پرەزيدەنتتىڭ قازاقستاندى نەگىزگى كولىك-لوگيستيكالىق توراپقا اينالدىرۋ جونىندەگى تاپسىرمالارىن ورىنداۋ شەڭبەرىندە ەلىمىزدە بەس ءىرى ترانسشەكارالىق حاب جۇزەگە اسىرىلىپ جاتىر. بەس ترانسشەكارالىق حاب – شيكىزاتتىق ەمەس تاۋارلار ەكسپورتىن 30%-عا ۇلعايتۋعا مۇمكىندىك بەرەدى.
بۇل تۋرالى ۇكىمەت وتىرىسىندا ساۋدا جانە ينتەگراتسيا ءمينيسترى ارمان شاققاليەۆ ايتتى. ول بۇگىنگى تاڭدا بارلىق باعىت بويىنشا باسقارۋشى كومپانيالار انىقتالىپ, ينفراقۇرىلىمدار قۇرىلىسى قارقىندى ءجۇرىپ جاتقانىن باياندادى.
اتاپ ايتقاندا, وزبەكستانمەن شەكارادا ەلدەر اراسىنداعى تاۋار اينالىمىن $10 ملرد-قا دەيىن جەتكىزۋگە ارنالعان «ورتالىق ازيا» حالىقارالىق ونەركاسىپتىك كووپەراتسيا ورتالىعى قۇرىلادى. ەلىمىزدىڭ شىعىسىندا «قورعاس» حشىو» مەن «قورعاس – شىعىس قاقپاسى» ارنايى ەكونوميكالىق ايماقتارىن بىرىكتىرەتىن قورعاس تورابى دامىپ كەلەدى. مۇندا قىتايمەن وتكىزۋ قابىلەتىن ارتتىرۋ ءۇشىن SkyHansa حالىقارالىق اۋەجايى جانە جاڭا لوگيستيكالىق كەشەندەر سالىنادى.
ارمان شاكقاليەۆتىڭ ايتۋىنشا, وسىلارمەن قاتار كاسپي تورابىن دامىتۋ بويىنشا دا جۇمىستار جۇرگىزىلىپ كەلەدى, وندا اقتاۋ جانە قۇرىق پورتتارىندا كونتەينەرلىك حاب پەن «سارجا» كوپفۋنكتسيونالدى تەرمينالىنىڭ قۇرىلىسى بوي كوتەرمەك. باتىس بويىنشا بقو-دا رەسەيگە ەكسپورتقا باعدارلانعان «ەۋرازيا» ترانسشەكارالىق ساۋدا ورتالىعى جۇمىس ىستەپ تۇر. ال جامبىل وبلىسىندا «باتىس ەۋروپا – باتىس قىتاي» باعدارىندا يندۋستريالىق ساۋدا-لوگيستيكالىق كەشەن قۇرىلادى. ول قىرعىزستانمەن شەكارادا تاۋار اعىندارىن وڭدەۋدى جانە ءبولۋدى قامتاماسىز ەتەدى.
ء«بىز ينۆەستيتسيالىق جوبالاردى جۇزەگە اسىرۋدىڭ بەلسەندى كەزەڭىنە اياق باسقالى وتىرمىز. بۇل كەزەڭدە جوبالاردى ناقتى ىسكە قوسۋعا, لوگيستيكالىق مۇمكىندىكتەردى كەڭەيتۋگە جانە بيزنەستى كووپەراتسيانىڭ جاڭا فورماتتارىنا تارتۋعا باسا نازار اۋدارىلاتىن بولادى. بۇل حابتاردى ىسكە قوسۋ شەكارا ماڭىنداعى مەملەكەتتەرمەن ساۋدا پروتسەستەرىن ەداۋىر جەدەلدەتۋگە, شيكىزاتتىق ەمەس ەكسپورت كولەمىن 30%-عا ارتتىرۋعا جانە قازاقستاندىق كومپانيالار ءۇشىن ءتيىمدى لوگيستيكالىق جاعدايلاردى قامتاماسىز ەتۋگە مۇمكىندىك بەرەدى», دەپ اتاپ ءوتتى مينيستر.
