گەرمانيادان شىققان نەمىس ۆەلوسيپەدشىسى استاناعا جەتتى

استانا. 8 تامىز. بۇگىن گەرمانيادان ۆەلوسيپەدپەن شىققان نەمىس ساياحاتشىسى استاناعا جەتتى. ەنەرگيامەن جابدىقتاۋ, ورتالىقتان جىلىتۋ جانە تەلەكوممۋنيكاتسيالار سالاسىنداعى «جاسىل» تەحنولوگيالارمەن اينالىساتىن RTS نەمىس كومپانياسىنىڭ قىزمەتكەرى فولكەر شتيۋۆەنىڭ مۇنداي ساپار جاساۋداعى ماقساتى – ەكسپو-2017 كەشەنىنىڭ نىساندارىمەن تانىسۋ. شىلدەنىڭ باسىندا ول تۋعان قالاسى بيلەفەلدتەن (گەرمانيا) شىعىپ, استاناعا دەيىنگى 5 200 شاقىرىمدىق جولدى جارىس ۆەلوسيپەدىمەن ءجۇرىپ ءوتتى. بۇل تۋرالى egemen.kz حابارلادى. ۆەلوسيپەدشى 40 كۇنگە سوزىلعان ساياحاتىن 4 شىلدە كۇنى RTS كومپانياسىنىڭ بيلەفەلدتەگى شتاب-پاتەرىنەن باستادى. بالتىق ەلدەرى مەن رەسەي اۋماعىن باسىپ وتكەن ول 8 تامىزدا استاناعا جەتتى. ونى «ەكاتەرينبۋرگ-استانا» تاسجولىندا ءبىر توپ جەرگىلىكتى ۆەلوسيپەدشى قارسىلاپ, ەلوردانىڭ ورتالىق كوشەلەرىمەن الىپ ءجۇردى. ساياحاتىن كورمەنىڭ قۇرىلىس الاڭىندا اياقتاعان شتيۋۆەنى ول جەردە «استانا ەكسپو-2017» ۇلتتىق كومپانياسىنىڭ وكىلدەرى كۇتىپ الدى. «ءبىز ءسىزدى ەكسپو-2017 اۋماعىندا قارسى الىپ تۇرعانىمىزعا قۋانىشتىمىز. ءسىز ەكولوگيالىق تازا كولىك جانە جاسىل تەحنولوگيالار ءداۋىرى باستالعانىنىڭ جارقىن ۇلگىسىن كورسەتىپ وتىرسىز. استانادا وتكىزىلەتىن كورمە تاجىريبە الماسۋ مەن يننوۆاتسيالىق جەتىستىكتەردى كورسەتۋگە ارنالعان جاھاندىق الاڭعا اينالاتىن بولادى», – دەپ اتاپ ءوتتى «استانا ەكسپو-2017» ۇلتتىق كومپانياسىنىڭ وكىلى ساۋلە بولەباەۆا. سونداي-اق, قۇرىلىستىڭ قارقىنى تۋرالى اڭگىمەلەگەن ول قوناققا ارنايى ەستەلىك سىيلىقتار تابىس ەتتى. ودان بولەك, نەمىس ۆەلوسيپەدشىسى سالىنىپ جاتقان نىساندارمەن تانىسىپ, كەشەندى ارالاپ كوردى. ۆەلوجورىقتىڭ سوڭعى 100 شاقىرىمىندا شتيۋۆەگە ونىڭ ارىپتەسى, RTS كومپانياسىنىڭ باسشىسى ديرك شاۋمبۋرگ قوسىلدى. كومپانيانىڭ گەوتەرمالدى جىلۋمەن قامتاماسىز ەتەتىن ءونىمى ەكسپو-2017 نىساندار قۇرىلىسىندا پايدالانىلادى دەپ جوسپارلانعان. «قۇشاق جايا قارسى الىپ, ەكسكۋرسيا ۇيىمداستىرعاندارىڭىز ءۇشىن العىس بىلدىرەمىن. قازىردىڭ وزىندە ەكسپو-2017 جوباسى ءوزىنىڭ اۋقىمىمەن جانە ماقساتى بيىك جوسپارلارىمەن تاڭقالدىرۋدا. سوندىقتان ەكى جىلدان كەيىن وتباسىممەن استاناعا مىندەتتى تۇردە كەلەمىن», – دەيدى فولكەر شتيۋۆە. ەلامان قوڭىر. دەرەك: egemen.kz. سۋرەت: expo2017astana.com.