تەرگەۋ نۇسقاسىنا سايكەس, ەرلى-زايىپتىلار اراسىنداعى جانجال قايعىلى وقيعاعا دەيىن شامامەن ەكى اپتا بۇرىن باستالعان. سول كەزدە ايزات جۇمانوۆا مەن ايبار جانبولات اراسىندا داۋ شىعىپ, ايەل ەموتسياعا بەرىلىپ, ءوزىنىڭ تەلەفونىن سىندىرعان. وسى وقيعادان كەيىن ولار ءبىر-بىرىمەن سويلەسپەي جۇرگەن.
قايعىلى وقيعا بولاتىن كۇنى ايبار جانبولات الكوگولدىك ماس كۇيىندە ۇيگە ورالىپ, جۇبايىنىڭ بىرەۋمەن تەلەفون ارقىلى سويلەسىپ وتىرعانىن كورگەن. پروكۋروردىڭ ايتۋىنشا, وسى جاعدايدان كەيىن ەر ادامدا قىزعانىشتىڭ نەگىزىندە ايەلىن ءولتىرۋ نيەتى قالىپتاسقان.
تەرگەۋ دەرەگىنشە, تۇنگى ساعات 00:00 شاماسىندا ايبار جانبولات ايزات جۇمانوۆانى جەتىسۋ وبلىسى بالاساز اۋىلىنداعى ءۇيدىڭ قاقپاسىنان سىرتقا شىعارىپ, ايەلدىڭ دەنەسىنىڭ ءارتۇرلى بولىگىنە قولىمەن جانە اياعىمەن بىرنەشە رەت سوققى جاساعان. جابىرلەنۋشى توقتاتۋدى سۇراعانىنا قاراماستان, ايىپتالۋشى ومىرگە ماڭىزدى ورگاندارعا سوققى بەرۋدى جالعاستىرعان. ايەل ەسىنەن تانىپ قالعان, الايدا سوققى بەرۋ ارەكەتى توقتاماعانى ايتىلادى.
اۋىر جاراقات العان ايزات جۇمانوۆانى كۇيەۋى تالدىقورعانداعى وبلىستىق اۋرۋحاناعا جەتكىزگەن. الايدا ول رەانيماتسيا بولىمىندە كوز جۇمدى.
ايبار جانبولاتقا قىلمىستىق كودەكستىڭ 99-بابىنىڭ 1-بولىگى بويىنشا «كىسى ءولتىرۋ» بابى تاعىلىپ وتىر. قىلمىستىق ءىس جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قارالۋدا.
