جىل سايىن ءداستۇرلى تۇردە ءوتىپ كەلە جاتقان ناۋقان وتباسىنداعى زورلىق-زومبىلىق ماسەلەسىنە قوعامنىڭ نازارىن اۋدارۋ, ايەلدەر مەن بالالاردىڭ قۇقىقتارىن قورعاۋ, سونداي-اق قوعامدا زورلىق-زومبىلىقتىڭ كەز كەلگەن تۇرىنە توزبەۋشىلىك مادەنيەتىن قالىپتاستىرۋدى كوزدەيدى.
بيىلعى ناۋقان مەدەۋ اۋدانى اۋماعىندا 25 قاراشا مەن 10 جەلتوقسان ارالىعىندا جۇرگىزىلمەك. ناۋقاننىڭ نەگىزگى مىندەتتەرى حالىقتى زورلىق-زومبىلىقتىڭ تۇرلەرى مەن سالدارى تۋرالى اقپاراتتاندىرۋ, ازاماتتاردىڭ قۇقىقتارى مەن مۇددەلەرىن قورعاۋ سالاسىنداعى زاڭناما تالاپتارىن ءتۇسىندىرۋ, جابىرلەنۋشىلەرگە كومەك كورسەتەتىن قىزمەتتەردىڭ بايلانىس دەرەكتەرىن تاراتۋ, قوعامدا زورلىقسىز مىنەز-ق ۇلىق, ءوزارا قۇرمەت, تۇسىنىستىك جانە قولداۋ مادەنيەتىن قالىپتاستىرۋ, جاستاردى جانە قوعامدىق ۇيىمداردى پروفيلاكتيكالىق جۇمىستارعا تارتۋ.
«بۇل اكتسيا زورلىق-زومبىلىقسىز, كەمسىتۋسىز جانە قورقىنىشسىز ءومىردى قولدايتىن الەمدەگى ميلليونداعان ادامداردى بىرىكتىرەدى. ءاربىر ادام زورلىق-زومبىلىق جەكە وتباسىنىڭ عانا ماسەلەسى ەمەس, ول ادام قۇقىقتارىن بۇزۋ ەكەنىن جانە وعان قارسى شارا قولدانۋ قاجەت ەكەنىن ءتۇسىنۋى ماڭىزدى. اكتسيا اياسىندا مەدەۋ اۋدانىنداعى مەكتەپتەردە اشىق ساباقتار مەن سىنىپ ساعاتتارى ءوتىپ, اقپاراتتىق بۋكلەتتەر مەن جادىنامالار تاراتىلادى. جۇرتشىلىققا پسيحولوگتار مەن زاڭگەرلەر قۇقىقتىق كەڭەس بەرەدى», دەيدى مەدەۋ اۋداندىق پوليتسيا باسقارماسىنىڭ وكىلدەرى.
پوليتسيا قىزمەتكەرلەرى قانداي دا ءبىر زورلىق-زومبىلىققا ۇشىراعان نەمەسە وسى سيپاتتاعى كەلەڭسىز وقيعاعا كۋا بولعانداردى ءۇنسىز قالماۋعا شاقىردى. ول ءۇشىن 102 ءنومىرى ارقىلى وتباسىلىق-تۇرمىستىق زورلىق-زومبىلىق قۇرباندارىنا كومەك كورسەتۋ ورتالىعىنا حابارلاسۋعا بولادى. ال, «بالالارعا ارنالعان سەنىم تەلەفونى» – 150.
ايتا كەتەر بولساق, «زورلىق-زومبىلىققا قارسى 16 كۇن بەلسەندىلىك» حالىقارالىق اكتسياسى العاش رەت 1991 جىلى اقش-تاعى ايەلدەردىڭ جاھاندىق كوشباسشىلىعى ورتالىعىنىڭ باستاماسىمەن وتككەن بولاتىن.
