وبلىس اكىمى نۇرلىبەك نالىباەۆ قالا تۇرعىندارىن, ۇستازدار مەن وقۋشىلاردى قۇتتىقتاپ, جينالعان جۇرتشىلىققا تىلەگىن جەتكىزدى.
«باسەكەگە قابىلەتتى, زاماننىڭ جاڭا شاقىرتۋلارىنا دايىن, وزىق ويلى ۇرپاق تاربيەلەۋ – مەملەكەت الدىنداعى ستراتەگيالىق ماڭىزدى ماسەلە. ايماقتىڭ ءبىلىم سالاسىندا اۋقىمدى جوبالار جۇزەگە اسىرىلىپ جاتىر. كەيىنگى ءۇش جىلدا سالاعا 812 ملرد 245 ملن تەڭگە, بيىل 346 ملرد 800 ملن تەڭگە ءبولىندى. وتكەن جىلى 31 ملرد 800 ملن تەڭگەگە 13 ءبىلىم بەرۋ ۇيىمى جاڭادان اشىلدى. مەملەكەت باسشىسىنىڭ باستاماسىمەن سالىنعان «كەلەشەك مەكتەپتەرى» شاكىرتتەردى زامان تالابىنا ساي وقىتۋ مەن تاربيەلەۋدە جاڭا مۇمكىندىكتەرگە جول اشادى. ساناسى سەرگەك, ويى ۇشقىر, باسەكەگە قابىلەتتى وقۋشىلارىمىزدىڭ قاتارى كوبەيسىن», دەدى نۇرلىبەك نالىباەۆ.
جالپى, سىر وڭىرىندە «كەلەشەك مەكتەپتەرى» ۇلتتىق جوباسى اياسىندا 54 ملرد 391 ملن تەڭگەگە 10 جاڭا مەكتەپ بوي كوتەرگەن. 2023 جىلدان بەرى 5 ملرد 700 ملن تەڭگەگە 9 مەكتەپتىڭ جانىنان قوسىمشا عيمارات بوي كوتەردى. وسىلايشا وڭىردەگى ءۇش اۋىسىمدىق مەكتەپتەر ماسەلەسى تۇبەگەيلى شەشىمىن تاپتى.
وقۋ-اعارتۋ ءمينيسترى جۇلدىز سۇلەيمەنوۆا يننوۆاتسيالىق مەكتەپتەر يگىلىگى قالا مەن اۋىلعا ورتاق بولۋى مەملەكەتتىك ءبىلىم ساياساتىنىڭ جارقىن جەمىسى ەكەندىگىن اتاپ ءوتتى. «كەلەشەك مەكتەپتەرى» مەملەكەتتىك ءبىلىم وشاقتارىنىڭ زاماناۋي ارحيتەكتۋرالىق-ينفراقۇرىلىمدىق ستاندارتارعا سايكەس جاڭارۋىنا سەرپىن بەرىپ وتىر.
مينيستر ءوڭىر ءبىلىم ساپاسىنىڭ كورسەتكىشتەرى بويىنشا كوش باسىندا تۇرعانىنا توقتالدى.
سالتاناتتى شارادا ءبىلىم سالاسىنىڭ دامۋىنا ەلەۋلى ۇلەس قوسقان ۇستازدار مەن ءبىلىم وشاعىن سالعان مەردىگەر مەكەمە ماماندارى وبلىس اكىمىنىڭ العىس حاتىمەن ماراپاتتالدى.
قىزىلوردا
