بۇل باستاما ءوڭىردىڭ 8 اۋدانى مەن 2 قالاسىن قامتىپ, مەكتەپتەر مەن كوللەدجدەردە كەڭ كولەمدى اقپاراتتىق-ءتۇسىندىرۋ دارىستەرى وتكىزىلدى. وقىتۋعا رەسپۋبليكا بويىنشا تانىلعان جەتەكشى ماماندار شاقىرىلىپ, ساباقتار ينتەراكتيۆتى, تاجىريبەگە نەگىزدەلگەن, تىڭ فورماتتا جۇرگىزىلدى.
كوشباسشىلىق باعىتى بويىنشا گۇلنار تويلىباەۆا ءدارىس وتكىزىپ, ماقسات قويۋ, شەشىم قابىلداۋ, ۋاقىتتى ءتيىمدى باسقارۋ, ەموتسيالىق تۇراقتىلىق, كوماندامەن جۇمىس ىستەۋ سياقتى ومىرلىك ماڭىزدى داعدىلاردى ۇيرەتتى. قاتىسۋشىلار رولدىك ويىندار, كەيستەر, توپتىق تاپسىرمالار ارقىلى وزدەرىنىڭ كوشباسشىلىق قابىلەتتەرىن دامىتىپ, جاڭا مۇمكىندىكتەردى اشتى.
قارجىلىق ساۋاتتىلىق بويىنشا اسەل جاراسقاليقىزى جەكە بيۋدجەتتى باسقارۋ, جيناق پەن ينۆەستيتسيانىڭ نەگىزدەرى, تسيفرلىق قارجى قۇرالدارى, الاياقتىقتان قورعانۋ جولدارى تۋرالى جان-جاقتى ءتۇسىندىردى. پراكتيكالىق تاپسىرمالار قاتىسۋشىلارعا ءوز قارجىسىنا سەنىمدىلىكپەن قاراۋدى, جوسپارلاۋ داعدىسىن قالىپتاستىرۋدى جانە قارجىلىق تاۋەلسىزدىككە قادام جاساۋدى ۇيرەتتى.
قۇقىقتىق ساۋاتتىلىق باعىتى بويىنشا ەرجان جانات ۇلى داۋلەتباەۆ ازاماتتىق قۇقىق, قۇجاتتارمەن جۇمىس, وتباسىلىق قۇقىق, تۇتىنۋشىلاردىڭ قۇقىقتارىن قورعاۋ, كيبەرقاۋىپسىزدىك سەكىلدى وزەكتى ماسەلەلەردى قاراپايىم ءارى تۇسىنىكتى تىلمەن جەتكىزدى. ناقتى ومىرلىك جاعدايلار نەگىزىندە وتكىزىلگەن پراكتيكالىق جاتتىعۋلار قاتىسۋشىلاردىڭ قۇقىقتىق مادەنيەتىن كوتەرىپ, ءوز قۇقىعىن قورعاۋعا دەگەن سەنىمىن ارتتىردى.
كۋرس ەسكەلدى اۋدانىنداعى «تاۋ جەتىسۋ» دەمالىس ايماعىندا ۇيىمداستىرىلىپ, قاتىسۋشىلارعا جايلى جاعداي جاسالدى, ادىستەمەلىك ماتەريالدار, پايدالى نۇسقاۋلىقتار مەن رەسۋرستار ۇسىنىلدى. جوبا بارىسى وڭىرلىك جانە رەسپۋبليكالىق مەديا كەڭىستىكتە كەڭىنەن جاريالانىپ, قوعامدا جوعارى قىزىعۋشىلىق تۋدىردى.
بۇل جوبا – ءوڭىر ايەلدەرىنىڭ ءبىلىمىن تەرەڭدەتۋگە, ولاردىڭ ءوز-وزىنە دەگەن سەنىمىن كۇشەيتۋگە, كوشباسشىلىق الەۋەتىن اشۋعا جانە قوعامدىق بەلسەندىلىگىن ارتتىرۋعا ۇلكەن سەرپىن بەرگەن ماڭىزدى قادام. جوبانىڭ ناتيجەسىندە كوپتەگەن قاتىسۋشى جاڭا مۇمكىندىكتەرگە جول اشىپ, ءوز ومىرىنە وزگەرىس ەنگىزۋ ءۇشىن ناقتى, سەنىمدى قادامدار جاساي باستادى.
