باۋىرجان بايبەك الماتى قالاسىنىڭ اكىمى بولىپ تاعايىندالدى

الماتى. 9 تامىز. مەملەكەت باسشىسى نۇرسۇلتان نازارباەۆ الماتى اكتيۆىنە قالانىڭ جاڭا اكىمى – باۋىرجان بايبەكتى تانىستىردى. بۇل تۋرالى اقوردانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. بۇل لاۋازىمعا باۋىرجان بايبەك تاعايىندالسا, احمەتجان ەسىموۆ باسقا قىزمەتكە اۋىسۋىنا بايلانىستى قالا اكىمى قىزمەتىنەن بوساتىلدى. باۋىرجان بايبەك بۇعان دەيىن «نۇر وتان» پارتياسى توراعاسىنىڭ ءبىرىنشى ورىنباسارى قىزمەتىن اتقاردى. باۋىرجان قىدىرعالي ۇلى بايبەك 1974 جىلى 19 ناۋرىزدا الماتى قالاسىندا تۋعان. «بولاشاق» باعدارلاماسى بويىنشا گەرمانياداعى گەتە ينستيتۋتىن نەمىس ءتىلىنىڭ مامانى (برەمەن قالاسى, 1995), «بولاشاق» باعدارلاماسى بويىنشا ليۋبەك قالاسىنداعى جوعارى مەكتەپتى پەداگوگ (1998), ورتالىق ازيا ۋنيۆەرسيتەتىن حالىقارالىق ەكونوميست (2002) ماماندىقتارى بويىنشا بىتىرگەن. «حاتتامالىق ءىس-شارالاردى قامتاماسىز ەتۋ بويىنشا تاجىريبەلىك نۇسقاۋلىق» (2007, ەكى تىلدە), «قازاقستان رەسپۋبليكاسىنىڭ مەملەكەتتىك حاتتاماسى» (2010) كىتاپتارىنىڭ اۆتورى, «قازاقستان رەسپۋبليكاسىنىڭ مەملەكەتتىك حاتتاماسى» (2004) كىتابىنىڭ بىرلەسكەن اۆتورى, «پرەزيدەنتتىڭ ءبىر جىلى» (2006, 2007) كىتابىنىڭ قۇراستىرۋشىسى, 6 ماقالانىڭ, سونىڭ ىشىندە «مەملەكەتتىڭ سىرتقى ساياسي قىزمەتىندەگى حاتتاما» (2010), «شەتەلدىك مەملەكەتتەردىڭ حاتتامالىق قىزمەتىن ينستيتۋتتاندىرۋدىڭ كەيبىر اسپەكتىلەرى تۋرالى» (2010) جانە تاعى باسقا جاريالانىمداردىڭ اۆتورى. ب.بايبەك 1999 جىلدان - قازاقستاننىڭ گەرمانياداعى باس كونسۋلدىعىنىڭ رەفەرەنتى, اتتاشەسى - گفر-داعى قازاقستان ەلشىلىگى ەكونوميكالىق ءبولىمىنىڭ ءۇشىنشى حاتشىسى, 2002 جىلدان - پرەزيدەنت اكىمشىلىگى جۇيەلى زەرتتەۋلەر ورتالىعىنىڭ ساراپشىسى, 2003 جىلدان - پرەزيدەنت حاتتاماسىنىڭ اقپارات پەن تالداۋ سەكتورىنىڭ مەڭگەرۋشىسى, 2004 جىلدان - باس ينسپەكتورى, 2006 جىلدان - حاتتاما جەتەكشىسى, 2009 جىلدىڭ تامىز ايىنان پرەزيدەنت اكىمشىلىگى جەتەكشىسىنىڭ ورىنباسارى بولىپ قىزمەت اتقاردى. 2013 جىلعى 1 قاڭتاردا «نۇر وتان» پارتياسى توراعاسىنىڭ ءبىرىنشى ورىنباسارى بولىپ تاعايىندالدى. ول قازاقستان پرەزيدەنتىنىڭ حالىقارالىق «بولاشاق» ستيپەندياسى ستيپەندياتتارى قاۋىمداستىعى كەڭەسىنىڭ توراعاسى (2008 جىلدان),  قازاق گۋمانيتارلىق زاڭ ۋنيۆەرسيتەتى قامقورشىلىق كەڭەسىنىڭتوراعاسى (2010 جىلدان), س.د.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى قامقورشىلىق كەڭەسىنىڭ (2010 جىلدان) مۇشەسى بولدى. تالعات ءسۇيىنباي. دەرەك, سۋرەت: egemen.kz.