«كوكپار – جاي عانا ۇلتتىق سپورت ەمەس. بۇل – ءبىزدىڭ تاريحىمىزدىڭ قاينارى, ەرلىك, ەپتىلىك پەن بىرلىكتىڭ ءرامىزى. بۇگىن قاراساي اۋدانىنا ەڭ مىقتى ويىنشىلار ءوز شەبەرلىگىن, جەڭىسكە دەگەن جىگەرىن, حالقىمىزدىڭ سپورتتىق داستۇرلەرىنە دەگەن قۇرمەتىن كورسەتۋگە جينالدى. مۇنداي سايىستار بۇقارالىق سپورتتى دامىتۋعا, ۇلتتىق سپورت تۇرلەرىن ناسيحاتتاۋعا, جاستاردى پاتريوتيزم مەن سالاماتتى ءومىر سالتىنا تاربيەلەۋگە ىقپال ەتەدى. سپورتشىلارعا ساتتىلىك, ادەمى ءارى ءادىل ويىن, ءتوزىم مەن جىگەر تىلەيمىن», دەدى وبلىستىق دەنە شىنىقتىرۋ جانە سپورت باسقارماسىنىڭ باسشىسى اقجۇرەك تاڭاتاروۆ.
بيىلعى ءساۋىر ايىنداعى «دەنە شىنىقتىرۋ جانە سپورت تۋرالى» زاڭعا ەنگىزىلگەن تۇزەتۋلەرگە سايكەس, ۇلتتىق سپورت تۇرلەرى وليمپيادالىق سپورتپەن قاتار, رەسمي تۇردە باسىم باعىت رەتىندە تانىلدى.
«بۇگىندە ەلىمىزدە اتا-بابا سپورتىن دامىتۋ جولىندا كەلەلى ىستەر قولعا الىندى. قارجىلاندىرۋ, ينفراقۇرىلىم, مامان دايارلاۋ – مۇنىڭ بارلىعى ۇلتتىق سپورت تۇرلەرىن جاڭا ساپالىق دەڭگەيگە كوتەرۋگە مۇمكىندىك بەرەدى», دەدى الماتى وبلىسى ۇلتتىق سپورت تۇرلەرىن دامىتۋ ديرەكتسياسىنىڭ ديرەكتورى ەلدوس تىلەبالديەۆ.
كوماندالىق كوكپار ليگاسى ءبىزدىڭ وڭىردە العاش رەت وتكىزىلىپ وتىر. «باتىس وڭىرلىك كەزەڭگە» 5 كوماندا قاتىستى. جالپى 60-تان استام سپورتشى وزدەرىنىڭ ات ۇستىندەگى شەبەرلىگىن, تاكتيكالىق دايىندىعىن كورسەتتى. سونىمەن قاتار كوماندالىق كوكپاردىڭ كورىگىن قىزدىرعان تۇلپارلاردىڭ توزىمدىلىگى مەن ۇلتتىق ويىنعا ەرەكشە بەيىمدىلىگى كورەرمەن نازارىن اۋدارتتى.
جارىستىڭ باس تورەشىسى ءسابيت قاسەنوۆ كوماندالىق كوكپار – ناقتى تاكتيكالىق جوسپارعا قۇرىلعان, زاماناۋي سپورتتىق سايىس ەكەنىن, مۇنداي فورمات ءىرى تۋرنيرلەردى جۇيەلى وتكىزۋگە, سپورتشىلاردى كاسىبي دەڭگەيدە دايىنداۋعا, جاستار اراسىندا ات سپورتى مادەنيەتىن دامىتۋعا مۇمكىندىك بەرەتىنىن تىلگە تيەك ەتتى.
بايراقتى باسەكەدە قاراساي اۋدانىنىڭ كومانداسى جەڭىسكە جەتتى. فينالدىق سايىستا ولار جامبىل اۋدانىنىڭ كوكپارشىلارىنان باسىم ءتۇستى. ال ءتۋرنيردىڭ قولا جۇلدەسى «كەمەرتوعان» كومانداسىنا بۇيىردى.
ەسكە سالا كەتەيىك, قاتىسۋشىلار فينالدىق كەزەڭگە جولداما ءۇشىن باق سىنادى. وندا باتىس جانە شىعىس وڭىرلەرىنىڭ ەڭ ۇزدىك كوماندالارى كەزدەسەدى. «الماتى وبلىسى اكىمىنىڭ كۋبوگىنە ارنالعان كوماندالىق كوكپار ليگاسىنىڭ شىعىس وڭىرلىك كەزەڭى» 26–29 قاراشا ارالىعىندا وتەدى. ال فينالدىق كەزەڭ وسى جىلدىڭ جەلتوقسان ايىنا جوسپارلانعان.
جەڭىمپازدار مەن جۇلدەگەرلەر ديپلومدارمەن, مەدالدارمەن, كۋبوكتارمەن, سونداي-اق اقشالاي سىيلىقتارمەن ماراپاتتالادى.
كوكپار ويىنى الماتى وبلىسىنىڭ دەنە شىنىقتىرۋ جانە سپورت باسقارماسىنىڭ, وبلىستىق سپورتتى دامىتۋ ورتالىعىنىڭ, ۇلتتىق سپورت تۇرلەرىن دامىتۋ ديرەكتسياسىنىڭ جانە «الاتاۋ» وبلىستىق كوكپار فەدەراتسياسىنىڭ قولداۋىمەن وتكىزىلدى.
الماتى وبلىسى
