يندۋستريالىق ايماق 12 گەكتار جەرگە سالىنادى. باسقارۋشى كومپانيا « ۇلىتاۋ الەۋمەتتىك كاسىپكەرلىك كورپوراتسياسى» اق بولماق. اۋقىمدى جوبا بيىل باستالدى.
يندۋستريالىق ايماقتى قۇرۋداعى نەگىزگى مىندەت – قالانىڭ وندىرىستىك الەۋەتىن ارتتىرۋ, جاڭا ءوندىرىس ورىندارىن اشىپ, ساتباەۆ قالاسى تۇرعىندارىن جۇمىسپەن قامتۋعا سەرپىن بەرۋ.
قازىر ينجەنەرلىك-كوممۋنيكاتسيالىق ينفراقۇرىلىم جۇمىستارى باستالدى. ساتباەۆ قالاسى اكىمدىگى يندۋستريالىق ايماققا قاجەتتى ينجەنەرلىك-كوممۋنيكاتسيالىق ينفراقۇرىلىمدى سالۋعا ارنالعان ءۇش جوبالاۋ-سمەتالىق قۇجات ازىرلەدى. ونىڭ ىشىندە ەكەۋىنە جسق مەرزىمىنىڭ وتۋىنە بايلانىستى تۇزەتۋ ەنگىزىلەدى.
قولدانىستاعى «ساتباەۆ قالاسىنداعى يندۋستريالىق پاركتىڭ ينجەنەرلىك-كوممۋنيكاتسيالىق ينفراقۇرىلىمىن سالۋ» جوباسىمەن ۇلىتاۋ وبلىسىنىڭ قۇرىلىس, ساۋلەت جانە قالا قۇرىلىسى باسقارماسى مەملەكەتتىك ساتىپ الۋ كونكۋرسىن وتكىزدى. ناتيجەسىندە, «ناز» جشس-مەن 802,4 ملن تەڭگە كولەمىندە شارت جاسالدى. قۇجاتتا قۇرىلىستى 2025 جىلعى قاراشادان باستاپ, 2026 جىلعى ماۋسىمدا اياقتاۋ جوسپارلانعان.
ءبىز يندۋستريالىق ايماققا بولىنگەن جەردە جۇرگىزىلىپ جاتقان جۇمىس بارىسىمەن تانىستىق. جوبا اياسىندا يندۋستريالىق ايماققا دەيىن جۇرگىزىلەتىن ەلەكترمەن جابدىقتاۋ جەلىلەرىنىڭ جالپى ۇزىندىعى 35 كۆ (483 م) جانە ەلەكترلىك قوسالقى ستانسا 35/6 كۆ – 1 دانا, سۋ قۇبىرى جەلىلەرىنىڭ جالپى ۇزىندىعى – 1727,8 م, كارىز جەلىلەرىنىڭ جالپى ۇزىندىعى – 1352,4 م, جىلۋ جەلىلەرىنىڭ جالپى ۇزىندىعى 482 مەتر بولماق.
«بۇل ايماققا 12 گەكتار جەر بولىنگەن, ونى 50 گەكتارعا دەيىن ۇلعايتۋ مۇمكىندىگى بار. باسقارۋشى كومپانيا رەتىندە ۇلىتاۋ الەۋمەتتىك كاسىپكەرلىك كورپوراتسياسى بەلگىلەندى. بيىل ينجەنەرلىك – كوممۋنيكاتسيالىق ينفراقۇرىلىم جەلىلەرىن تارتۋ جۇمىستارى باستالدى. قازىر «ناز» كومپانياسى سۋىق سۋ جەلىلەرىن تارتۋ جۇمىستارىن جۇرگىزىپ جاتىر. يندۋستريالىق ايماقتىڭ باستى ماقساتى – ءبىزدىڭ وڭىرىمىزگە كەلەتىن شەتەلدىك جانە وتاندىق ينۆەستورلارعا قولايلى جاعداي جاساۋ. ينجەنەرلىك – كوممۋنيكاتسيالىق ينفراقۇرىلىم مەملەكەت ەسەبىنەن جۇرگىزىلەدى. وبلىستىق, جەرگىلىكتى بيۋدجەتتەن قارجىلاندىرىلادى», دەيدى ساتباەۆ قالاسى اكىمىنىڭ ورىنباسارى ەرلان سەرىك ۇلى.
