ارنايى جابدىقتالعان جاڭا وقۋ كەڭىستىگىنىڭ باستى ماقساتى – وقۋشىلاردى تۇلعاتانۋ, ۇلتتىق رۋح پەن پاراسات قۇندىلىقتارىنا تاربيەلەۋ. كابينەتتە جازۋشىنىڭ ءومىرى مەن شىعارماشىلىق مۇراسىن تەرەڭ تانىستىرۋعا ارنالعان دەرەكتەر, ينتەراكتيۆتى اقپاراتتىق بۇرىشتار, سونداي-اق وقۋشىلاردىڭ شىعارماشىلىق جۇمىستارى مەن زەرتتەۋىنە باعىتتالعان ارنايى ايماقتار جاساقتالعان.
سالتاناتتى شارادا ءوڭىر باسشىسى نۇرداۋلەت قيلىباي جاس ۇرپاقتىڭ ادامگەرشىلىك جانە رۋحاني دامۋى ءۇشىن مۇنداي كابينەتتەردىڭ ماڭىزى زور ەكەنىن ايتتى.
ء«ابىش الەمى – ۇلتتىق رۋحتىڭ, پاراساتتىڭ, تەرەڭ ويدىڭ مەكتەبى. جاس بۋىنعا وسىنداي تاعىلىمدى ورىندار كەرەك. بۇگىن اشىلعان كابينەت وسكەلەڭ ۇرپاقتىڭ دۇنيەتانىمىن كەڭەيتىپ, ەلدىك مۇراتقا ادال بولۋعا تاربيەلەۋگە قىزمەت ەتەدى», دەدى ايماق باسشىسى.
ءىس-شارادا «وتان» جانە «قۇرمەت» وردەنىنىڭ يەگەرى, اقىن سۆەتقالي نۇرجان جانە جاڭاوزەن قالاسىنىڭ قۇرمەتتى ازاماتى, ارداگەر ۇستاز نۇرتاەۆ اندرەي قۇتتىقتاۋ ءسوز سويلەپ, ءابىش كەكىلباي ۇلىنىڭ شىعارماشىلىق مۇراسىنىڭ جاس ۇرپاق ءۇشىن ماڭىزىن اتاپ ءوتتى. ودان كەيىن لەنتا قيۋ ءراسىمى ءوتىپ, قوناقتار كابينەت جۇمىسىمەن تانىستى.
كابينەتتىڭ مازمۇنى مەن نەگىزگى باعىتتارى تۋرالى №5 مەكتەپ-گيمنازياسىنىڭ قازاق ءتىلى مەن ادەبيەتى ءپانىنىڭ مۇعالىمى, كابينەت مەڭگەرۋشىسى روزا جاڭعاقباەۆا تانىستىرىلىم جاسادى. سونداي-اق دارىندى وقۋشىلار جازۋشىنىڭ شىعارمالارىنان ولەڭدەر وقىپ, قوناقتارعا رۋحاني اسەر سىيلادى.
