتىلۋدا. مۇنداي ۇستانىممەن قارايتىن بولساق, ولاردىڭ سانى 200 ادامعا جەتەدى. قازىر قوس پالاتادا 148 دەپۋتات بار. پارلامەنتتىك رەفورما – ەكى پالاتانى جاي بىرىكتىرە سالۋ دەگەن ءسوز ەمەس. مەنىڭشە, دەپۋتات سانىن تىم كوبەيتۋدىڭ قاجەتى جوق. كەرىسىنشە, وڭتايلاندىرۋ كەرەك, پارلامەنتتىڭ جۇمىسىن جەتىلدىرۋ قاجەت. مىسالى, ءبىر پالاتالى جاڭا پارلامەنتتە پرەزيدەنت كۆوتاسى بولمايدى. بارلىق دەپۋتاتتار بىردەي تارتىپپەن سايلانۋى قاجەت. بۇل – الداعى پارلامەنتتىك رەفورما اياسىندا جاسالاتىن اسا ماڭىزدى قادام. مۇنى جاقسى ۇعىنىپ, جۇرتشىلىققا كەڭىنەن ءتۇسىندىرۋ قاجەت», دەدى قاسىم-جومارت توقاەۆ.
سونىمەن قاتار مەملەكەت باسشىسى زاڭ شىعارۋ ورگانىنا بىلىكتى ءارى تاجىريبەلى ماماندار, ياعني ءوز ءىسىنىڭ مايتالماندارى كەلۋگە ءتيىس ەكەن تىلگە تيەك ەتتى.
ء«بىر سوزبەن ايتقاندا, ءبىز ناعىز كاسىبي پارلامەنتتى جاساقتاۋىمىز كەرەك. جاڭا كوميتەتتەر قۇرۋ ماسەلەسىن قاراستىرۋ قاجەت. تسيفرلاندىرۋ, ايماقتاردى دامىتۋ جۇمىسىمەن اينالىساتىن كوميتەتتەر ءوز الدىنا بولەك بولعانى ءجون دەپ سانايمىن. بۇل ماسەلەلەردى ارنايى جۇمىس توبى مۇقيات زەردەلەيدى. وسى رەفورماعا قاتىستى باسقا دا كوپتەگەن ۇسىنىستار بار. سونىڭ ءبارىن ابدەن پىسىقتاپ, كەيىن جاريالايمىز. مەنىڭ دە وسى اسا ماڭىزدى رەفورما بويىنشا ۇسىنىستارىم بار», دەدى مەملەكەت باسشىسى.
مەملەكەت باسشىسى جالپى, كونستيتۋتسيامىزعا ەنگىزىلەتىن تۇزەتۋ وتە كوپ بولۋى مۇمكىن ەكەنىن اتاپ ءوتتى.
«سوندىقتان رەفەرەندۋم بارىسىندا حالىق جاڭا اتا زاڭعا داۋىس بەرەتىن بولادى دەپ ايتساق, قاتەلەسپەيمىز. وسىنداي كۇردەلى, جاۋاپتى جاعدايدا ەلىمىزدە تىنىشتىق, تۇراقتىلىق بولۋى كەرەك. «زاڭ مەن ءتارتىپ» تۇجىرىمداماسىن ءبارىمىز ءبىر قوعام بولىپ ساقتاۋىمىز كەرەك. قۇقىق قورعاۋ ورگاندارى ءوز كاسىبيلىگىن كورسەتۋى قاجەت. ارانداتۋشىلارعا نەمەسە «لاس, كولەڭكەلى» ساياساتپەن اينالىسقىسى كەلەتىن ادامدارعا جول بەرمەيمىز», دەدى پرەزيدەنت.