بيىل جىل سوڭىنا دەيىن ەنەرگيامەن, سۋمەن, جىلۋمەن جابدىقتاۋ قولعا الىنباق. الدىمەن سۋمەن جابدىقتاۋ جۇمىسى باستالعان. بۇل – كەلەسى جىلى دا جالعاسىن تاباتىن اۋىسپالى جوبا سانالادى. سونىمەن قاتار اكىمشىلىك قىزىعۋشىلىق تانىتقان ينۆەستورلارمەن كەلىسسوزدەر جۇرگىزىپ جاتىر. وسى وڭىردە نەندەي نىساندار سالىناتىنى الداعى ۋاقىتتا بەلگىلى بولادى. ينجەنەرلىك – كوممۋنيكاتسيا-لىق ينفراقۇرىلىم قۇرىلىسى قاراشا ايىندا باستالدى. قۇرىلىس جۇمىسى 2026 جىلدىڭ ماۋسىمىنا دەيىن اياقتالۋعا ءتيىس. ودان كەيىن ەكى جوبالىق-سمەتالىق قۇجاتتاما بار. ول – جول, تەمىرجول تۇيىعى جانە ونى اباتتاندىرۋ. وسى جۇمىستار دا قوسا اتقارىلادى. بۇل قۇرىلىس الداعى جىلى باستالادى.
يندۋستريالىق ايماقتىڭ ينفراقۇرىلىمىمەن تانىسىپ كوردىك: قۋاتى 2,9 مۆت-عا دەيىن, كەرنەۋى 35 كۆ-عا دەيىنگى ەنەرگيامەن جابدىقتاۋ, تاۋلىگىنە 57,8 تەكشە مەتر كولەمىندە سۋمەن جابدىقتاۋ, ساعاتىنا 2,8 گكال جىلۋمەن جابدىقتاۋ, تاۋلىگىنە 96 تەكشە مەتر كارىز جۇيەسى, ۇزىندىعى 145 م جانە 151 م اۆتوكولىك كىرمە جولدارى, 5 ۆاگونعا ارنالعان, ۇزىندىعى 1,7 كم تەمىرجول تۇيىعى كەلەشەكتە ساتباەۆ قالاسىنىڭ يگىلىگىنە اينالماق.
جۇمىس باسىندا جۇرگەن مەردىگەر كومپانيانىڭ وكىلى, وسى جوبانىڭ باسشىسى جەڭىسحان باتىرحان ۇلى قۇرىلىستى مەجەلى مەرزىمدە اياقتاۋعا كۇش سالاتىنىن جەتكىزدى. ء«بىزدىڭ جۇمىسىمىز – قۇبىر تارتۋ. وسى نىسانداعى ينجەنەرلىك جۇيە ءتورت بولىكتەن تۇرادى. اتاپ ايتقاندا, ەلەكتر قۋاتى, سۋ, كارىز جانە جىلۋ جەلىلەرى. سۋ جۇيەسىن تارتۋ شارۋاسىن ورتالاپ قالدىق, جىلدىڭ سوڭىنا دەيىن اياقتايمىز. قالعان جۇمىستى 2026 جىلدىڭ ماۋسىمىنا قاراي تياناقتايمىز», دەيدى ج.باتىرحان ۇلى.
جۇمىس قىزۋ ءجۇرىپ جاتقان اۋماقتاعى مەردىگەر كومپانيا الماتى قالاسىنان كەلگەن. بارلىعى 12 ادام جۇمىس ىستەپ جاتىر. ونىڭ ىشىندە نىساننىڭ باسشىسى, ينجەنەر, بريگادير, جۇمىسشىلار, مەحانيزاتورلار بار. ساتباەۆ قالاسى تەحنيكامەن قامتاماسىز ەتىپ وتىر. قۇرىلىس جۇمىسىنا قاجەتتى جابدىقتار قولجەتىمدى. ورناتىپ جاتقان قۇبىرلاردى قاراعاندى وبلىسىنىڭ ساران قالاسىنان الدىرعان.
يندۋستريالىق ايماق ساتباەۆ قالاسىنىڭ وندىرىستىك الەۋەتىن ارتتىرىپ, جاڭا ينۆەستيتسيالىق جوبالاردىڭ ىسكە اسۋىنا جانە جۇمىس ورىندارىنىڭ ارتۋىنا مۇمكىندىك بەرەدى. جوبا ءوڭىر ەكونوميكاسىنىڭ تۇراقتى دامۋىنا ءارى جاڭا وندىرىستەردىڭ قالىپتاسۋىنا سەرپىن بەرمەك.
ۇلىتاۋ وبلىسى
