فوتو:akorda.kz
مەملەكەتتىك كەڭەسشى ەرلان قارين ءوزىنىڭ ماقالاسىندا, قوعامدا جاڭا ەتيكا مەن قۇندىلىقتاردى ورنىقتىرۋ قۇرعاق ۇرانمەن ەمەس, كەزەڭ-كەزەڭىمەن جۇرگىزىلەتىن جۇيەلى ساياسات ارقىلى جۇزەگە اساتىنىن ايتتى.
«قوعامدا جاڭا ەتيكا مەن قۇندىلىقتار جۇيەسىن ورنىقتىرۋ – ءبىر كۇندە اتقارىلاتىن شارۋا ەمەس, بۇل كەزەڭ-كەزەڭىمەن جۇزەگە اسىرىلاتىن جۇمىس. وعان قۇرعاق ۇران, جىلتىراق يدەولوگيامەن قول جەتكىزۋ – بوس اۋرەشىلىك. بۇل جەردە جالاڭ ۇگىت-ناسيحات ءتيىمسىز. ءتىپتى كەرى اسەر ەتۋى – ىقتيمال. بۇل ءبىزدىڭ جولىمىز ەمەس. ءبىز جۇمىستىڭ ءوز ىرعاعىمەن, ءوز ارناسىمەن جۇرگەنىن قالايمىز. ساياسي پىكىر الۋاندىعى جانە ءسوز بوستاندىعى جاعدايىندا ەڭ دۇرىس قادام دا وسى بولماق. ءبىز جۇيەلى مەملەكەتتىك ساياسات ارقىلى ادامدار اراسىندا قوعامدىق ادەپ مادەنيەتىن دامىتۋدى كوزدەپ وتىرمىز. كەيىنگى ۋاقىتتا جۇرگىزىلىپ جاتقان جۇمىسىمىزدىڭ بارلىعى وسىعان سايادى, دەيدى ول.
ەرلان قارين جاڭا ساياساتتىڭ نەگىزگى ەلەمەنتىنىڭ ءبىرى رەتىندە «زاڭ جانە ءتارتىپ» قاعيداتى ايقىندالعانىن ايتتى. بۇل – جەكە ادام مەن قوعامدىق قاۋىپسىزدىكتىڭ ىرگەتاسى.
«پرەزيدەنت قاسىم-جومارت توقاەۆ ايتقانداي, «زاڭ جانە ءتارتىپ» مەملەكەتتىك قۇرىلىستىڭ باستى قاعيداتى بولىپ قالا بەرەدى. البەتتە, زاڭدىلىقتى ساقتاۋ – مەملەكەتتىڭ بىردەن-ءبىر باستى مىندەتى. بىراق قوعامنىڭ قولداۋىنسىز بۇل ىستە ناقتى ناتيجەگە قول جەتكىزۋ قيىن. سول ءۇشىن قوعامدا قانداي دا ءبىر قۇقىق بۇزۋشىلىققا, اگرەسسيا مەن زورلىق-زومبىلىققا قارسى يممۋنيتەت قالىپتاستىرۋ ماڭىزدى. ارينە, بۇل ءبىر كۇندە ناتيجە بەرمەيدى. دەگەنمەن مەملەكەتىمىز ۇستانعان «زاڭ جانە ءتارتىپ» قاعيداتى قازىردىڭ وزىندە قوعامداعى وڭ وزگەرىستەرگە ىقپال ەتىپ وتىر», دەيدى مەملەكەتتىك كەڭەسشى.
ونىڭ ايتۋىنشا, كەيىنگى بەس جىلدا قىلمىستىق قۇقىق بۇزۋشىلىقتار ەكى ەسە ازايدى. قوعامدىق ورىندارداعى قىلمىس دەڭگەيى 80 پايىزعا قىسقاردى. زاڭعا باعىنۋ مادەنيەتىن ورنىقتىرۋ قوعامدى جاڭا ساپالىق دەڭگەيگە كوتەرەدى.
