فوتو: اقوردا
مەملەكەت باسشىسىنىڭ پايىمىنشا, تسيفرلىق قازاقستاندى اۋىلدار مەن اۋىلدىق وكرۋگتەرسىز قۇرۋ مۇمكىن ەمەس.
«جاساندى ينتەللەكت پەن جاپپاي تسيفرلاندىرۋ داۋىرىندە بۇل ىسكە اۋىل اكىمدەرى دە بەلسەندى تۇردە اتسالىسقانى ءجون. ەلدى مەكەندەردى تسيفرلاندىرۋ اۋىل مەن قالا تۇرعىندارىنىڭ تۇرمىس ساپاسىن ايتارلىقتاي تەڭەستىرەدى. سوندىقتان ۇكىمەت بۇل باعىتتاعى جۇمىستى باستى باسىمدىقتاردىڭ ءبىرى رەتىندە قاراستىرۋى قاجەت», دەدى قاسىم-جومارت توقاەۆ.
پرەزيدەنت جەرگىلىكتى جەرلەردەن الىنعان ناقتى ءارى جەدەل اقپارات ورتالىقتا ءتيىمدى شەشىمدەر قابىلداۋعا مۇمكىندىك بەرەتىنىن اتاپ ءوتتى. سونداي-اق ەكونوميكالىق دەرەكقور نەگىزىن قالاپ, رەسۋرستاردى ءادىل بولۋگە ىقپال ەتەدى.
«الداعى ءۇش جىلدا قازاقستاندى تولىقتاي تسيفرلىق ەلگە اينالدىرۋ – جاڭا دامۋ كەزەڭىندەگى باستى مىندەتتەردىڭ ءبىرى. بولاشاقتا ەلىمىزدىڭ الەمدە الاتىن ورنى وسىعان تىكەلەي بايلانىستى. سوندىقتان مۇنى تىرشىلىك ءۇشىن تالاس دەسەك, ارتىق ايتقاندىق ەمەس», دەدى مەملەكەت باسشىسى.
